KO SELEMAIA 46
46
Ko Hono Ikuna‘i ‘o ‘Isipite ‘i Kalikimisi
1KO E me‘a na‘e hoko kia Selemaia ko e palōfita, ko e folofola ‘a Sihova na‘e kau ki he ngaahi pule‘anga. 2Ko e me‘a ki ‘Isipite: ‘o kau ki he tau ‘a Felo-Neko ko e Tu‘i ‘Isipite, ‘a ia ‘oku ‘i he ve‘e vaitafe ko ‘Eufaletesi, ‘i Kalikimisi, ‘a ia na‘e taa‘i ‘e Nepukanesa ko e Tu‘i Pāpilone, ‘i hono ta‘u fā ‘o Sihoiakimi foha ‘o Siosaia, ko e Tu‘i Siuta.#‘Ais 19.1-25; ‘Isi 29.1–32.32
3To‘o pā mo e fakaū, pea faka‘otu, pea fakaofi ki he tau.
4No‘otaki ‘a e fanga hoosi, pea heka ‘a e kau heka hoosi,
Pea faka‘otu mai mo e tatā tau:
Fakamata tao; tui kofu tau,
5Ko e hā ‘oku hā pehē ai ki he‘eku sio?
‘Oku ‘ohovale ‘a e fa‘ahinga ko ē,
‘Oku nau sītu‘a, pea ko honau kau to‘a kuo laiki,
Pea ‘oku nau hola makifu,
‘O ‘ikai te nau toe hanga tau:
‘Oku ha‘o kinautolu ‘e he ilifia–
Ko Sihova ia mei he Ta‘ehāmai.
6‘Oua ‘e hola ‘a e matakiva‘e,
Pea ‘oua ‘e fakapuke ‘a e to‘a:
‘I he potu noate, ‘i he ve‘e vai ko ‘Eufaletesi,
Kuo nau humu, pea tō.
7Ko hai ena ‘oku hake hangē ko Naila?
‘Oku peau tā hono ngaahi vai hangē ni ngaahi vaitafe?
8Ko ‘Isipite ia ‘oku hake mai hangē ko Naila,
Pea peau tā hono vai hangē ni ngaahi vaitafe;
Pea ‘oku ne lau, Te u ‘alu hake, te u ‘ufi‘ufi ‘a e fonua,
Te u laiki ‘a e kolo mo e nofo ai.
9‘Alu hake pē, fanga hoosi;
Pea tatele atu, ‘a e ngaahi sāliote;
Pea mou hū kitu‘a, ‘a e kau to‘a:
Kau ‘Itiopea#46.9 ‘Itiopea; Vakai ki he “Ngaahi Huluhulu”. ē, mo e kau Futi ‘oku to‘o fakaū,
Mo e kau Luti ‘oku puke mo teke kaufana.
10Ka ko e ‘aho ko ia ‘oku ‘a ‘Ātonai Sihova Sāpaoti,
Ko e ‘aho sauni, ke ne fai sauni ki hono ngaahi fili:
Pea ‘e keina ‘e he heletā, ‘o mākona,
Pea te ne inu fakaputa honau toto:
He ‘oku ai ha feilaulau ‘a ‘Ātonai Sihova Sāpaoti
‘I he fonua tokelau, ‘i he vaitafe ko ‘Eufaletesi.
11‘Alu hake ki Kiliati,#46.11 Kiliati; Vakai ki he 8.22. ‘o ma‘u paame,
Si‘i ta‘ahine ‘Isipite na‘e tāupo‘ou:
Ko e kulanoa ho‘o fakalahi faito‘o,
‘Oku ‘ikai ha feau ma‘au.
12Kuo fanongo ‘e he ngaahi pule‘anga ki ho fakamaa‘i,
Pea ‘oku ongoonga‘a ho‘o tangi ‘oiauē ki māmani kātoa:
He ‘oku fehumuhumuki ‘a e to‘a mo e to‘a,
‘O na fakatou tō.
Ko e A‘u Mai ‘a e Tu‘i ko Nepukanesá
13Ko e folofola na‘e fai ‘e Sihova kia Selemaia ko e palōfita ki he ha‘u ‘a Nepukanesa ko e Tu‘i Pāpilone ke taa‘i ‘a ‘Isipite:#Sel 43.10-13
14Tala ‘i ‘Isipite, pea fanongonongo ‘i Mikitoli,
‘Io, fanongonongo ‘i Nofi mo Tapanesi:
Mou lau ‘o pehē, Fokotu‘u mai, ‘o teuteu;
He ‘oku keina ‘e he heletā, ‘o takatakai koe.
15Ko e hā kuo lingina ai ho‘o kau mafi?
Na‘e ‘ikai te nau lava ke tu‘u,
He kuo fai hono fakateki‘i ‘e Sihova.
16Na‘a ne fakalahi ‘a e humu,#46.16 Na‘á ne fakalahi ‘a e humú; ‘Oku ‘ikai ke mahino ‘a hono faka-Hepeluú, ka ‘oku ngali tonu hono hiki ‘o: Ko ho‘o kau sōtiá kuo humu ‘o tō ki lalo.
Na‘e feta‘ota‘omi foki ‘a e taha ‘i he taha.
Ko ia, ‘oku nau pehē, Tu‘u, ka tau foki ki hotau kakai,
Pea ki he fonua na‘e fanau‘i ai kitautolu,
Telia ‘a e heletā lolololo.
17Na‘a nau kalanga ‘i he potu ko ia,
“Ko Felo ko e Tu‘i ‘Isipite ko e longoa‘a pē:
Kuo ne tuku ke mole ‘a e taimi tu‘utu‘uni.”
18Tangi ‘eku mo‘ui–ko e folofola ia mei he Ta‘ehāmai ‘a e Hau, ko Sihova Sāpaoti hono huafa–hangē ko e fotu ‘a Tepoa ‘i he ngaahi mo‘unga, pea hangē ko e fotu ‘a Kāmeli ‘i he tahi, ‘e pehē ‘ene nga‘eke mai.
19Ngaohi mai ha‘o nāunau ki he taki pōpula,
Si‘i ta‘ahine ‘Isipite ‘oku nofo fonua:
He ko Nofi ‘e hoko ko e lala,
Pea ‘e tutu ke ‘osi, ‘o ‘oua ‘e kei nofo ai ha taha.
20Ko ‘Isipite ko e kau mui faka‘ofo‘ofa ‘aupito:
Ko e lango u‘u mei he tokelau kuo ha‘u ki ai.
21Ko ‘ene kau tau unga foki ‘oku nofo ‘i hono lotolotonga,
Ko e fanga pulu pusiaki tofu pē,
Pea ko kinautolu foki kuo tafoki atu,
Na‘a nau hola fakataha,
Na‘e ‘ikai te nau tu‘u:
He kuo hoko kiate kinautolu ‘a e ‘aho ‘o ‘enau mala,
‘A e taimi ‘o honau ‘a‘ahi.
22Ko ‘ene taulaka ‘e hangē ko e ‘alu ‘a ha ngata;
Seuke, te nau laka mai mo e tau,
Pea te nau ha‘u ki ai mo e ngaahi toki,
‘O hangē ha kau tā ‘akau.
23Te nau tā hono vao–ko Sihova ia mei he Ta‘ehāmai–he ‘oku ‘ikai ke matui atu ha hala ai; he ‘oku nau tokolahi ange ‘i he fanga he‘e, pea ‘oku ‘ikai lava hanau lau. 24‘E fakamaa‘i ‘a e ta‘ahine ko ‘Isipite; ‘e tukuange ki he nima ‘o e kakai tokelau.
25‘Oku folofola mai ‘a Sihova Sāpaoti, ko e ‘Otua ‘o ‘Isileli: Ko au eni te u tautea ‘a ‘Āmoni ‘o nō, pea mo Felo, pea mo ‘Isipite, pea mo hono ngaahi ‘otua, pea mo hono ngaahi tu‘i; ‘io, ‘a Felo mo kinautolu ‘oku falala kiate ia; 26pea te u tuku kinautolu ki he nima ‘o e kakai ‘oku kumi ki he‘enau mo‘ui, ‘io, ki he nima ‘o Nepukanesa ko e Tu‘i Pāpilone, pea ki he nima ‘o ‘ene kau tamaio‘eiki: pea hili ia, ‘e toe nofo‘ia ‘o hangē ko e taimi mu‘a–ko Sihova ia mei he Ta‘ehāmai.
‘E Fakahaofi ‘e Sihova ‘a Hono kakaí
27Ka ko koe, ‘e Sēkope, si‘eku sevāniti, ‘oua te ke manavahē,#Sel 30.10-11 pea ‘oua te ke mo‘utāfu‘ua, si‘i ‘Isileli: he ko au eni te u fakahaofi koe mei he potu mama‘o na, pea mo ho hako mei he fonua ‘oku nau pōpula ai, pea ‘e foki ‘a Sēkope, ‘o nonga, ‘o nofo falala, ‘o ‘ikai ha taha ke ne ilifia ai. 28‘Oua foki te ke manavahē, si‘eku sevāniti ko Sēkope–ko Sihova ia mei he Ta‘ehāmai–he ‘oku ou ‘iate koe ‘e au; pea te u faka‘auha ‘a e ngaahi pule‘anga ne u vetekina kimoutolu ki ai, ka ‘e ‘ikai te u faka‘osi koe; ka te u tautea koe ke fe‘unga, ‘o ‘ikai te u tuku koe ke ‘alu ta‘etautea ‘aupito.
Currently Selected:
KO SELEMAIA 46: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
