KO SELEMAIA 10
10
Ko e Lotu ‘Aitolí mo e Lotu Mo‘oní
1FANONGO Ā ki he folofola, ‘a ia kuo folofola‘aki ‘e Sihova kiate kimoutolu, ‘a e fale ‘o ‘Isileli. 2Ko eni ‘a e folofola ‘a Sihova, ‘Oua te mou fakamaheni mo e ‘alunga ‘o e ngaahi pule‘anga, pea ‘oua te mou mo‘utāfu‘ua ‘i he ngaahi faka‘ilonga ‘oku hā ‘i he langi; koe‘uhi pē ‘oku mo‘utāfu‘ua ai ‘a e ngaahi pule‘anga. 3He ko e ngaahi tu‘utu‘uni ‘a e ngaahi kakai ko e muna pē: he ko e ‘akau ena na‘e tā mei he vao, ko e ngāue na‘e fai ‘e he tufunga ‘aki ‘a e toki. 4‘Oku nau teu ‘aki ‘a e siliva mo e koula; ‘oku nau fakama‘u ‘aki ‘a e fa‘o mo e hāmala, ke ‘oua na‘a ngaueue. 5‘Oku hangē ha pou ‘oku tātā ke fuopotopoto, ‘a e fa‘ahinga ko ia, pea ‘oku ‘ikai te nau lava ke lea; kuo pau ke mātu‘aki fua kinautolu, he ‘oku ‘ikai te nau lava ke ha‘ele. ‘Oua te ke manavahē kiate kinautolu; he ‘e ‘ikai te nau fai ha kovi kiate koe, pea ‘e ‘ikai foki te nau lava ke fai ha lelei. 6Hono kākunga ha taha ke tatau mo koe, ‘e Sihova? ko e lahi koe, pea ‘oku lahi ‘a e ngū ‘o ho huafa. 7Ko hai ‘e ‘ikai manavahē ki he ‘Afiona, ‘a e Tu‘i ‘o e ngaahi pule‘anga?#Fkhā 15.4 he ‘oku ‘o‘ou pē ia: he ka sivi ‘a e kau poto ‘o e ngaahi fa‘ahinga, mo honau ha‘a tu‘i, hono kākunga ha taha ke tatau mo e ‘Afiona? 8Ka ko e koto fakamanu mo e koto fakasesele ‘a e fa‘ahinga ko ia: ko e akonaki ‘a e ngaahi ‘ata‘i me‘a ko ē, ko e ‘akau pē ia.#10.8 ko e akonaki… ia; pe Ko e hā te nau ako mei ha ngaahi ‘aitoli ‘akau?. 9Ko e siliva ē kuo tuki ke manifi; na‘e ‘omi mei Tāsisi ia, pea ko e koula mei ‘Ūfasi; ko e ngāue ‘a e tufunga, mo e fīta‘a ‘a e tama haka: ko honau kofu ko e lanu langi mo e kula po‘upo‘uli; ko e ngāue ‘a e kau poto honau kotoa. 10Ka ko Sihova ko e ‘Otua mo‘oni; ko ia ia ‘a e ‘Otua Mo‘ui, pea ko e Tu‘i Ta‘engata: ‘oku tete ‘a māmani ‘i he‘ene tuputāmaki, pea ‘oku ‘ikai matu‘uaki ‘a e ngaahi pule‘anga ‘a e mahua mai ‘ene houhau.
11Te mou lea pehē kiate kinautolu, Ko e ngaahi ‘otua ‘a ia na‘e ‘ikai te nau ngaohi ‘a langi mo e fonua, ‘e ‘auha ‘a e fa‘ahinga ko ia mei māmani, pea mei he lalo langi.
Ko ha Himi Fakahīkihiki‘i ‘o e ‘Otuá
12‘a e ‘Afio na‘a ne ngaohi ‘a e fonua ‘aki hono ivi, na‘a ne fokotu‘u ‘a e maama nofo‘anga ‘aki ‘ene poto, pea ‘i he fai‘aki hono ‘atamai na‘a ne fola ‘a e ngaahi langi: 13‘i he ongo mai ‘a e mana, ‘oku ō mo ‘ene ‘atu ‘a e fu‘ufu‘unga vai ‘i he langi,#10.13 vai ‘i he langí; Vakai kia Sēn 1.6–8. ‘oku ne fai ke ‘alu hake ‘a e loa mei he tafa‘aki langi; ‘oku ne ngaohi ‘uhila ke ‘omi ‘uha, pea ‘oku ne tuku atu ‘a e matangi mei hono fale koloa. 14Kuo hoko ‘o fakamanu ‘a e tangata kotoa ko ‘ene ta‘e‘ilo: ‘oku fakamaa‘i kotoa ‘a e tama haka koe‘uhi ko e ‘īmisi; he ko e me‘a kuo ne haka ko e loi, pea ‘oku ‘ikai ha laumālie ‘i ai. 15Ko e koto muna kinautolu, ko e ngāue ke kakae‘i: ka hoko honau taimi ‘eke, te nau ‘auha. 16Tala‘ehai ‘oku pehē ‘a e ‘inasi ‘o Sēkope; he ko e Ngaohi ‘o e me‘a kotoa pē ‘a ‘Ene ‘Afio, pea ko ‘Isileli ‘a e matakali ‘oku ne tofi‘a ‘aki: ko Sihova Sāpaoti hono huafa.
Ko e Tu‘unuku mai ‘a e Nofo Fakahē
17Fakamā‘opo‘opo ho‘o kofukofu, ‘o to‘o mei he kelekele, si‘i fefine ‘oku nofo ‘ākolo‘i. 18He ko eni ‘a e folofola ‘a Sihova, Ko au eni ‘oku ou fakapuna atu he taimi ko eni ‘a e nofo he fonua ni; pea te u faka‘efihi kinautolu ke ma‘u.
19‘Oiauē kita hoku maumau ni! kuo o‘o hoku tā: ka u pehē ‘e au, ‘Ā, ko e mahaki mo‘oni eni, ka u kātaki pē. 20Ko hoku tēniti kuo vetea, pea ko ‘eku ngaahi maea kuo motu: ko ‘eku fānau kuo nau ‘alu atu, pea kuo ‘ikai: ‘oku ‘ikai toe ha taha ke folahi hoku tēniti, pea ‘ai hoku ngaahi tupenu. 21He kuo hoko ‘o anga fakamanu ‘a e kau tauhi, pea ko Sihova kuo ‘ikai te nau kumi ki ai: ko ia ‘oku ‘ikai te nau fai fakapotopoto ai, pea kuo movete honau tākanga kotoa. 22Sī, ko e ongoongo ē! vakai ‘oku ha‘u mo e fu‘u ngāue mei he fonua tokelau, ke ngaohi ‘a e ngaahi kolo ‘o Siuta ko e lala, ko e nofo‘anga ‘o e fanga siakali. 23‘Oku ou ‘ilo, ‘e Sihova, ‘oku ‘ikai ‘i he tangata hono hala: ‘oku ‘ikai ‘i he tangata ‘oku hā‘ele ke faka‘uli ‘ene ‘alu. 24Akonaki‘i au, ‘e Sihova, kae fai ‘o taau mo e lao; ‘oua ‘e fai‘aki ho houhau, na‘a ku hoko ko e noa ‘i ho‘o ngāue. 25Lilingi ho‘o kakaha na ki he Senitaile ‘oku ‘ikai te nau ‘ilo koe, pea ki he ngaahi fa‘ahinga ‘oku ‘ikai te nau hu‘ekina ho huafa: he ‘oku nau keina ‘a Sēkope, ‘io, kuo nau keina ia ‘o faka‘osi, pea kuo nau lafulua hono kainanga-‘a-manu.
Currently Selected:
KO SELEMAIA 10: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
