KO SELEMAIA 39
39
Ko Hono Ma‘u ‘o Selusalema ‘e Nepukanesa
1PEA ‘i he faifai pea hamu ‘a Selusalema: (ko hono hiva ‘o e ta‘u ‘o Setekaia ko e Tu‘i Siuta, mo hono hongofulu ‘o e māhina, na‘e ha‘u ai ‘a Nepukanesa ko e Tu‘i Pāpilone mo ‘ene tau kātoa ki Selusalema, ‘o nau kapui ia; 2pea ‘i hono hongofulu mā taha ta‘u ‘o Setekaia, ‘i hono māhina fā, mo hono ‘aho hiva ‘o e māhina, na‘e foa ‘a e ‘ā ‘o e kolo): 3na‘e toki hū mai ‘a e hou‘eiki kātoa ‘a e Tu‘i Pāpilone, pea na‘a nau nofo ‘i he matapā ‘i loto kolo, ‘io, ‘a Nelikalasalesa, ‘a Sāmika-Nipo, ‘a Sa‘asekimi ko e Lapisalisi, ‘a Nelikala-sālesa ko e Lapi-maki,#39.3 ‘Oku ‘ikai ke ‘ilo‘i ‘a e ngaahi hingoa mo e ngaahi lakanga ‘o e kau tangatá ni. mo hono toe ‘o e hou‘eiki ‘a e Tu‘i Pāpilone.
4Pea ‘i he ‘iloange na‘e sio kiate kinautolu ‘e Setekaia ko e Tu‘i Siuta, mo e kau sōtia kotoa, na‘a nau hola; pea nau hū kitu‘a po‘uli mei he kolo, ‘i he hala ‘o e ngouetapu ‘a e tu‘i, ‘i he matanikolo ‘i he vaha‘a ‘o e ongo ‘ā: pea ‘alu atu ia ‘i he hala ki he ‘Alapā. 5Pea tuli kiate kinautolu ‘a e tau Kalitia, ‘o nau ma‘u ‘a Setekaia ‘i he ‘Alapā ‘o Sielikō: pea, kuo nau puke ia, na‘a nau ‘ohake ia kia Nepukanesa ko e Tu‘i Pāpilone, ki Līpila ‘i he fonua ‘o Hēmati, ‘o ne fakamāu‘i ia. 6Pea tāmate‘i ‘e he Tu‘i Pāpilone ‘a e ngaahi foha ‘o Setekaia ‘i Līpila, ‘oku ne mamata ki ai: na‘e tāmate‘i foki ‘e he Tu‘i Pāpilone ‘a e hou‘eiki Siuta kotoa. 7Pea na‘e toki kuihi ‘a Setekaia, pea nau ha‘i ‘aki ha ongo seini palasa ke ‘ave ia ki Pāpilone. 8Pea na‘e fakamomofi ‘e he kau Kalitia ‘a e fale ‘o e tu‘i, mo e fale ‘o e kakai, pea nau holoki ‘a e ngaahi ‘ā ‘o Selusalema. 9Pea ko e toenga kakai na‘e toe ‘i he kolo, mo e kakai kuo tō kiate ia, ‘io, ‘a e toenga ‘o e kakai na‘e toe, na‘e taki pōpula kinautolu ki Pāpilone ‘e Nēpusa-‘ātani ko e ‘eiki ‘o e ka‘ate. 10Ka na‘e tuku ‘e Nēpusa-‘ātani ko e ‘eiki ‘o e ka‘ate ha ni‘ihi ‘i he kakai taupotu ki lalo, ‘a ia na‘e ‘ikai ha‘anau momo‘i me‘a, ke nofo ‘i he fonua ko Siuta, ‘o ne ‘ange kiate kinautolu ‘i he taimi ko ia ha‘anau ngoue vaine mo hanau ngoue‘anga.
Ko Hono Tukuange ‘o Selemaia
11Pea kuo fai tu‘utu‘uni ‘e Nepukanesa ko e Tu‘i Pāpilone ‘ia Selemaia kia Nēpusa-‘ātani ko e ‘eiki ‘o e ka‘ate ‘o pehē, 12Puke ia, pea ke vakai lelei ki ai, pea ‘oua ‘e momo‘i fai kiate ia ha kovi; kaekehe, ‘ilonga ha me‘a te ne tala kiate koe, fai pehē ma‘ana. 13Ko ia, na‘e fekau ‘a Nēpusa-‘ātani ko e ‘eiki ‘o e ka‘ate, mo Nēpusa-sēpani ko e Lapisalisi, mo Nelikala-sālesa ko e Lapi-maki, ‘io, ‘a e kau tāimu‘a kotoa ‘a e Tu‘i Pāpilone; 14‘io, na‘a nau fekau, ‘o ‘omi ‘a Selemaia mei he loto‘ā ‘o e ka‘ate, ‘o nau tuku ia kia Ketalaia foha ‘o ‘Ahikami, foha ‘o Sāfani, ke ‘ave ia ki tu‘a ki ‘api: ko ia na‘a ne nofo ‘i he lotolotonga ‘o e kakai.
Ko ha Tala‘ofa kia ‘Ēpetimeleki
15Pea lolotonga na‘e mo‘u tāpunia ‘a Selemaia ‘i he loto‘ā ‘o e ka‘ate, na‘e hoko ‘a e folofola ‘a Sihova kiate ia, ‘o pehē, 16‘Alu, ‘o lea ki he ‘Itiopea#39.16 ‘Itiopea; Vakai ki he “Ngaahi Huluhulu”. ko ‘Ēpetimeleki, ‘o pehē, Ko e folofola eni ‘a Sihova Sāpaoti, ko e ‘Otua ‘o ‘Isileli: Ko au eni te u fakaai ‘eku ngaahi lea ki he kolo ni, ke kovi ‘o ‘ikai ke lelei; pea te ke mātu‘aki sio ki ai ‘i he ‘aho ko ia. 17Ka te u fakahaofi koe ‘i he ‘aho ko ia–ko Sihova ia mei he Ta‘ehāmai–pea ‘e ‘ikai tuku koe ki he nima ‘o e kau tangata ‘oku ke teki ki ai. 18Tala atu, te u hamusi koe, pea ‘e ‘ikai te ke tō ‘i he heletā, ka te ke ‘ave ho‘o mo‘ui mo‘ao vete, koe‘uhi na‘a ke tui kiate au–ko Sihova ia mei he Ta‘ehāmai.
Currently Selected:
KO SELEMAIA 39: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
