KO SELEMAIA 48
48
Ko Hono Faka‘auha ‘o Moape
1KO E me‘a ‘oku kau ki Moape. Ko e folofola eni ‘a Sihova Sāpaoti, ko e ‘Otua ‘o ‘Isileli:#‘Ais 15.1–16.14; 25.10-11; ‘Isi 25.8-11; ‘Ēmosi 2.1-3; Sef 2.8-11 ‘Oiauē ‘a Nipo! he kuo maumau; ko Kiliataimi kuo fakamaa‘i, kuo kapa: kuo fakamaa‘i ‘a e palatou, pea kuo mo‘utāfu‘ua. 2‘Oku ‘ikai kei ‘i ai ‘a e lāngilangi ‘o Moape; ‘i Hesiponi ‘oku nau fakakaukau kovi ke fai kiate ia: Tau ō ‘o tu‘usi ia mei he‘ene pule‘anga. Ko koe foki, Matameni, ‘e fakasīlongo‘i; ‘e tuli ‘a e heletā kiate koe.
3Sī! ko e kaila ē mei Holonaimi,
Ko e maumau mo e faka‘auha ko e me‘a lahi!
4Kuo ‘auha ‘a Moape;
Kuo nau fakaongo atu ‘enau tangi ‘o a‘u ki Soa.#48.4 pe ko e tangi ‘a e fanga tamaiki.
5He ‘oku nau hake ‘i he hakenga ‘o Lūhiti,
Mo e tangi pē, tangi pē;
He ‘i he hifonga ‘o Holonaimi,
Na‘a nau fanongo ki he fakamamahi ‘o e tangi ‘i he maumau.
6Hola, fakahaofi ho‘omou mo‘ui;
Ka mou hoko ‘o hangē ko e ‘āunoa ‘i he toafa.
7He ko e me‘a ‘i he tu‘u ho‘o falala ‘i ho‘o ngaahi ngāue, pea ‘i ho‘o ngaahi fokotu‘unga koloa, ko ia ‘e puke mo koe foki; pea ‘e ‘alu pōpula ‘a Kīmosi, fakataha mo hono kau taula‘eiki mo hono hou‘eiki. 8Pea ‘e ha‘u ‘a e tama vete ki he ngaahi kolo kotoa, pea ‘e ‘ikai ha kolo ‘e hao; pea ‘e ‘auha ‘a e talalo, pea ‘e maumau ‘a e tafangafanga, hangē ko e folofola ‘a Sihova. 9‘Ange kapakau ki Moape, he kuo pau ke ne hola ‘o ‘alu: pea ko hono ngaahi kolo ‘e hoko ko e lala, ‘o ‘ikai ha taha ‘e nofo ai.
10Mala‘ia ā ka ko ia ‘oku fakamu‘omu‘a nima ‘a e ngāue ‘a Sihova, Mala‘ia ā ka ko ia ‘oku ne ta‘ofi ‘ene heletā mei he toto.
Ko Hono Faka‘auha ‘o e ngaahi Kolo ‘o Moapé
11Kuo nofo fiemālie ‘a Moape talu ‘ene talavou, pea ‘oku ne nofo mo hono totoka ta‘eue‘i, pea na‘e ‘ikai felingiaki mei he hina ki he hina, pea na‘e ‘ikai ‘alu pōpula: ko ia ‘oku tu‘u ma‘u hono ifo, pea kuo ‘ikai liliu hono nanamu.
12Ko ia, vakai, ‘oku ha‘u ha taimi–ko Sihova ia mei he Ta‘ehāmai–te u fekau ai kiate ia ha kau lilingi, pea te nau lilingi ia; pea te nau fakamaha ‘ene ngaahi ipu, mo laiki ‘enau ngaahi hina. 13Pea ‘e maa‘i ‘e Moape ‘a Kīmosi, hangē na‘e maa‘i ‘e ha‘a ‘Isileli ‘a Pēteli ko honau falala‘anga. 14‘Oku mou lava fēfē ke lau, Ko e kau mafi kimautolu, pea ko e kakai fita ‘i he fai tau? 15Ko Moape ē kuo faka‘auha, pea ‘oku kapa hono ngaahi kolo, pea ko e lelei ‘o hono kau talavou kuo ‘alu hifo ki he tāmate‘i–ko e Hau ia mei he Ta‘ehāmai; ko Sihova Sāpaoti hono huafa. 16Ko e mala ‘o Moape ‘oku panaki mai, pea ‘oku fakalili ‘aupito hono kovi. 17Mou fakamamahi koe‘uhi ko ia, ‘a e ngaahi feitu‘u takatakai ki ai, ko kimoutolu kotoa ‘oku ‘ilo hono hingoa, mou pehē,
Hono kuo maumau ‘a e mātā mālohi,
‘A e sēpita faka‘ofo‘ofa!
18Si‘i ta‘ahine Tīponi ‘oku nofo fonua,
‘Alu hifo mei ho lāngilangi na, ‘o nofo he fie inua;
He kuo ‘alu hake kiate koe ‘a e tama vete ‘o Moape,
Kuo ne maumau ho ngaahi talitau‘anga.
19Si‘i nofo ‘Aloeli, tu‘u ‘i he hala, ‘o lama:
Fehu‘i ki he hola mai, mo e fefine kuo hao;
Lea ki ai, Ko e hā ‘a e me‘a kuo hoko?
20Kuo fakamaa‘i ‘a Moape, he kuo li‘aki:
Tangi ‘oiauē, mo ‘ioho;
Tala ‘i ‘Alanoni kuo vete ‘a Moape.
21Pea kuo hoko ‘a e tautea totonu ki he fonua palatou,
Ki Hōloni, pea ki Siahasa, pea ki Mefa‘ati.
22Pea ki Tīponi, pea ki Nipo, pea ki Petetipilataimi.
23Pea ki Kiliataimi, pea ki Petekamuli pea ki Petemeoni.
24Pea ki Kilioti, pea ki Posila,
Pea ki he ngaahi kolo ‘o e fonua ko Moape, ‘a e mama‘o mo e ofi.
25Kuo motuhi ‘a e nifo ‘o Moape, pea kuo fasi hono nima ko Sihova ia mei he Ta‘ehāmai.
Ko Hono Fakamo‘ulaloa‘i ‘o Moape
26Mou ‘ai ke ne konā, he kuo ne fakafuofuolahi kia Sihova: koe‘uhi ke fālai ‘a Moape ‘i he‘ene lua, ‘o ne hoko mo ia foki ko e manukia. 27He ‘ikai na‘e nofo ‘a ‘Isileli ko e me‘a ‘oku ke manuki ki ai? na‘e ‘ilo ia koā ‘oku ne ō mo e kau kaiha‘a? he ka ai ha‘o lau ki ai, ‘oku ke kalo ‘ulu.
28‘a e kau nofo Moape, li‘aki ‘a e ngaahi kolo,
‘O nofo ‘i he makatu‘u;
Pea mou hoko ‘o hangē ko e lupe
‘Oku ngaohi hono pununga ‘i he potu ki kō ‘o e ngutu luo.
29Kuo tau fanongo ki he mahiki ‘a Moape,
‘O fu‘u fakatuputupulangi;
‘Ene fielahi, mo ‘ene mahiki, mo ‘ene pupula,
Mo ‘ene loto hīkisia.
30‘Oku ou ‘ilo ‘e au–ko Sihova eni mei he Ta‘ehāmai–‘ene fa‘a ‘ita, mo ‘ene lea‘aki ‘a e ngaahi me‘a ‘oku ‘ikai ko ia; ‘oku nau fai ‘a e ngaahi ngāue ‘oku ‘ikai mo‘oni.
31Ko ia, te u tangi ‘oiauē koe‘uhi ko Moape,
‘Io, te u ‘ioho koe‘uhi ko Moape kātoa;
‘Oku nau hanu koe‘uhi ko e kakai ‘o Kilihelesi.
32Ko ia, te u tangi ma‘au, si‘i vaine ‘o Sīpima,
‘O hulu ‘i he tangi ‘o Siasea:
‘A koe kuo laka ki tu‘a tahi ho ta‘otupu,
‘Io, kuo nau a‘u ki he tahi ‘o Siasea:
Kuo tō kovi ‘a e tama vete ki he toli ‘o e to‘ukai fua‘i‘akau,
Mo e to‘ukai kālepi.
33Pea kuo ‘ave ‘a e fiefia mo e tome‘e
Mei he tokanga ngoue, pea mei he fonua ‘o Moape;
Pea kuo u ‘ai ke ‘ikai ha uaine ‘i he ngaahi tata‘o‘anga:
‘E ‘ikai te nau malaki mo e tau‘a‘alo;
Ko e tau‘a‘alo ‘oku ongo mai ‘oku ‘ikai ko e tau‘a‘alo ko ē.
34Ko e tangi ‘a Hesiponi ‘oku a‘u ki ‘Eleale,#48.34 Ko e tangi… Eleale; ‘Oku ‘ikai ke mahino ‘a hono faka-Hepeluú, ka ‘oku ngali tonu hono hiki ‘o: ‘Oku hiki e tangi ‘a Hesiponi mo ‘Eleala.
‘Oku nau tukuna hake ke a‘u ki Siahasa,
‘Io, ke a‘u mei Soa ki Holonaimi, ki ‘Ekilati Tu‘otolu:
He na‘a mo e vai ‘o Nimilimi kuo pau ke koto ‘āngoa.
35Pea te u ‘ai ke ‘ikai kei toe ‘i Moape ha taha ‘oku fai feilaulau ‘i he sia, pe ha taha ‘oku tutu ‘inisēnisi ki hono ngaahi ‘otua–ko Sihova ia mei he Ta‘ehāmai.
36Ko ia, ‘oku tokomohū hoku loto hangē ni fangufangu,
Koe‘uhi ko Moape,
‘Io, ‘oku tokomohū hoku loto hangē ni fangufangu,
Koe‘uhi ko e kau tangata ‘o Kilihelesi,
Koe‘uhi ā foki ko e toe ‘o e me‘a na‘a ne ma‘u kuo mole.
37He ko e ‘ulu kātoa ko e koto tekefua,
Pea ko e kava kotoa kuo kosi:
‘I he nima kotoa ‘oku hā ‘a e koto matu‘utu‘u,
Pea ‘i he kongaloto ‘a e tauanga‘a.
38‘I he ngaahi tu‘a fale ‘o Moape mo hono ngaahi mala‘e,
Ko e koto tēngihia pē.
He kuo u maumau‘i ‘a Moape hangē ha ipu ‘oku ‘ikai ha manako ai–
Ko Sihova ia mei he Ta‘ehāmai.
39Hono kuo laiki! ‘oku nau tangi ‘oiauē.
Hono kuo sītu‘a ‘a Moape ko ene mā!
Pea kuo hoko ‘a Moape ko e me‘a ke manukia
Mo mo‘utāfu‘ua ai ‘a e kakai ‘oku nofo takatakai.
‘Oku ‘Ikai ha Haofanga ‘o Moape
40He ko e folofola eni ‘a Sihova,
Vakai, te ne puna hangē ha ‘īkale, ‘o folahi hono kapakau ‘i Moape.
41Kuo kapa ‘a Kilioti,
Pea kuo puke ‘a e ngaahi talitau‘anga,
Pea ko e loto ‘o e kau mafi ‘o Moape ‘i he ‘aho ko ia
‘Oku hangē ko e loto ‘o ha fefine ‘oku langā.
42Pea kuo ‘auha ‘a Moape mei he‘ene nofo ko e kakai, he kuo ne fakafuofuolahi kia Sihova. 43‘Oku tu‘unuku kiate koe, ‘a e nofo Moape, ‘a e fakalilifu mo e luo mo e hele–ko Sihova ia mei he Ta‘ehāmai. 44Ko ia ‘oku hola telia ‘a e fakalilifu, ‘e tō ia ki he luo; pea ko ia ‘oku lava hake mei he luo, ‘e ma‘u ‘e he hele: he ‘oku ou ‘omi kiate ia, ‘io, ki Moape, ‘a honau ta‘u ‘eke–ko Sihova ia mei he Ta‘ehāmai.
45‘Oku mo‘utu‘ua ‘a e kau hola ‘i tua‘ā Hesiponi kuo ‘osi honau ivi:
He ‘oku ‘alu atu ha afi mei Hesiponi,
Mo ha maama mei he ‘ao ‘o Sīhoni,#48.45 Hesiponi kuo ‘osi… Sīhoni; pe kuo ‘osi honau ivi; ko e kolo ia na‘e pule ai ‘a e tu‘i ko Sīhoni, ka kuo vela ia.
Pea te ne keina ‘a e tuliki ‘o Moape,
Mo e tumu‘aki ‘o ha‘a anga makaka.
46‘Oiauē koe, Moape!
Kuo ‘auha ‘a e kainanga ‘o Kīmosi;
He kuo ‘ave pōpula ho‘o fānau tangata,
Pea kuo pōpula ho‘o fānau fefine.
47Ka te u fakafoki ‘a e pōpula ‘o Moape ‘oka ‘osi ‘a e taimi–ko Sihova ia mei he Ta‘ehāmai. Ngata ai ‘a e fakamaau ‘o Moape.
Currently Selected:
KO SELEMAIA 48: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
