KO SELEMAIA 35
35
Ko Selemaia mo e Kau Lēkapi
1KO E folofola na‘e hoko kia Selemaia meia Sihova ‘i he kuonga ‘o Sihoiakimi, foha ‘o Siosaia, ko e Tu‘i Siuta, ‘o pehē,#2 Tu‘i 23.35–24.6; 2 Kal 36.5-7 2‘Alu kia ha‘a Lēkapi, ‘o lea kiate kinautolu, ‘o ‘omi kinautolu ki he fale ‘o Sihova, ki ha taha ‘o e ngaahi loki; ‘o fakatau uaine kiate kinautolu. 3Pea u ma‘u mai ‘a Siasanaia foha ‘o Selemaia, foha ‘o Hapasinaia, pea mo hono kāinga, pea mo hono ngaahi foha kotoa, ‘io, mo e ha‘a Lēkapi fua pē. 4Pea u ‘omi kinautolu ki he fale ‘o Sihova, ki he loki ‘o e fānau ‘a Hānani foha ‘o ‘Iketalaia, ko e tangata ‘o ‘Elohimi, ‘a ia na‘e hoko mo e loki ‘o e hou‘eiki, ‘a ia na‘e tu‘u ‘i he funga loki ‘o Ma‘aseia foha ‘o Sālumi, ko e tauhi ‘o e hū‘anga. 5Pea u tuku ‘i he ‘ao ‘o e hako ‘o ha‘a Lēkapi ha ngaahi pēsoni kuo fonu uaine, mo ha ngaahi ipu, pea u pehē kiate kinautolu, Mou inu uaine.
6Pea nau tali mai, ‘E ‘ikai te mau inu uaine: he ko Sionatapi foha ‘o Lēkapi, ko si‘emau kui, na‘a ne tu‘utu‘uni kiate kimautolu ‘o pehē, ‘E ‘ikai te mou inu uaine, ‘a kimoutolu mo ho‘omou fānau, ‘o ta‘engata. 7Pea ‘e ‘ikai te mou langa fale, pea ‘e ‘ikai te mou tō ta‘u, pea ‘e ‘ikai te mou tō ha ngoue vaine, ‘io, ‘e ‘ikai ‘iate kimoutolu ha me‘a pehē; ka te mou nofo tēniti ma‘u ai pē; koe‘uhi ke mou mo‘ui fuoloa ‘i he funga ‘o e kelekele ‘oku mou ‘āunofo ai. 8Pea kuo mau fakaongo ki he le‘o ‘o ‘emau kui ko Sionatapi foha ‘o Lēkapi, ‘i he me‘a kotoa pē na‘a ne tu‘utu‘uni mai, ke ‘oua te mau inu uaine lolotonga ‘emau mo‘ui, ‘a kimautolu, ‘a homau ngaahi uaifi, ‘a ‘emau fānau tangata, mo ‘emau fānau fefine; pea ke ‘oua te mau langa fale ke nofo ai; 9pea ‘oku ‘ikai ‘iate kimautolu ha ngoue vaine, pe ha tokanga ngoue, pe ha pulopula: 10ka ‘oku mau nofo tēniti pē, ‘io, kuo mau talangofua, pea kuo mau fai tatau tofu pē mo e me‘a na‘e tu‘utu‘uni mai ‘e he‘emau kui ko Sionatapi. 11Ka ‘i he ‘iloange na‘e hake mai ki he fonua ‘a Nepukanesa ko e Tu‘i Pāpilone, pea na‘a mau pehē, Ha‘u ā ke tau hū ki Selusalema telia ‘a e tau Kalitia, pea telia ‘a e tau Sīlia; ko ia, ‘oku mau nofo ‘i Selusalema.
12Pea hoko ‘a e folofola ‘a Sihova kia Selemaia, ‘o pehē, Ko e folofola eni ‘a Sihova Sāpaoti, ko e ‘Otua ‘o ‘Isileli: 13‘Alu, ‘o lea ki he tangata Siuta, mo e nofo Selusalema, ‘O ‘ikai koā te mou tali akonaki, pea fanongo ki he‘eku ngaahi lea?–ko Sihova ia mei he Ta‘ehāmai. 14Ko e ngaahi lea ‘a Sionatapi foha ‘o Lēkapi, ‘a ‘ene tu‘utu‘uni ‘ene fānau ke ‘oua te nau inu uaine, ‘oku fai ia, pea ‘oku ‘ikai te nau inu ‘o a‘u ki he ‘aho ni, ka ‘oku nau fakaongo ki he tu‘utu‘uni ‘a ‘enau kui. Ka ko au kuo u lea kiate kimoutolu, ‘o u ‘ā hengihengi ke lea: ka ‘oku ‘ikai te mou tokanga kiate au. 15Pea u fekau atu kiate kimoutolu ‘eku kau sevāniti ko e kau palōfita, ‘o u ‘ā hengihengi, ‘o fekau kinautolu, he‘eku pehē, Mou tafoki mu‘a takitaha mei hono ‘alunga kovi, pea mou fai ‘a e ngaahi ngāue ‘oku lelei, pea ‘oua te mou muimui ‘otua kehe ke tauhi ki ai, pea te mou toki nofo ‘i he kelekele kuo u foaki kiate kimoutolu mo ho‘omou ngaahi kui: ka na‘e ‘ikai te mou fokotu‘u telinga mai, pea na‘e ‘ikai te mou tokanga kiate au. 16Seuke, kuo fai ‘e he hako ‘o Sionatapi foha ‘o Lēkapi ‘a e tu‘utu‘uni ‘a ‘enau kui, ‘a ia na‘a ne fai kiate kinautolu, ka ko e kakai ni ‘oku ‘ikai te nau fakaongo kiate au. 17Ko ia, ko e folofola eni ‘a Sihova ko e ‘Otua Mohu Hōsitē, ko e ‘Otua ‘o ‘Isileli: Ko au eni ‘oku ou ‘omi ki Siuta, pea ki he nofo Selusalema fua pē, ‘a e kovi kotoa na‘a ku lea ki ai ‘iate kinautolu: koe‘uhi na‘a ku lea kiate kinautolu, ka na‘e ‘ikai te nau tokanga; pea na‘a ku ui kinautolu, ka na‘e ‘ikai te nau tali.
18Pea lea ‘a Selemaia kia ha‘a Lēkapi, Ko e folofola eni ‘a Sihova Sāpaoti, ko e ‘Otua ‘o ‘Isileli: ko e me‘a ‘i ho‘omou fakaongo ki he tu‘utu‘uni ‘a Sionatapi ko ho‘omou kui, pea kuo mou tauhi ‘ene ngaahi fekau, mo fai tatau tofu pē mo e me‘a na‘a ne tu‘utu‘uni atu; ko ia ko e folofola eni ‘a Sihova Sāpaoti, ko e ‘Otua ‘o ‘Isileli: 19‘E ‘ikai hala ha tangata ‘o Sionatapi foha ‘o Lēkapi, ke tu‘u ‘i hoku ‘ao ‘o ta‘engata.
Currently Selected:
KO SELEMAIA 35: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
