KO SELEMAIA 41
41
1KA ‘i hono fitu māhina, ‘iloange na‘e ha‘u ‘a ‘Isime‘eli foha ‘o Netanaia, ko e hako ‘o ‘Elisama, ko e taha ‘i he fale‘alo ‘o e tu‘i, mo e kau tāimu‘a ‘a e tu‘i, ‘o ne ha‘u mo ia ha tu‘unga me‘a ‘e toko hongofulu kia Ketalaia foha ‘o ‘Ahikami ki Mīsipa;#2 Tu‘i 25.25 2pea nau taumafa ai mo ia ‘i Mīsipa fakataha. Pea tutu‘u ‘a ‘Isime‘eli foha ‘o Netanaia, mo e tu‘unga me‘a ‘e toko hongofulu na‘e ‘iate ia, ‘o nau taa‘i ‘a Ketalaia foha ‘o ‘Ahikami, foha ‘o Sāfani ‘aki ‘a e heletā; ‘io, na‘a ne tāmate‘i ia koe‘uhi kuo fakanofo ia ‘e he Tu‘i Pāpilone ko e kōvana ‘o e fonua. 3Na‘e taa‘i foki ‘e ‘Isime‘eli ‘a e kau Siu kotoa na‘e ‘iate ia, ‘io, na‘e ‘ia Ketalaia ‘i Mīsipa, pea mo e kau Kalitia na‘e ‘ilo ai, ‘io, ko e kau sōtia.
4Pea ‘i hono ua ‘o e ‘aho hili ‘ene tāmate‘i ‘a Ketalaia, ka kuo te‘eki ke ‘ilo ki ai ha ni‘ihi, 5tā na‘e omi ha tu‘unga me‘a mei Sikemi, mei Sailo, pea mei Samēlia, ko e toko valungofulu, kuo tele honau kava, pea kuo hae hifo honau kofu, pea kuo nau fefofoa‘i, pea ‘oku nau to‘o me‘a feilaulau mo e laipeno, ko ‘enau ‘ave ki he fale ‘o Sihova. 6Pea hū kitu‘a mei Mīsipa ‘a ‘Isime‘eli foha ‘o Netanaia, ‘o fakafetaulaki kiate kinautolu, ‘o ne lakalaka tangi atu pē: pea ‘i he faifai pea nau fetaulaki, na‘a ne pehē kiate kinautolu, Mou omi kia Ketalaia foha ‘o ‘Ahikami. 7Pea ‘i he ‘iloange na‘a nau a‘u ki he loto kolo, pea tāmate‘i kinautolu ‘e ‘Isime‘eli foha ‘o Netanaia, ‘o ne laku ki he lepa, ‘e ia mo e kau tangata na‘e ‘iate ia.
8Ka na‘e ai ha tu‘unga me‘a ‘iate kinautolu, ko e toko hongofulu, na‘a nau pehē kia ‘Isime‘eli, ‘Oua ‘e tāmate‘i kimautolu: he ‘oku ai homau ngaahi feleoko fufū ‘i he vao, ‘oku fa‘o ai ‘a e uite mo e pa‘ale mo e lolo mo e honi. Ko ia na‘a ne momou, ‘o ‘ikai te ne tāmate‘i ‘a kinautolu fakataha mo honau kāinga. 9Pea ko e lepa na‘e lī ki ai ‘e ‘Isime‘eli ‘a e fu‘ufu‘unga sino ‘o e kakai kuo ne taa‘i, ke nau toka mo Ketalaia, ko ia ia na‘e ngaohi ‘e Kingi ‘Asa, telia ‘a Pā‘asa ko e Tu‘i ‘Isileli; pea na‘e fakafonu ia ‘e ‘Isime‘eli ‘aki ‘a e kakai kuo mate. 10Pea na‘e toki ‘ave ‘e ‘Isime‘eli ‘a e toe ‘o e kakai ‘oku ‘i Mīsipa, ‘io, ‘a e fānau fefine ‘a e tu‘i, mo e kakai kotoa na‘e toe ‘i Mīsipa, ‘a ia kuo tuku honau tauhi ‘e Nēpusa-‘ātani ko e ‘eiki ‘o e ka‘ate kia Ketalaia foha ‘o ‘Ahikami; ‘io, na‘e ‘ave pōpula kinautolu ‘e ‘Isime‘eli foha ‘o Netanaia, ‘o ne fononga ko ‘ene hiki ki Ha‘a ‘Āmoni.
11Ka ko Siohanani foha ‘o Kalea, mo e hou‘eiki kotoa ‘o e ngaahi vāhenga tau na‘e ‘iate ia, ‘i he‘enau fanongo ki he fu‘u kovi kuo fai ‘e ‘Isime‘eli foha ‘o Netanaia, 12na‘a nau hiki mo honau kau tangata, ‘o nau ‘alu ke fai tau mo ‘Isime‘eli foha ‘o Netanaia, pea na‘a nau ma‘u ia ‘i he fu‘u vai ‘oku ‘i Kipione. 13Pea ‘i he ‘iloange na‘e mamata ‘e he kakai kotoa na‘e ‘ia ‘Isime‘eli kia Siohanani foha ‘o Kalea, mo e hou‘eiki kotoa ‘o e ngaahi vāhenga tau na‘e ‘iate ia, na‘a nau fiefia. 14Ko ia, na‘e sītu‘a ‘a e kakai kotoa kuo taki pōpula ‘e ‘Isime‘eli mei Mīsipa, ‘o nau foki, ‘o ‘alu kia Siohanani foha ‘o Kalea. 15Ka ka hao meia Siohanani ‘a ‘Isime‘eli foha ‘o Netanaia, mo e tu‘unga tangata ‘e toko valu, ‘o ne ‘alu ki Ha‘a ‘Āmoni.
16Pea hanga ‘e Siohanani foha ‘o Kalea, mo e hou‘eiki kotoa ‘o e ngaahi vāhenga tau na‘e ‘iate ia, ‘o nau ‘ave ‘a e toe kotoa ‘o e kakai kuo ne fakafoki meia ‘Isime‘eli foha ‘o Netanaia, ‘a ia kuo ne taki pōpula kinautolu mei Mīsipa, hili ‘ene taa‘i ‘a Ketalaia foha ‘o ‘Ahikami, ‘io, ‘a e kau to‘a, ‘a e tu‘unga sōtia, mo e kau fefine, mo e tamaiki, mo e kau ‘iunoke, ‘a ia kuo ne foki mai mo ia mei Kipione: 17pea na‘a nau fononga, ‘o nau nofo ‘i he fale talifononga ‘o Kīmami, ‘a ia ‘oku ‘i he tafa‘aki ‘o Pētelihema, ko ‘enau fononga ke hū ki ‘Isipite, telia ‘a e kau Kalitia; 18he na‘a nau manavahē kiate kinautolu, koe‘uhi ko e taa‘i ‘e ‘Isime‘eli foha ‘o Netanaia ‘a Ketalaia foha ‘o ‘Ahikami, ‘a ia kuo fakanofo ‘e he Tu‘i Pāpilone ke kōvana ‘i he fonua.
Currently Selected:
KO SELEMAIA 41: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
