Sioné 16
16
1KO E ngaahi me‘a ni kuo u tala atu, koe‘uhi ke ‘oua te mou tūkia. 2Te nau hifo kimoutolu mei he falelotu: ‘io, ‘oku ‘unu mai ha taimi, ‘a ia ‘e ‘ilonga ai ha taha te ne tāmate‘i kimoutolu, te ne lau kuo ne fai ha feilaulau ki he ‘Otua. 3Pea te nau fai pehē, koe‘uhi kuo ‘ikai te nau ‘ilo ‘a e Tamai, ‘uma‘ā au, 4‘ē, ma‘u ā! ka kuo u ki‘i lea pehē, koe‘uhi ‘oka hokosia hono taimi ke mou manatu na‘a ku tala atu ia ‘e au. Ka na‘e ‘ikai te u tala atu ‘a e ngaahi me‘a ko ia mei he kamata‘anga, koe‘uhi na‘a ku ‘iate kimoutolu.
Ko e Ngāue ‘a e Laumālie Mā‘oni‘oní
5Ka ko eni ‘oku ou ‘alu atu kiate ia na‘a ne fekau mai au; pea tala‘ehai ‘oku fehu‘i mai ‘e hamou taha, Ko si‘o ‘alu ki fē? 6Ka koe‘uhi kuo u tala ‘a e ngaahi me‘a ko eni kiate kimoutolu, kuo fonu kotoa leva homou loto ‘i he mamahi. 7Ka ko si‘i mo‘oni ‘eni ‘oku ou tala atu: Ko hono lelei kiate kimoutolu ‘a e hiki ‘a‘aku: pea kapau ‘e ‘ikai te u hiki, pea ‘e ‘ikai ha‘u ‘a e Taukapo kiate kimoutolu; ka ‘o kapau te u ‘alu, te u fekau ia kiate kimoutolu. 8Pea ‘i he ha‘u ‘a e Toko Taha ko ia te ne lea o‘o ki māmani ‘i he angahala, mo e mā‘oni‘oni, mo e fakamaau: 9‘i he angahala, koe‘uhiā ko e ‘ikai te nau tui pīkitai kiate au; 10‘i he mā‘oni‘oni, koe‘uhi ko ‘eku ‘alu ki he Tamai, pea ‘ikai te mou kei sio kiate au. 11Pea ‘i he fakamaau, koe‘uhi kuo fakamāu‘i ‘a e ‘eiki ‘o e maama ko eni.
12‘Oku kei toe lahi ‘eku me‘a ke lea ki ai kiate kimoutolu, ka ‘oku ‘ikai te mou fa‘a kātaki ‘i he taimi ni. 13Ka ‘oka hoko mai ‘a e Toko Taha ko ia, ‘a e Laumālie ‘o e Mo‘oni, te ne tataki kimoutolu ki he mo‘oni, hono kotoa; he tala‘ehai te ne lea ‘iate ia pē; ka ‘ilonga ha me‘a te ne fanongo ki ai, te ne lea‘aki: pea te ne fakahā kiate kimoutolu ‘a e ngaahi me‘a ‘oku tu‘unuku mai. 14Ko au pē te ne fakalāngilangi‘i ‘e he toko taha ko ia: he te ne to‘o mei he me‘a ‘a‘ata, ‘o ne fakahaa‘ia kiate kimoutolu. 15Ko e me‘a kotoa pē ‘oku ‘a e tamai ‘oku ‘a‘aku ia: ko hono ‘uhinga ia na‘a ku pehē ai, te ne to‘o mei he me‘a ‘a‘ata ‘o fakahā kiate kimoutolu.
‘E Liliu ‘a e Mamahí Ko e Fiefia
16Toe si‘i, pea ‘e ‘ikai te mou kei mātā au: pea toe si‘i atu, pea te mou sio kiate au.
17Ko ia na‘e fepehē‘aki ai ha ni‘ihi ‘o ‘ene kau ako, Ko e hā ‘eni ‘oku ne lau mai, Toe si‘i pea ‘e ‘ikai te mou mātā au: pea toe si‘i atu, pea te mou sio kiate au: pea mo ‘ene lau, Ko ‘eku ‘alu ni ki he Tamai? 18Pea nau pehē ai, Ko e hā tū ‘a e me‘a ni, ‘a ‘ene pehē, Toe si‘i? ‘oku ‘ikai te mau ‘ilo pē ko e hā ‘a e ‘uhinga ‘o ‘ene lea.
19Pea mea‘i ‘e Sīsū ‘oku nau fie fehu‘i kiate ia, pea ne pehē kiate kinautolu, Ko eni koā ‘a e me‘a ‘oku mau fakakikihi ki ai, ‘a ‘eku pehē, Toe si‘i, pea ‘ikai te mou mātā au: pea toe si‘i atu, pea te mou sio kiate au, ‘o? 20Ko eni, Ko au ē, ko au ē, ‘oku ou tala atu, Te mou tangi ‘e kimoutolu mo tangilāulau, ka ‘e fiefia ‘a māmani: te mou mamahi ka ‘e liliu ho‘omou mamahi ko e fiefia. 21Ka langā ha fefine ‘oku ne ongo‘i mamahi, koe‘uhi kuo hokosia hono taimi: ka ka fā‘ele‘i leva ‘a e tama, ‘oku ‘ikai te ne kei manatu ki he‘ene faingata‘a‘ia, he‘ene fiefia ‘i he fanau‘i ‘o ha tangata ki māmani. 22Pehē, ‘oku mou ongo‘i mamahi ‘e kimoutolu ‘i he taimi ni: ka te u toe sio kiate kimoutolu, pea ‘e fiefia homou loto, pea ko ho‘omou fiefia ‘e ‘ikai ‘ave ‘e ha taha.
23Pea ‘i he ‘aho ko ia ‘e ‘ikai te mou fehu‘i ha me‘a kiate au. Ko au ē, ko au ē, ‘oku ou tala atu, Kapau te mou kole ha me‘a mei he Tamai, te ne ‘atu kiate kimoutolu ‘i hoku hingoa.#16.23 Kapau… hingoa: ‘Oku pehē ‘i hono ngaahi hiki fuoloa ‘e ni‘ihi: Ko ha me‘a pē te mou kole ki he Tamaí ‘i hoku hingoá, te ne ‘oatu. 24Te‘eki te mou kole ha me‘a ‘e taha ‘i hoku hingoa, ‘o a‘u mai ki he taimi ni. ‘Ē, mou kole, pea te mou ma‘u, koe‘uhi ke kakato ho‘omou fiefia.
Ko e Ikuna‘i ‘o Māmani
25Ko e ngaahi me‘a ni kuo u fai fakatātā ‘eku tala kiate kimoutolu: ‘oku ‘unu mai ha taimi, ‘a ia ‘e ‘ikai te u kei fai fakatātā ai ‘eku tala me‘a kiate kimoutolu, ka te u fakamatala ‘a e Tamai kiate kimoutolu, ‘o talatalatonu. 26‘I he ‘aho ko ia te mou fai ho‘omou kole ‘i hoku hingoa: pea ‘oku ‘ikai te u pehē te u fakakolekolea ‘a e Tamai koe‘uhi ko kimoutolu: 27he ko e Tamai ‘oku ne ‘ofa kiate kimoutolu fakaeia pē, koe‘uhiā kuo mou ‘ofa kiate au, pea kuo mou tui na‘a ku ‘alu atu mei he Tamai. 28Na‘a ku ‘alu atu mei he Tamai, pea kuo u ha‘u ki māmani: ko eni ‘oku ou tuku ‘a māmani ‘o u ‘alu ki he Tamai.
29Pea lea ‘ene kau ako, Ta ko eni ‘oku ke lea fakahangatonu mai, pea ‘oku ‘ikai te ke momo‘i lau fakatātā. 30‘Oku mau ‘ilo ‘eni ‘oku ke mea‘i ‘a e me‘a kotoa pē, pea ‘oku ‘ikai te ke ‘oua ke fehu‘i ‘e ha taha kiate koe: ko e me‘a ko ia ‘oku mau tui ai na‘a ke ha‘u mei he ‘Otua.
31Pea tali ‘e Sīsū kiate kinautolu, ‘Oku mou tui ‘eni koā? 32‘Ē, ‘oku ‘unu mai ha taimi, ‘io, kuo hokosia, ‘a ia ‘e vetekina kimoutolu takitaha ki hono ‘api tonu, pea te mou tuku au ke toko taha: ka tala‘ehai ‘oku ou toko taha, he ko e Tamai ‘oku ne ‘iate au. 33Ko e ngaahi me‘a ni kuo u tala kiate kimoutolu, Koe‘uhi ke mou ma‘u ‘iate au ha Fiemālie. ‘I māmani ‘oku mou ma‘u fakamamahi; ka mou lototo‘a pē; kuo u ikuna ‘a māmani ‘e au.
Currently Selected:
Sioné 16: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.