KO SELEMAIA Ko e Talateu
Ko e Talateu
Na‘e tupu ‘a e palōfita ko Selemaiá ‘i he konga kimui ‘o e senituli hono fitú mo e konga kimu‘a ‘o e senitulu hono ono kimu‘a ‘ia Kalaisí. Lolotonga ‘ene fai fatongia fuoloa ko ‘ení na‘á ne fakatokanga ki he kakai ‘a e ‘Otuá ‘o fekau‘aki mo e faingata‘a na‘e tu‘unuku ke tō ki he fonuá koe‘uhí ko ‘enau tauhi ‘aitolí mo ‘enau fai angahalá. Na‘e tolonga pē ‘ene mo‘uí ‘o a‘u ki hono fakahoko ‘o ‘ene kikité, ‘a ia ko hono ma‘u ‘o Selusalema ‘e he tu‘i Pāpilone ko Nepukanesa, mo hono faka‘auha ‘o e koló mo e Temipalé, pea mo hono fakahee‘i ki Pāpilone ‘o e tu‘i Siutá mo e tokolahi ‘o hono kakaí. Na‘á ne toe kikite‘i foki ‘a e foki mai ‘a e kakaí mei he fakaheé pea mo hono toe langa ‘o e fonuá.
Ko e Tohi ‘a Selemaiá ‘e lava ke vahevahe ia ki he ngaahi konga ko ‘eni: 1) Ko e ui ‘o Selemaia; 2) Ko e ngaahi fekau mei he ‘Otuá ki he pule‘anga Siutá mo hono kau takí ‘i he lolotonga ‘a e pule ‘a e ngaahi tu‘i ko Siosaia, Sihoiakimi, Konaia, mo Setekaia; 3) Ko e ngaahi fakamatala mei he tohinoa ‘a Paluki, ko e sekelitali ‘a Selemaiá, ‘o kau ai mo e ngaahi kikite mo e ngaahi me‘a lalahi na‘e hoko ki he mo‘ui ‘a Selemaiá; 4) Ko e ngaahi fekau mei he ‘Eikí ‘o fekau‘aki mo e ngaahi fonua muli kehekehe; 5) Ko e fakamatala ‘o kau ki hono ma‘u ‘o Selusalemá ‘e he tu‘i Pāpiloné, mo hono fakahee‘i hono kakaí ki Pāpiloné.
Ko Selemaia ko ha tokotaha loto ongo‘i ‘a ia na‘á ne ‘ofa mo‘oni ‘i hono kakaí, mo ne fehi‘a ‘i hono fekau ke fakahā kiate kinautolu ‘a honau fakamāu‘i ‘e faí. I he ngaahi potu folofola ‘e ni‘ihi na‘á ne fakamatala mo e loto ongo‘i mo‘oni ki he ngaahi kanongatāmaki ‘o hono ui ia ‘e he ‘Otuá ke ne palōfitá. Ko e folofola ‘a e ‘Otuá na‘e hangē ha afi ‘oku kakaha ‘i hono laumālié–na‘e ‘ikai lava ke ne tukuloto‘i.
Ko e ngaahi lea ‘iloa taha ‘a Selemaia ‘i he‘ene tohí, ‘oku hanga ia ki he tu‘a kuonga fonu faingata‘a ‘o Selemaiá ki he kuonga ‘e fokotu‘u ai ha kovinānite fo‘ou, ‘a ia ‘e tauhi ‘e he kakai ‘a e ‘Otuá ‘o ‘ikai fiema‘u ha faiako ke ne toutou fakamanatu ia kiate kinautolu, koe‘uhí he ‘e tohi ia ‘i honau ngaahi lotó (vahe 31.31-34). Fakatokanga‘i lelei: Na‘e liliu ‘e Molitoní ‘a e Sekonaiá ‘o Konaia.
Ko e Kakano ‘o e Tohí
Ko hono ui ‘o Selemaiá (1.1-19)
Ko e ngaahi kikite ‘i he lolotonga ‘a e pule ‘a Siosaia, Sihoiakimi, Konaia, mo Setekaiá (2.1–25.38)
Ko e ngaahi me‘a lalahi na‘e hoko ki he mo‘ui ‘a Selemaiá (26.1–45.5)
Ko e ngaahi kikite ki he fakamāu‘i ‘o e ngaahi pule‘anga (46.1–51.64)
Ko Hono Ma‘u ‘e Pāpilone ‘a Selusalema (52.1-34)
Currently Selected:
KO SELEMAIA Ko e Talateu: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.