KO SELEMAIA 40
40
Ko e Nofo ‘a Selemaia ‘i he ‘Api ‘o Ketalaiá
1KO E folofola na‘e hoko kia Selemaia meia Sihova, hili hono tukuange mei Lama ‘e Nēpusa-‘ātani ko e pule ‘o e ka‘ate, ‘i hono ‘omi ‘oku ha‘i seini, ‘i he lotolotonga ‘o e kau pōpula ‘o Selusalema mo Siuta ‘oku ‘ave pōpula ki Pāpilone.
2Pea ‘i he ma‘u mai ‘e he ‘eiki ‘o e ka‘ate ‘a Selemaia, na‘a ne me‘a kiate ia, ‘o pehē, Ko Sihova, ko ho ‘Otua, na‘a ne tala ‘a e kovi ni ‘e hoko ki he potu ni. 3Pea kuo ‘omi ‘e Sihova, pea kuo ne fai ‘o tatau tofu pē mo ‘ene folofola: he na‘a mou hia kia Sihova, pea na‘e ‘ikai te mou fakaongo ki hono le‘o, ko ia kuo hoko ai ‘a e me‘a ni kiate kimoutolu. 4Pea ko eni, vakai, ‘oku ou faka‘atā koe he ‘aho ni mei he ngaahi seini ‘oku ‘i ho nima. Kapau ‘oku hā lelei kiate koe ke ha‘u mo au ki Pāpilone, ha‘u, pea te u tokanga lelei kiate koe; pea kapau ‘oku hā kovi kiate koe ke ha‘u mo au ki Pāpilone, ‘oua. Vakai, ko e fonua kotoa ena; ‘ilonga ha potu ‘oku hā lelei mo totonu kiate koe ke ‘alu ki ai, ‘alu.
5Pea ‘i he‘ene mo‘utu‘ua, ta‘efoki, pea me‘a atu ‘e ia, Pe‘i foki ā kia Ketalaia foha ‘o ‘Ahikami, foha ‘o Sāfani, ‘a ia kuo fakanofo ‘e he Tu‘i Pāpilone ke pule ki he ngaahi kolo ‘o Siuta, pea ke nofo mo ia ‘i he lotolotonga ‘o e kakai; pea ‘alu ki ha potu ‘oku hā totonu kiate koe ke ‘alu ki ai. Pea ‘ange kiate ia ‘e he ‘eiki ‘o e ka‘ate ha ‘inasi mo ha me‘a‘ofa, ‘o ne tukuange. 6Pea ‘alu ‘a Selemaia kia Ketalaia foha ‘o ‘Ahikami ki Mīsipa, pea na‘a ne nofo mo ia ‘i he lotolotonga ‘o e kakai na‘e toe ‘i he fonua.
Ko e Kōvana Siuta ko Ketalaia
(2 Tu‘i 25.22-24)
7Pea ‘i he fanongo ‘e he hou‘eiki tau na‘e ‘i he tuku‘uta, ‘a kinautolu mo honau kakai, kuo fakanofo ‘e he Tu‘i Pāpilone ‘a Ketalaia foha ‘o ‘Ahikami ke kōvana ‘i he fonua, pea kuo ne tuku kiate ia ha kau tangata mo ha kau fefine mo e tamaiki, mo e ni‘ihi ‘i he taupotu ki lalo ‘o e fonua, kuo ‘ikai ke ‘ave pōpula ki Pāpilone;#2 Tu‘i 25.22-24 8na‘a nau omi kia Ketalaia ki Mīsipa, ‘io, ‘a ‘Isime‘eli foha ‘o Netanaia, pea mo Siohanani mo Sionatane ko e ongo foha ‘o Kalea, mo Selaia ko e foha ‘o Tanumeti, mo e fānau ‘a ‘Ēfai ko e ha‘a Nētofa, mo Sisanaia foha ‘o ha motu‘a Maaka, ‘a kinautolu mo honau kakai. 9Pea fuakava kiate kinautolu mo honau kau tangata ‘e Ketalaia foha ‘o ‘Ahikami, foha ‘o Sāfani, ‘o pehē, ‘Oua te mou manavahē ke tauhi ki he kau Kalitia. Mou nofo ‘i he fonua, ‘o tauhi ki he Tu‘i Pāpilone, pea te mou lelei. 10Pea ko e me‘a kiate au, ‘eni, te u nofo ‘i Mīsipa, ke feangai mo e kau Kalitia ‘e omi kiate kitautolu: ka ko kimoutolu, mou tānaki uaine mo e fua‘i ‘akau mo e lolo, ‘o fa‘o ki ho‘omou ngaahi ‘angame‘a, ‘o nofo ‘i he ngaahi kolo kuo mou puke. 11Pea ko e kau Siu foki na‘e ‘i Moape, pea ‘i Ha‘a ‘Āmoni, mo ‘Ītomi, mo e fonua kehekehe, ‘i he‘enau fanongo kuo tuku ‘e he Tu‘i Pāpilone ha toenga ‘i Siuta, pea kuo ne fakanofo ke pule kiate kinautolu ‘a Ketalaia foha ‘o ‘Ahikami, foha ‘o Sāfani; 12‘io, na‘e foki ‘a e kau Siuta mei he ngaahi potu kehekehe kuo sese‘e kinautolu ki ai, pea nau omi ki he fonua ‘o Siuta, kia Ketalaia ki Mīsipa, pea nau tānaki uaine mo e fua‘i ‘akau, ‘o lahi ‘aupito.
Ko Hono Fakapoongi ‘o Ketalaia
(2 Tu‘i 25.25-26)
13Pea ko Siohanani foha ‘o Kalea, mo e hou‘eiki tau kotoa na‘e ‘i he tuku‘uta, na‘a nau omi kia Ketalaia ki Mīsipa. 14Pea nau pehē kiate ia, ‘Oku ‘ikai te ke ‘ilo koā ko Pealisi ko e Tu‘i Ha‘a ‘Āmoni kuo ne fekau ‘a ‘Isime‘eli foha ‘o Netanaia ke fakapoongi koe? Ka na‘e ‘ikai ke tui kiate kinautolu ‘a Ketalaia foha ‘a ‘Ahikami. 15Pea ko Siohanani foha ‘o Kalea na‘a ne lea kia Ketalaia fakaekinaua pē ‘i Mīsipa, ‘o pehē, Ka u ‘alu mu‘a, ‘o taa‘i ‘a ‘Isime‘eli foha ‘o Netanaia, pea ‘e ‘ikai ha taha ‘e ‘ilo ki ai, Koe‘uma‘ā ‘ene fakapoongi koe, kae movete ‘a e kau Siuta kuo tānaki kiate koe, pea ‘auha ‘a e toenga ‘o Siuta?
16Pea tali ‘a Ketalaia foha ‘o ‘Ahikami kia Siohanani foha ‘o Kalea, ‘E ‘ikai te ke fai ‘a e me‘a ko ia: he ko e loi ho‘o lau kia ‘Isime‘eli.
Currently Selected:
KO SELEMAIA 40: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
