KO SELEMAIA 37
37
Ko ha Kole ‘a Setekaia kia Selemaia
1PEA hoko ‘o tu‘i ‘a Setekaia foha ‘o Siosaia, ko e fetongi ‘o Konaia foha ‘o Sihoiakimi, he kuo fakanofo ia ‘e Nepukanesa ko e Tu‘i Pāpilone ke tu‘i ‘i he fonua ‘o Siuta.#2 Tu‘i 24.17; 2 Kal 36.10 2Ka na‘e ‘ikai ke tokanga ia, pe ko ‘ene kau tama, pe ko e kakai ‘o e fonua, ki he ngaahi folofola ‘a Sihova, ‘a ia na‘a ne fakafai ‘ia Selemaia ko e palōfita.
3Pea fekau ‘e Kingi Setekaia ‘a Sihukali foha ‘o Silimaia, mo Sefanaia foha ‘o Ma‘aseia ko e taula‘eiki, kia Selemaia ko e palōfita ke fakahā, Ke ke hufekina mu‘a kimautolu kia Sihova ko hotau ‘Otua. 4Pea ko e taimi ko ia na‘e fe‘alu‘aki ai ‘a Selemaia ‘i he lotolotonga ‘o e kakai: he kuo te‘eki ke nau tuku ia ki he pilīsone. 5Pea ko e tau ‘a Felo kuo ‘alu hake mei ‘Isipite: pea ‘i he fanongo ki he ongoongo ‘o ‘enau ha‘u ‘e he kau Kalitia na‘e kapui ‘a Selusalema, na‘a nau mātuku mei Selusalema.
6Pea hoko ‘a e folofola ‘a Sihova kia Selemaia ko e palōfita, ‘o pehē, Ko e folofola eni ‘a Sihova ko e ‘Otua ‘o ‘Isileli: 7Ko eni ho‘omou tali ‘e fai ki he Tu‘i Siuta na‘e fekau kimoutolu kiate au ke huhū mai; Vakai, ko e tau ‘a Felo na‘e ‘alu hake ma‘amou tokoni, ‘e foki ia ki hono fonua, ki ‘Isipite. 8Pea ‘e foki mai ‘a e kau Kalitia, pea te nau fai tau ki he kolo ni; pea te nau hamu ia, pea te nau tutu ia ‘aki ‘a e afi. 9Ko e folofola eni ‘a Sihova: ‘Oua te mou tui kiate kimoutolu, tokua kuo pau ke mātuku atu ‘a e kau Kalitia: he ‘ikai te nau mātuku atu. 10He ka ne mou lava ke taa‘i ‘a e kau Kalitia, hono kotoa ‘oku fai tau mo kimoutolu, pea toe pē hanau ni‘ihi kuo kafo, ka te nau tu‘u hake takitaha ‘i hono tēniti, ‘o tutu ‘a e kolo ni ‘aki ‘a e afi.
Ko Hono Puke ‘o Selemaia ‘o Fakahū
11Pea ‘i he taimi na‘e mātuku atu ‘a e tau Kalitia mei Selusalema telia ‘a e tau ‘a Felo, 12na‘e hū ki tu‘a ‘a Selemaia mei Selusalema, ko ‘ene ‘alu ki he fonua ‘o Penisimani, ke ma‘u mei ai ha ‘inasi ‘i he lotolotonga ‘o e kakai. 13Pea ‘i he‘ene ‘i he matanikolo ‘o Penisimani, na‘e ai ha pule ‘o e kau le‘o, ko ‘Īlaia hono hingoa, foha ‘o Silimaia, foha ‘o ‘Ananaia; pea puke ‘e ia ‘a Selemaia ko e palōfita, he‘ene pehē, Ko ho‘o tō ki he kau Kalitia.
14Pea tali ‘e Selemaia, Ko e loi; ‘oku ‘ikai ko ‘eku tō ki he kau Kalitia. Ka ka ‘ikai tui ki ai ‘e ia; ko ia na‘e puke ai pē ‘a Selemaia ‘e ‘Īlaia, ‘o ne ‘ave ia ki he hou‘eiki. 15Pea na‘e ‘ita ‘a e hou‘eiki kia Selemaia, ‘o nau taa‘i ia, ‘o nau tuku ia ki he pilīsone ‘i he fale ‘o Sionatane ko e sikalaipe; he kuo nau ngaohi ia ko e fale fakapōpula. 16Kuo hū ‘a Selemaia ki he pilīsone–ko e ‘ana mo hono ngaahi loki–pea kuo ne nofo ai ‘o fuoloa; 17na‘e toki fekau ‘a Kingi Setekaia ke ‘omi ia, pea huhū ki ai ‘a e tu‘i ‘i hono fale, kae fufū pē, ‘o ne pehē, ‘Oku ai ha folofola meia Sihova? Pea tali ‘a Selemaia, ‘Oku ai. Na‘a ne pehē foki, ‘E tuku koe ki he nima ‘o e Tu‘i Pāpilone.
18Pea fakatau folofola ‘a Selemaia kia Kingi Setekaia, Ko e hā ‘eku hia kiate koe, pe ki ho‘o kau tamaio‘eiki, pe ki he kakai ni, ‘a ia kuo mou tuku ai au ki he fale pilīsone? 19Koma‘ā eni homou kau palōfita, ‘a ia na‘a nau palofisai kiate kimoutolu, ‘o pehē, ‘E ‘ikai ha‘u ‘a e Tu‘i Pāpilone kiate kimoutolu, pe ki he fonua ni? 20Pea ko eni, ke ke ‘afio mai mu‘a, ‘Ēī ko e tu‘i; ‘ofa ke taau ‘eku hū ki ho finangalo na: ‘oua ‘e fakafoki au ki he fale ‘o Sionatane ko e sikalaipe, na‘a ku mate ai.
21Pea fai tu‘utu‘uni ‘e Kingi Setekaia, pea nau tuku pōpula ‘a Selemaia ‘i he loto‘ā ‘o e ka‘ate, pea nau ‘ange kiate ia ha fo‘i mā ‘i he ‘aho kotoa pē mei he hala ‘o e kau ta‘o mā, kae‘oua ke ‘osi‘osingamālie ‘a e mā ‘i he kolo. Ko ia na‘e nofo ‘a Selemaia ‘i he loto‘ā ‘o e ka‘ate.
Currently Selected:
KO SELEMAIA 37: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
