KO SELEMAIA 36
36
Ko Hono Lau ‘e Paluki ‘a e Takainga Tohi ‘i he Temipalé
1PEA ‘i hono fā ta‘u ‘o Sihoiakimi foha ‘o Siosaia, ko e Tu‘i Siuta, na‘e hoko ‘a e folofola ko eni kia Selemaia meia Sihova, ‘o pehē,#2 Tu‘i 24.1; 2 Kal 36.5-7; Tān 1.1-2 2To‘o mai ha takainga tohi, pea ke tohi ai ‘a e ngaahi lea kehekehe kuo u lea‘aki ‘iate koe ki ‘Isileli, mo Siuta, pea mo e ngaahi pule‘anga, talu mei he‘eku kamata lea kiate koe, ‘io, talu ‘a e taimi ‘o Siosaia, ‘o a‘u ki he ‘aho ni. 3Hei‘ilo ‘e tokanga ‘e he fale ‘o Siuta ki he kovi kotoa ‘oku ou fakakaukau ke fai kiate kinautolu: ka nau foki takitaha mei hono ‘alunga kovi; ka u fakamolemole ‘enau kovi mo ‘enau hia.
4Pea ui ange ‘e Selemaia ‘a Paluki foha ‘o Nelaia, pea tohi ‘e Paluki ki ha takainga tohi, ‘i he lau ta‘anga mai ‘e Selemaia, ‘a e ngaahi lea kehekehe ‘a Sihova, ‘a ia kuo ne folofola‘aki kiate ia. 5Pea fekau ‘e Selemaia kia Paluki, ‘o ne pehē, Ko e mo‘u tāpunia au; ‘oku ‘ikai te u lava ke ‘alu ki he fale ‘o Sihova: 6ko ia ke ke ‘alu koe, ‘o lau mei he takainga tohi kuo ke hiki mei hoku ngutu, ‘a e ngaahi folofola ‘a Sihova, ke fanongo ‘a e kakai ‘i he fale ‘o Sihova, ‘i he ‘aho ‘aukai: pea te ke lau foki ke fanongo ki ai ‘e he kau Siuta kotoa ‘oku ha‘u mei he‘enau ngaahi kolo. 7Hei‘ilo ‘e tau ‘enau hū kia Sihova, pea nau foki takitaha mei hono ‘alunga kovi: he ko e me‘a lahi ‘a e houhau mo e ‘ita kakaha, ‘a ia kuo folofola ki ai ‘a Sihova, ‘o kau ki he kakai ni. 8Pea fai ‘e Paluki foha ‘o Nelaia, ‘o hangē tofu pē hono tu‘utu‘uni ‘e Selemaia ko e palōfita, ‘ene lau mei he tohi ‘a e ngaahi folofola ‘a Sihova ‘i he fale ‘o Sihova.
9Pea ko eni, ‘i hono nima ‘o e ta‘u ‘o Sihoiakimi foha ‘o Siosaia, ko e Tu‘i Siuta, ‘i hono hiva ‘o e māhina, na‘e fanongonongo ha ‘aukai, ke fai ‘i he ‘ao ‘o Sihova ‘e he kakai kotoa ‘o Selusalema, mo e kakai kotoa na‘e ‘i Selusalema, ko e ha‘u mei he ngaahi kolo ‘o Siuta. 10Pea na‘e lau ‘e Paluki mei he tohi ‘a e ngaahi lea ‘a Selemaia ‘i he fale ‘o Sihova, ‘i he loki ‘o Kemalaia foha ‘o Sāfani ko e sikalaipe, ‘i he loto‘ā ‘olunga, ‘i he hū‘anga ‘o e matapā fo‘ou ‘o e fale ‘o Sihova, kae fanongo ‘a e kakai kotoa.
Ko Hono Lau ‘o e Takainga Tohí ki he Kau Taki
11Pea ‘i he fanongo ‘e Maikaia foha ‘o Kemalaia, foha ‘o Sāfani, ki he ngaahi folofola ‘a Sihova na‘e lau mei he tohi, 12na‘a ne ‘alu hifo ki he fale ‘o e tu‘i, ki he loki ‘o e sikalaipe: pea ‘oku nofo ai ‘a e hou‘eiki kotoa, ‘a ‘Elisama ko e sikalaipe, mo Telaia foha ‘o Sēmaia, mo ‘Elinetane foha ‘o ‘Akepoa, mo Kemalaia foha ‘o Sāfani, mo Setekaia foha ‘o ‘Ananaia, ‘io, ‘a e hou‘eiki kotoa pē. 13Pea fakamatala ‘e Maikaia kiate kinautolu ‘a e ngaahi folofola kuo ne fanongo ki ai, ‘i he lau ‘e Paluki ‘a e tohi ‘i he ‘ao ‘o e kakai. 14Pea hanga ai ‘a e hou‘eiki kotoa, ‘o nau fekau ‘a ‘Iehuti foha ‘o Netanaia foha ‘o Silimaia foha ‘o Kusi kia Paluki, ke fakahā, To‘o ‘a e takainga, ‘a ia kuo ke lau mei ai ki he kakai, pea ke ha‘u. Pea to‘o ‘e Paluki foha ‘o Nelaia ‘a e takainga, ‘o ne ha‘u mo ia kiate kinautolu. 15Pea na‘a nau pehē kiate ia, Nofo hifo mu‘a, ‘o lau ena ka mau fanongo. Ko ia na‘e lau ia ‘e Paluki kiate kinautolu. 16Pea ‘i he faifai pea kuo nau fanongo ‘i he ngaahi folofola kehekehe, na‘a nau fehāngaaki ilifia, pea nau pehē kia Paluki, Kuo pau ke mau fakapā ki he tu‘i ‘a e ngaahi fu‘u folofola ko ia. 17Pea nau fehu‘i kia Paluki, ‘o pehē, Tala mai mu‘a pe na‘e fēfē ho‘o tohi mei hono ngutu ‘a e fu‘u folofola ko ia?
18Pea tali ki ai ‘a Paluki, Na‘a ne lau ta‘anga mai ‘a e ngaahi fu‘u folofola ko ē, pea u tohi ai pē ‘e au ‘i ha tohi ‘aki ‘a e vaitohi.
19Pea me‘a ‘a e hou‘eiki kia Paluki, ‘Alu, ‘o toi, ‘a koe mo Selemaia, pea ke ‘oua na‘a ‘ilo ‘e ha taha pe ‘oku mo ‘i fē.
Ko Hono Tutu ‘e he Tu‘í ‘a e Takainga Tohí
20Pea nau toki ‘alu ki he tu‘i ki he Loto‘ā, ka ko e takainga na‘a nau tauhi ‘i he loki ‘o ‘Elisama ko e sikalaipe; pea nau ‘a‘au ki he tu‘i ‘a e ngaahi lea kehekehe. 21Pea fekau ‘e he tu‘i ‘a ‘Iehuti ke ‘omi ‘a e takainga: pea ne to‘o ia mei he loki ‘o ‘Elisama ko e sikalaipe. Pea na‘e lau ia ‘e ‘Iehuti ‘i he ‘ao ‘o e tu‘i, pea ‘i he ‘ao ‘o e hou‘eiki kotoa, ‘a ia na‘a nau tu‘u kae ‘i lalo ‘a e tu‘i. 22Pea ko e tu‘i ‘oku ne ‘afio ‘i he fale fākavao, he ko hono hiva māhina: pea ko e matanavu ena ‘i hono ‘ao ‘oku kakaha. 23Pea ‘i he faifai pea ‘osi hono lau ‘e ‘Iehuti ha ‘otu ‘e tolu pe fā, ‘e hanga ‘e he ‘afio, ‘o hele ia ‘aki ‘a e hele fakamatapeni, ‘o lī ki he afi ‘i he matanavu, kae‘oua ke ‘osi ‘a e takainga kotoa hono lī ki he afi ‘oku ‘i he matanavu. 24Pea koloto ke nau manavahē, pea koloto ke nau hae hifo honau kofu, ‘e he tu‘i mo ‘ene kau tama, ‘i he‘enau fanongo ki he ngaahi fu‘u lea ko ia. 25Kae‘uma‘ā foki, ‘i he hū ki he tu‘i ‘e ‘Elinetane mo Telaia mo Kemalaia, ke ‘oua te ne fakamomofi ‘a e takainga, na‘e ‘ikai te ne tokanga kiate kinautolu. 26Pea fekau ‘e he tu‘i ‘a ‘Ilameeli ko e foha ‘o e tu‘i, pea mo Selaia foha ‘o ‘Asilili, mo Silimaia foha ‘o ‘Apitieli, ke puke mai ‘a Paluki sikalaipe, mo Selemaia palōfita: ka ka fufū kinaua ‘e Sihova.
Ko e Toe Tohi ‘a Selemaia ‘i ha Takainga Tohi ‘e Taha
27Pea hoko ‘a e folofola ‘a Sihova kia Selemaia, hili ‘a e fakamomofi ‘e he tu‘i ‘a e takainga, mo e ngaahi lea kuo tohi ai ‘e Paluki, ‘i he lau ta‘anga mai ‘e Selemaia, ‘io, na‘a ne folofola mai: 28Toe kumi mai ha takainga ‘e taha, ‘o toe tohi ai ‘a e ngaahi lea mu‘a kotoa, ‘a ia na‘e ‘i he ‘uluaki takainga, ‘a ia na‘e tutu ‘e Sihoiakimi ko e Tu‘i Siuta. 29Pea te ke lea ‘ia Sihoiakimi ko e Tu‘i Siuta, ‘o pehē, Ko e folofola eni ‘a Sihova: Ko eni kuo ke tutu ‘a e takainga ni, ‘o ke pehē, Ko e hā na‘a ke tohi ai. Kuo pau ke ha‘u ‘a e Tu‘i Pāpilone, ‘o maumau ‘a e fonua ni, ‘o ‘ai ke ‘oua na‘a ai ha tangata pē ha manu? 30Ko hono ō ia ‘oku folofola ai ‘e Sihova ‘ia Sihoiakimi ko e Tu‘i Siuta, ‘o pehē, ‘E ‘ikai ai hano toko taha ke ‘afio ‘i he taloni ‘o Tēvita: pea ko hono ‘anga‘anga ‘e tuku li‘aki, ke fai ai ‘a e pupuha ‘o e ‘aho mo e momoko ‘o e pō. 31Pea te u ‘eke kiate ia, pea ki hono hako, mo ‘ene kau tama, ‘a e kovi kuo nau fai; pea te u ‘omi kiate kinautolu, pea ki he nofo Selusalema, pea ki he kakai Siuta, ‘a e kovi kotoa na‘a ku tala kiate kinautolu, ka na‘e ‘ikai te nau tokanga.
32Pea to‘o ‘e Selemaia ha takainga ‘e taha, ‘o ne ‘ange kia Paluki foha ‘o Nelaia, ko e sikalaipe; pea tohi ‘e ia ki ai, ‘i he lau ta‘anga mai ‘e Selemaia, ‘a e ngaahi lea kotoa na‘e ‘i he tohi na‘e fakamomofi ‘e Sihoiakimi ko e Tu‘i Siuta ‘i he afi, pea na‘e ‘ai ki ai foki mo e ngaahi lea lahi, fa‘ahinga mo ia.
Currently Selected:
KO SELEMAIA 36: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
