KO ‘AISEA 66
66
Ko Hono Fakamāu‘i ‘e Sihova ‘a e ngaahi Pule‘angá
1KO eni ‘a e folofola ‘a Sihova, Ko e langi ‘a hoku taloni, pea ko māmani ‘a hoku tu‘ungava‘e; ko e hā tū ‘a e fale ‘oku mou lau ke langa mo‘oku?#Māt 5.34,35; 23.22 #Ngā 7.49-50 2pea ko e hā ‘a e anga ‘o e potu te u toka ai? He ko e ngaahi me‘a kotoa ko ē na‘e ngaohi ‘e hoku nima, ko ia na‘e hoko mei ai ‘a e me‘a ko ena kotoa–ko Sihova ia mei he Ta‘ehāmai: ka ko e fa‘ahinga ‘oku ou sio ki ai, ‘a kinautolu ‘oku ongo‘i masiva, pea ‘oku loto mafesi, pea ‘oku tete ‘i he‘eku lea.
3Ko ia ‘oku tāmate‘i ha pulu ko e fakapō tangata ia; ko ia ‘oku feilaulau ‘aki ha sipi, ko e taha ia ‘oku fesi‘i ‘a e kia ‘o ha kulī; ko ia ‘oku ne ‘atu ha feilaulau-me‘akai, ko e toto ‘o e puaka ia; ko ia ‘oku ne ‘atu ha laipeno fakamanatu, ‘oku ne tāpuaki‘i ha ‘aitoli. 4Kuo fili koā ‘e he fa‘ahinga ko ia honau founga, pea ‘oku manako ‘e honau loto ki he‘enau ngaahi fakalielia? Lelei, te u fili ‘e au foki hanau ngaahi tu‘utāmaki, pea te u ‘omi kiate kinautolu ‘a e ngaahi me‘a ‘oku nau ilifia ki ai: koe‘uhiā na‘a ku ui, ka na‘e ‘ikai ha taha ‘e tali; na‘a ku lea, ka na‘e ‘ikai te nau fanongo: pea na‘a nau fai ‘a e me‘a na‘e hā kovi kiate au, pea ko e me‘a na‘e ‘ikai te u manako ki ai ‘a ia na‘a nau fili ki ai.
5Fanongo ki he folofola ‘a Sihova, ‘a kimoutolu ‘oku tete ‘i he‘ene lea. Ko homou kāinga ‘oku fehi‘a kiate kimoutolu, ‘oku nau kapusi kimoutolu koe‘uhi ko hoku hingoa, ‘oku lau ‘e kinautolu ‘o pehē, Tuku ke fakalāngilangi‘i ia ‘e Sihova, ka mau sio ki ho‘omou fiefia. ‘Ā, ko e fa‘ahinga ko ia ‘e mā.
6Tū ‘oku longoa‘a mai ‘a e kolo,
Tū ‘oku longoa‘a mai ‘a e temipale,
Ko e longoa‘a ‘o e faitotongi ‘e Sihova
Ki hono ngaahi fili.
7Te‘eki ke langā ‘a e fefine ko ē, na‘a ne fā‘ele;
Te‘eki ke kamata ‘ene mamahi, kuo ‘i tu‘a ‘a e tamasi‘i tangata.#Fkhā 12.5
8Ko hai kuo ne fanongo ki ha me‘a pehē?
Ko hai kuo mamata ki ha ngaahi me‘a hangē ko ena?
‘Oku fā‘ele‘i koā ha fonua kotoa ‘i ha ‘aho pē taha?
‘Io, ‘oku fanau‘i ha pule‘anga ‘i ha feinga pē taha?
He kuo langā ‘a Saione?
Kuo ne fā‘ele‘i foki ‘ene fānau.
9He ko e taha au ke kamata ‘a e fānau, ‘o ‘ikai fakahao ki tu‘a?–ko e folofola ia ‘a Sihova–‘io, ko e taha au ke fakafā‘ele, pea toki ta‘ofi?–ko e folofola ia ‘a ho ‘Otua. 10Mou kaungā fiefia mo Selusalema, mo tome‘e ‘iate ia, ‘a kimoutolu kotoa ‘oku ‘ofa ki ai: mou mātu‘aki kaungā fiefia mo ia, ‘a kimoutolu kotoa ‘oku tangi koe‘uhi ko ia: 11koe‘uhi ke mou huhu ke topono mei he mata‘i huhu ‘o hono fakafiemālie, koe‘uhi ke mou komo he fu‘u fiefia, ‘a e puhi mai hono lāngilangi.
12He ko eni ‘a e folofola ‘a Sihova, Ko au eni ‘oku ou tolo atu kiate ia ‘a e fiemālie hangē ha vaitafe, pea ko e ouau ‘o e ngaahi pule‘anga hangē ha vaifā, pea te mou komo ai; ‘e fafa fakavakavaka kimoutolu, pea ‘e alaala ‘ofa kiate kimoutolu ‘i he funga tui. 13Hangē ha siana ‘oku fakalelu‘i ‘e he‘ene fa‘ē, ‘e pehē ‘eku fakalelu‘i kimoutolu: ‘io, ‘e fakalelu‘i kimoutolu ‘i Selusalema. 14Pea te mou sio ki ai, pea ‘e fonu fiefia homou loto, pea ‘e tupu homou ngaahi hui ‘o hangē ha mohuku mui: ‘io, ‘e mahino ‘a e nima ‘o Sihova ki he‘ene kau sevāniti; ka te ne ‘itangi hono ngaahi fili.
15He vakai, ‘e hā‘ele mai ‘a Sihova mo e afi, pea ko ‘ene ngaahi sāliote ‘e hangē ha ‘ahiohio; ke fakaai hono houhau ‘aki ‘a e vela, mo ‘ene fakamana ‘aki ‘a e ngaahi ulo ‘o e afi. 16‘E fai fakamaau ‘a Sihova ‘aki ‘a e afi; ‘io, ‘oku ne fai‘aki ‘ene heletā ki he kakano kotoa: pea ‘e tokolahi ‘a e tō ‘a Sihova.
17Ko e fa‘ahinga ‘oku fakatāpui kinautolu, mo fakama‘a kinautolu, ke ‘alu ki he ngaahi ngouetapu#66.17 ngouetapu; Vakai ki he 1.29. he muimui ki ha taha ‘oku tu‘u loto; ‘a e fa‘ahinga ‘oku kai ‘a e kakano ‘o e puaka, mo e ngaahi fakalielia, kae‘uma‘ā ‘a e kumā; ‘e tu‘usi kinautolu fakataha–ko Sihova ia mei he Ta‘ehāmai. 18Ka ko au, ko#66.18 ko au, ko; Ko hono faka-Hepeluú ia, ka ‘oku pehē ‘i he ngaahi hiki fuoloa ‘e ni‘ihi: ‘Oku ou ‘ilo. ‘enau ngaahi ngāue mo ‘enau ngaahi fakakaukau#66.18 ‘Oku matamata kuo ngangana ‘a e fo‘i lea ‘e ni‘ihi mei he faka-Hepeluú, ko e ‘Okú ne ha‘u nai, ka ‘oku pehē ‘i he ngaahi hiki fuoloa ‘e ni‘ihi: ‘Oku ou ha‘u. ke tānaki ‘a e ngaahi pule‘anga kotoa mo ‘enau ngaahi fa‘ahinga lea ke nau ha‘u ‘o sio ki hoku lāngilangi. 19Pea te u ‘ai kiate kinautolu ha faka‘ilonga, pea te u tuku atu ha hao meiate kinautolu, ke ‘alu ki he ngaahi pule‘anga, ki Tāsisi,#66.19 Tāsisi; Ko Sipeini ia. Puli,#66.19 Puli; Ko hono faka-Hepeluú ia, ka ‘oku pehē ‘i he hiki fuoloa ‘e taha: Līpia. mo Luti, ‘a kinautolu ‘oku teke ‘a e kaufana, ki Tūpale mo ‘Iavana,#66.19 ‘Iavana; ko Kalisi ia. Vakai ki he “Ngaahi Huluhulu”. ki he ngaahi motu mama‘o, ‘a ia kuo te‘eki ke nau fanongo ki hoku ongoongo, pea te‘eki ke nau mamata ki hoku lāngilangi; pea ‘e faka‘ilo ‘e he fa‘ahinga ko ia hoku lāngilangi ki he ngaahi pule‘anga.
20Pea te nau ‘omi homou kāinga kotoa mei he pule‘anga kehekehe, ko e me‘a‘ofa kia Sihova, kuo nau heka hoosi mo e sāliote mo e ngaahi fale ha‘amo, pea kuo heka ki he fanga miuli mo e kāmeli fefine, ke a‘usia hoku mo‘unga tapu,#66.20 mo‘unga tapú; Vakai ki he 2.3. ‘a Selusalema–ko e folofola ‘a Sihova ia-‘o hangē ko e fa‘a ‘omi ‘e ha‘a ‘Isileli ‘a e feilaulau-me‘akai ‘i ha ipu ma‘a ki he fale ‘o Sihova. 21Pea te u to‘o foki meiate kinautolu hanau ni‘ihi, ke fakalahi ‘aki ‘a e kau taula‘eiki mo e kau Līvai–ko e folofola ia ‘a Sihova.
22He hangē ‘oku fe‘ao ma‘u pē mo au ‘a e ngaahi langi fo‘ou mo e fonua fo‘ou ‘a ia ‘oku ou ngaohi–ko Sihova ia mei he Ta‘ehāmai–‘e pehē ‘a e fe‘ao mo au homou hako mo homou hingoa.#‘Ais 65.17; 2 Pit 3.13; Fkhā 21.1 23Pea ‘i he taimi ko ia, mei he māhina fo‘ou ki he māhina fo‘ou, pea mei he Sāpate ki he Sāpate, ‘e ha‘u ‘a e kakano kotoa ke lotu ‘i hoku ‘ao–ko e folofola ia ‘a Sihova. 24Pea te nau hū ki tu‘a ke siofi ‘a e ngaahi ‘anga‘anga ‘o e kakai na‘e talangata‘a kiate au: he ko honau ‘uanga ‘e ‘ikai mate, pea ko honau afi ‘e ‘ikai fu‘ifu‘i; pea te nau hoko ko e me‘a ke fakalili‘a ki ai ‘a e kakano kotoa.#Ma‘ake 9.48
Currently Selected:
KO ‘AISEA 66: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
