KO SELEMAIA 49
49
Ko e Fakamāu‘i ‘o e Kakai ‘Āmoní
1KO E me‘a ki ha‘a ‘Āmoni. Ko e folofola eni ‘a Sihova, ‘Oku ‘ikai koā ha hako ‘o ‘Isileli? ‘O ‘ikai koā ha ‘ea kiate ia? Pea ko e hā ai ‘oku ‘ea ‘a Milikomi kia Kata, pea ‘oku nofo hono kakai ‘i hono ngaahi kolo? 2Ko ia, vakai, ‘oku hoko mai ha taimi–ko Sihova eni mei he Ta‘ehāmai–te u tuku ke ongo mai ha kailatau ki Lapa ‘a Ha‘a ‘Āmoni; pea te ne hoko ko e tuva maumau, pea ko hono ngaahi kolo fakaongo ‘e tutu ‘aki ‘a e afi: pea ‘e ‘ea ‘a ‘Isileli kiate kinautolu na‘e ‘ea kiate ia–ko Sihova ia mei he Ta‘ehāmai.
3Tangi ‘oiauē, si‘i Hesiponi, he kuo vete ‘a ‘Ai;
‘Ioho, ‘a e fānau fefine ‘a Lapa,
‘Ai tauanga‘a: tangilāulau mo lele holo ‘i he ngaahi loto‘ā;
He ‘oku ‘alu pōpula ‘a Milikomi,
Fakataha mo hono kau taula‘eiki mo hono hou‘eiki.
4Ko e hā ‘oku ke pōlepole ai ‘i he ngaahi lautoka? ‘oku ‘auhia atu ho lautoka ‘o‘ou, si‘i ta‘ahine fakaholomui; ‘a koe na‘e falala ki ho‘o ngaahi fokotu‘unga koloa, ‘o ke pehē, Ko hai ‘e a‘u kiate au? 5Ko au eni ‘oku ou ‘omi kiate koe ha ilifia ki he kakai kotoa ‘oku nofo takatakai kiate koe–ko e folofola ia mei he Ta‘ehāmai ‘a ‘Ātonai Sihova Sāpaoti–pea ‘e fakateka hakefua kimoutolu tāutaha, pea ‘e ‘ikai ha taha ke tānaki ‘a e kau hola.
6Kae hili ‘ene pehē, te u fakafoki ‘a e pōpula ‘a Ha‘a ‘Āmoni–ko Sihova ia mei he Ta‘ehāmai.
Ko Hono Fakamāu‘i ‘e Sihova ‘a ‘Ītomi
7Ko e me‘a ki ‘Ītomi.
Ko e folofola eni ‘a Sihova Sāpaoti. ‘oku ‘ikai koā ha poto ‘i Tīmani? Kuo ‘osi koā ‘a e fale‘i mei he kau ‘atamai? Kuo mahua ‘enau poto?#‘Ais 34.5-17; 63.1-6; ‘Isi 25.12-14; 35.1-15; ‘Ēmosi 1.11-12; ‘Opa 1-14; Mal 1.2-5 8Mou hola, mou tafoki atu, foa hamou tafu, ‘a e nofo Tētani; he ‘oku ou ‘omi kiate ia ‘a e mala ‘o ‘Īsoa, ‘a e taimi ‘o hono ‘a‘ahi. 9Kapau ‘e ha‘u ‘a e kau toli kālepi kiate koe, ‘ikai te nau fakatoe ha moveve? Ka ko ha kaiha‘a he po‘uli, te nau ‘ave pē ‘o fe‘unga pē mo kinautolu. 10Ka ko au#49.10 ‘ikai… Ka ko au; pe ‘oku ‘ikai te nau fakatoe ha me‘a… ‘oku nau toli ‘osi. Ko ia. kuo u tū‘ulu ‘a ‘Īsoa, kuo u tatala hono ngaahi toitoi‘anga, pea te ne toitoi ai, ‘o ‘ikai lava ke fufū: kuo maumau hono hako, mo hono kāinga, mo hono kau nofo‘anga, pea ‘oku ‘ikai ia. 11Tuku li‘aki pē ho‘o fānau tamai mate, te u tauhi ‘enau mo‘ui ‘e au; pea ke falala kiate au ‘e ho‘o kau uitou.
12He ko e folofola eni ‘a Sihova: Vakai, ko e fa‘ahinga ko ē na‘e ‘ikai hoa mo honau konisitūtone ke inu ‘i he ipu, ka kuo pau te nau inu ia; pea ko e taha koe ke ‘alu ta‘etautea ‘aupito? ‘e ‘ikai te ke ‘alu ta‘etautea, ka te ke mātu‘aki inu pē. 13He kuo u fuakava ‘iate au–ko Sihova eni mei he Ta‘ehāmai–‘e hoko ‘a Pōsila ko e me‘a ke fai ai ha ofo, mo ha manuki, ‘e hoko ko e ka‘anga, ko e me‘a ke fai ai ha kape; pea ko hono ngaahi kolo kotoa ‘e hoko ko e koto ka‘anga ‘o ta‘engata.
14Kuo u ma‘u ha ongoongo meia Sihova,
Pea kuo tuku atu ha talafekau ki he ngaahi pule‘anga,
Mou tānaki fakataha, pea ‘alu hake kiate ia;
‘Io, mou tu‘u pē ke fai ha tau.
15He vakai kuo u ngaohi koe ko e momo‘i me‘a ki he ngaahi pule‘anga,
Ko e ta‘etoka‘i ‘e he tangata.
16Ko e tu‘u ho nofo‘anga ‘i lelenga
Ko ia kuo takihee‘i koe ‘e ho lotolahi,
‘A koe ‘oku nofo ‘i he ngaahi ava‘i maka ‘o Sela,
‘A koe ‘oku puke ‘a e ngaahi talitau‘anga ‘o e mo‘unga:
Neongo ho‘o ngaohi ho pununga ke mā‘olunga hangē ko e ‘īkale,
Te u ‘ohifo koe mei ai–
Ko Sihova ia mei he Ta‘ehāmai. 17Pea ‘e hoko ‘a ‘Ītomi ko e me‘a ke fai ai ha ofo; ‘ilonga ha taha ‘e laka ofi ai te ne ofo, mo faka‘ise‘isa ‘i he ngaahi fu‘u tā kuo fai kiate ia. 18Hangē ko e fulihi ‘o Sōtoma mo Kōmola, mo e ongo kolo na‘a na kaungā nonofo–ko Sihova eni ‘oku folofola mai–‘e ‘ikai nofo ai ha taha, pea ‘e ‘ikai ‘āunofo ki ai ha hako‘i tangata.#Sēn 19.24-25 19Vakai, te ne ‘alu hake hangē ha laione mei he lāngilangi ‘o Soatani ki ha kaikai‘anga tu‘u ma‘u: ka ko e kemo te u fakalili ia mei ai, pea ‘ilonga ha taha kuo fili, te u fokotu‘u ia ke pule ki ai: he ko hai ‘oku tatau mo au? Pea ko hai te ne tu‘utu‘uni ha taimi ke u hopo? Pea ko hai tū ha tauhi manu te ne tu‘u kiate au?
20Ko ia, fanongo ā ki he fakakaukau ‘a Sihova,
‘A ia kuo ne fakakaukau ke fai ki ‘Ītomi;
Pea mo ‘ene ngaahi tu‘utu‘uni
Kuo ne tu‘utu‘uni ke fai ki he nofo Tīmani:
Kuo pau te nau fehae kinautolu, ‘a e fanga ki‘i me‘a ‘o e tākanga;
Kuo pau te ne ‘ai ke ofo honau kaikai‘anga ‘iate kinautolu.
21‘Oku tete ‘a māmani ‘i he longoa‘a ‘o ‘enau tō;
‘Oku ai ha ‘ioho ‘oku ongo mai ki he Tahi Kulokula.
22Vakai, te ne ‘alu hake ‘o puna hangē ha ‘īkale,
Pea te ne folahi hono kapakau ki Pōsila:
Pea ko e loto ‘o e kau mafi ‘o ‘Ītomi ‘oku hoko ‘i he ‘aho ko ia,
‘O hangē ko e loto ‘o ha fefine ‘oku langā.
Ko Hono Fakamāu‘i ‘e Sihova ‘a Tāmasikusi
23Ko e me‘a ki Tāmasikusi,
Kuo fakamaa‘i ‘a Hēmati mo ‘Āpati;
He kuo nau fanongo ki ha ongoongokovi,
Kuo nau hoko ‘o vai:
Ko e hoha‘a hangē ko e tahi
‘Oku ‘ikai ke manonga.#49.23 ‘Oku… manonga; pe ‘oku ai ha hoha‘a ‘i he tahi. #‘Ais 17.1-3; ‘Ēmosi 1.3-5; Sāk 9.1
24‘Oku malūmaea ‘a Tāmasikusi,
Kuo tafoki ia ke hola,
Ka ‘oku puke ia ‘i he tete;
Kuo ma‘u ia ‘e he mamahi mo e langa,
Hangē ha fefine fā‘ele.
25Fēfē ‘a e ‘ikai li‘aki ‘a e kolo fakamālō‘ia, ‘a e kolo ‘o ‘eku fiefia?#49.25 ‘o ‘eku fiefia; Ko hono faka-Hepeluú ia, ka ‘oku pehē ‘i hono ngaahi hiki fuoloa ‘e ni‘ihi: fiefia. 26Ko ia, ‘e tō ‘ene kau talavou ‘i he ngaahi mala‘e, pea ‘e fakalongo hono kau tangata tau ‘i he ‘aho ko ia–ko e folofola ia mei he Ta‘ehāmai ‘a Sihova Sāpaoti. 27Pea te u tutu ha afi ‘i he ‘ā ‘o Tāmasikusi, pea te ne keina ‘a e ngaahi palasi ‘o Penihētati.
Ko Hono Fakamāu‘i ‘o e Matakali Keta mo e Kolo ko Hasoa
28Ko e me‘a ki Keta mo e ngaahi pule‘anga ‘o Hasoa,
‘A ia na‘e taa‘i ‘e Nepukanesa ko e Tu‘i Pāpilone.
Ko e folofola eni ‘a Sihova,
Mou tu‘u, ‘alu hake ki Keta,
Pea vete ‘a e kakai Hahake.
29Ko honau ngaahi tēniti, mo ‘enau fanga sipi mo kosi te nau puke ki ai, ko honau tapoleni mo ‘enau nāunau kotoa mo ‘enau fanga kāmeli te nau fetuku ma‘anautolu: pea te nau kalanga kiate kinautolu, Ha‘o ‘aki ‘a e ilifia!
30Mou hola, hē ke mama‘o.
Foa hamou tafu, ‘a e nofo Hasoa–ko Sihova ia mei he Ta‘ehāmai–he ‘oku ai ha fakakaukau ‘a Nepukanesa ko e Tu‘i Pāpilone ke fai kiate kimoutolu, ‘io, kuo ne tu‘utu‘uni ha tu‘utu‘uni kiate kimoutolu.
31Mou tu‘u, ‘alu hake ki ha pule‘anga nofo fiemālie mo nofo falala–
Ko e fa‘ahinga ‘oku ‘ikai hanau matapā, pe ‘akau fakama‘u;
‘Oku nau nofo fakaekinautolu–
ko Sihova ia mei he Ta‘ehāmai. 32Pea ko ‘enau fanga kāmeli ē te mou fa‘ao, pea ko ‘enau fu‘ufu‘unga monumanu ē ma‘amou vete; pea te u punakaki kinautolu ki he feitu‘u matangi kotoa pē, ‘a e ha‘a kosi fakatuliki; pea te u ‘omi honau mala mei honau ngaahi tafa‘aki kotoa–ko Sihova ia mei he Ta‘ehāmai. 33Pea ‘e hoko ‘a Hasoa ko e nofo‘anga ‘o e fanga siakali, ko e lala ‘o ta‘engata: ‘e ‘ikai nofo ai ha taha, pea ‘e ‘ikai ‘āunofo ki ai ‘a e hako‘i tangata.
Ko Hono Fakamāu‘i ‘e Sihova ‘a ‘Īlami
34Ko e me‘a na‘e hoko kia Selemaia ko e palōfita, ko e folofola ‘a Sihova na‘e kau ki ‘Īlami, ‘i he taimi ki mu‘a ‘o e pule ‘a Setekaia ko e Tu‘i Siuta, ‘o pehē, 35Ko e folofola eni ‘a Sihova Sāpaoti, Ko au eni ‘oku ou maumau‘i ‘a e kaufana ‘a ‘Īlami, ko e mata ‘o honau mālohinga. 36Pea te u ‘omi ki ‘Īlami ha matangi ‘e fā mei he tapa ‘e fā ‘o e langi, pea te u punakaki kinautolu ‘i he ngaahi matangi ko ia kotoa; pea ‘e ‘ikai ha pule‘anga ‘e ta‘ea‘u ki ai ha ni‘ihi ‘Īlami kuo sese‘e. 37Pea te u fakamo‘utāfu‘ua ‘a ‘Īlami ‘i he ‘ao ‘o honau ngaahi fili, pea ‘i he ‘ao ‘o e kakai ‘oku kumi ‘enau mo‘ui: pea te u ‘omi kiate kinautolu ha kovi, ko e kakaha ‘o ‘eku ‘ita–ko Sihova ia mei he Ta‘ehāmai–pea te u fekau atu ‘a e heletā ke tuli kiate kinautolu kae‘oua ke nau ‘osi. 38Pea te u fokotu‘u ‘eku taloni ‘i ‘Īlami, pea te u fai mei ai ‘eku faka‘auha tu‘i mo hou‘eiki–ko Sihova ia mei he Ta‘ehāmai. 39Ka ‘oka faifai pea ‘osi hono taimi, te u fakafoki ‘a e pōpula ‘o ‘Īlami–ko Sihova ia mei he Ta‘ehāmai.
Currently Selected:
KO SELEMAIA 49: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
