KO SELEMAIA 9
9
1TAUMAIĀ ko hoku ‘ulu ni ko e vai, pea ko hoku ongo mata ko e fauniteni lo‘imata, ka u tēngihia ‘aho mo e pō ‘a e tō ‘i he kolo pele ‘a hoku kakai! 2Taumaiā ne u ma‘u ‘i he toafa ha fale talifononga, ka u li‘aki hoku kakai, ‘o ‘alu meiate kinautolu! he ko e kau tono ‘unoho kotoa pē, ko e fu‘ufu‘unga kau kākā. 3Pea ‘oku nau teke honau ‘elelo kaufana he kākā; pea ‘oku ‘ikai te nau fai tōnunga ‘enau angi ‘i he fonua. ‘Oku nau fai atu mei he kovi ‘e taha ki ha kovi ‘e taha: ka ko au ‘oku ‘ikai te nau ‘ilo ki ai–ko Sihova ia mei he Ta‘ehāmai.
4Pea takitaha lama hono kaume‘a, pea ‘oua ‘e falala ki ha toko taha ‘o ho kāinga: he ‘ilonga ha kāinga, kuo pau ke ne hakiva‘e; pea ‘ilonga ha kaume‘a, kuo pau te ne fakaaulau. 5Pea ko e tangata ko ē ‘oku ne fiemua‘i ‘a e tangata ko ē, pea ko e mo‘oni ‘oku ‘ikai te nau lea‘aki: ‘oku nau ako honau ‘elelo ke lea loi: ‘oku nau fakaongosia ‘i he faikovi. 6Ko ho nofo‘anga ‘oku ‘i he lotolotonga ‘o e lavaki; ko e me‘a ‘i he lavaki ‘oku ‘ikai te nau fie‘ilo au–ko Sihova ia mei he Ta‘ehāmai. 7Ko ia ko eni ‘a e folofola ‘a Sihova Sāpaoti, Ko au eni ‘oku ou haka kinautolu, pea te u sivi kinautolu: he ko e hā ‘eku toe me‘a ‘e fai ‘i he pehē ‘a e ‘ōfefine ‘o hoku kakai? 8Ko e ngahau fakamate ‘a honau ‘elelo; ‘oku ne lea‘aki ‘a e lavaki: ko e ngutu ‘o ē ‘oku ne tala melino ki hono kaungā‘api, ka ‘i loto ‘oku ne tata‘o ha malumu ki ai. 9Pea ‘ikai koā te u ‘eke ‘a e ngaahi me‘a ko ia kiate kinautolu?–ko Sihova ia mei he Ta‘ehāmai–‘o ‘ikai koā fai sauni ‘e hoku laumālie ki ha pule‘anga ‘oku pehē? 10Ka u ofa‘aki ha tangi mo ha tangilāulau koe‘uhi ko e ngaahi mo‘unga, mo ha ‘oiauē koe‘uhi ko e ngaahi kaikai‘anga ‘i he toafa; he kuo nau vela, ko ia ‘oku ‘ikai ke kei ‘alu ai ha taha; pea ‘oku ‘ikai ke kei ongo ai ‘a e longoa‘a ‘o e takanga; lau mei he manupuna ‘o e ‘atā ‘o a‘u ki he fanga manu lalahi, kuo hola kotoa pē, kuo nau ‘alu. 11Pea ‘oku ou ngaohi ‘a Selusalema ko e ngaahi tu‘unga ‘oto‘ota pē, ko e nofo‘anga ‘o e fanga siakali; pea ko e ngaahi kolo ‘o Siuta ‘oku ou ngaohi ko e lala, ta‘eha taha ‘e nofo ai.
12Ko hai ha tangata poto ke ‘uhinga ki ai ‘a e me‘a ni? Ha taha kuo folofola ki ai ‘a e fofonga ‘a Sihova, ke ne fakamatala ia? Ko e hā kuo ‘auha ai ‘a e fonua? Kuo vela ia hangē ha fonua mamate ‘o ‘ikai ‘alu ai ha taha?
13Pea folofola ‘a Sihova, Koe‘uhi ko ‘enau li‘aki ‘eku lao, ‘a ia na‘a ku fokotu‘u ‘i honau ‘ao, pea koe‘uhi na‘e ‘ikai te nau fakaongo ki he‘eku lea, pea na‘e ‘ikai te nau fou ai; 14ka na‘a nau muimui ki he ta‘emīngao ‘a honau loto, pea ki he kau Peali na‘e ako ai kinautolu ‘e he‘enau ngaahi kui; 15ko ia ko e folofola eni ‘a Sihova Sāpaoti, ko e ‘Otua ‘o ‘Isileli, Ko au eni ‘oku ou fafanga ‘a e kakai ni ‘aki ‘a e kona‘ī‘ī, pea ‘oku ou fakainu ‘aki ‘a e vai‘ahu. 16Pea ‘oku ou veteki kinautolu ki he ngaahi pule‘anga na‘e ‘ikai te nau ‘ilo ki ai, ‘e kinautolu, pe ko ‘enau ngaahi kui: pea ‘oku ou fekau ‘a e heletā ke tuli kiate kinautolu kae‘oua ke nau ‘osi.
Ko e Tangi ‘a e Kakai Selusalemá ki ha Tokoni
17Ko e folofola eni ‘a Sihova Sāpaoti, Mou fakakaukau, ‘o ui mai ‘a e kau fefine tēngihia ke nau ha‘u; pea fekau ki he kau fefine taukei ke nau ha‘u: 18pea ke nau fai vave, ‘o ofa‘aki ha‘atau tangilāulau koe‘uhi ke tafe ‘a e lo‘imata mei hotau mata, pea ke puna ‘a e vai mei hotau laumata.
19Seuke, ‘oku ongoonga‘a mai ‘a e tangilāulau mei Saione;
‘Oi, kuo vete kitautolu!
Kuo mātu‘aki fakamaa‘i kitautolu!
He kuo tau li‘aki ‘a e fonua,
Pea kuo nau holoki hotau ngaahi nofo‘anga.
20‘Io, fanongo mu‘a, si‘i kau fefine, ki he folofola ‘a Sihova; ‘io, ke tali ‘e homou telinga ‘a e folofola ‘a hono fofonga; pea ke ako ki ho‘omou kau ta‘ahine ha tangilāulau; ‘io, ke ako ‘e he fefine ko ē ha tangilāulau ki he fefine ko ē.
21He kuo ‘alu hake ‘a mate ‘i hotau ngaahi kātupa,
Kuo ne hū ‘i hotau ngaahi palasi;
Ke tu‘usi ‘a e tamaiki mei he hala,
Ko e kau talavou mei he ngaahi mala‘e.
22Lea, ‘o pehē, Ko e folofola eni ‘a Sihova mei he Ta‘ehāmai: Pea ‘e tō ‘a e ngaahi ‘anga‘anga ‘o e kakai ‘o hangē ko e kinoha‘a ‘i he funga ngoue‘anga, pea hangē ko e falukunga kau‘i koane ‘oku tō ‘i he tu‘a ‘o e tangata tu‘usi, pea ‘oku tuku ta‘ehiko.
23Ko eni ‘a e folofola ‘a Sihova: Ke ‘oua na‘a pōlepole ‘a e poto ‘i he‘ene poto, pea ke ‘oua ‘e pōlepole ‘a e mafi ‘i hono ivi; ‘oua ‘e pōlepole ‘a e koloa‘ia ‘i he‘ene koloa: 24ka ko eni pē e me‘a ‘e pōlepole ai ‘e ia ‘oku pōlepole,#1 Kol 1.31; 2 Kol 10.17 ‘a ‘ene ma‘u ‘atamai, mo ‘ene ‘ilo au, ko Sihova au ‘oku ou fai meesi, pea fai fakakonisitūtone, pea faitotonu ‘i māmani: he ko e ngaahi me‘a ko ia ‘oku ou manako ai–ko Sihova ia mei he Ta‘ehāmai.
25Vakai, ‘oku hoko mai ha taimi–ko Sihova ia mei he Ta‘ehāmai–‘a ia te u ‘eke ai ‘a e kau kamu ta‘ekamu na; 26‘a ‘Isipite, mo Siuta, mo ‘Ītomi, mo ha‘a ‘Āmoni, mo Moape, mo kinautolu kotoa ‘oku tele ‘a e tuliki ‘o honau kava, ‘a e kau nofo ‘i he toafa: he ko e ngaahi kakai ko ē ‘oku ta‘ekamu, pea ko e fale ‘o ‘Isileli kotoa ‘oku ta‘ekamu honau loto.
Currently Selected:
KO SELEMAIA 9: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
