KO SELEMAIA 34
34
Ko ha Fakahā meia Selemaia ma‘a Setekaia
1KO E folofola na‘e hoko kia Selemaia meia Sihova, lolotonga ‘oku fai tau ki Selusalema mo hono ngaahi kolo ‘e Nepukanesa ko e Tu‘i Pāpilone, mo ‘ene tau kotoa, mo e ngaahi pule‘anga ‘o māmani na‘e fakaongo kiate ia, mo e ngaahi kakai–#2 Tu‘i 25.1-11; 2 Kal 36.17-21 2Ko e folofola eni ‘a Sihova ko e ‘Otua ‘o ‘Isileli, ‘Alu, ‘o lea kia Setekaia ko e Tu‘i Siuta, ‘o ke pehē ki ai, Ko e folofola eni ‘a Sihova, Ko au eni te u tuku ‘a e kolo ni ki he nima ‘o e Tu‘i Pāpilone, pea te ne tutu ia ‘aki ‘a e afi. 3Pea ‘e ‘ikai te ke hao koe mei hono nima, ka kuo pau ke puke koe, ‘o tuku ki hono nima; pea ko ho mata ‘e sio ki he mata ‘o e Tu‘i Pāpilone, pea ko hono ngutu ‘e lea ki ho ngutu, pea te ke ‘alu ki Pāpilone. 4Ka ke fanongo pē ki he folofola ‘a Sihova, ‘e Setekaia ko e Tu‘i Siuta: Ko e folofola eni ‘a Sihova kiate koe, ‘E ‘ikai te ke mate ‘i he heletā; te ke pekia melino pē; 5pea ‘e ai ha fu‘u takipō kakala, hangē ko ho‘o ngaahi kui, ‘a e ngaahi tu‘i mu‘a na‘e holomu‘a ‘iate koe: ‘e pehē ‘enau fai ha takipō kiate koe; pea te nau tēngihia koe, ‘o nau pehē, ‘Ēī ‘oiauē!–he ko e lea ni kuo u fai ‘e au; ko Sihova ia mei he Ta‘ehāmai.
6Pea hanga ‘a Selemaia ko e palōfita, ‘o ne ‘a‘au ‘a e ngaahi lea ko ia kotoa ki Selusalema, kia Setekaia ko e Tu‘i Siuta, 7lolotonga ‘oku fai tau ki Selusalema ‘e he tau ‘a e Tu‘i Pāpilone, pea ki he ngaahi kolo ‘o Siuta kātoa na‘e toe, ‘io, ki Lākisi mo ‘Āseka; he ko kinaua pē ‘i he ngaahi kolo ‘o Siuta na‘e toe ‘oku ‘aa‘i.
Ko Hano Lohiaki‘i ‘o ha Kau Pōpula
8Ko e folofola na‘e hoko kia Selemaia meia Sihova, hili ‘a e fai kovinānite ‘a Kingi Setekaia mo e kakai kotoa na‘e ‘i Selusalema, ke fanongonongo tau‘atāina ki he fa‘ahinga ko ē; 9ke takitaha tuku atu tau‘atāina pē ‘ene tamaio‘eiki mo ‘ene kaunanga, ‘a ia ‘oku tangata Hepelū pe fefine Hepelū; ‘o ‘oua te nau ngaohi ke hopoate ha taha ‘i he fa‘ahinga ko ē, he ko e Siu ko hono kāinga. 10Pea na‘e talangofua ‘a e hou‘eiki kotoa mo e kakai kotoa na‘e kau ‘i he fuakava, ko ‘enau takitaha tuku tau‘atāina ‘ene tamaio‘eiki mo ‘ene kaunanga, ke ‘oua te nau kei hopoate kiate kinautolu; ‘io, na‘a nau talangofua, ‘o tukuange pē. 11Kae hili ‘enau fai pehē, pea nau momou, ‘o nau fakafoki mai ‘a e kau tamaio‘eiki mo e kau kaunanga kuo nau tuku atu ke tau‘atāina, ‘o nau fakamālohi‘i kinautolu ke nau toe tamaio‘eiki mo kau kaunanga.
12Pea hoko ‘a e folofola ‘a Sihova kia Selemaia meia Sihova, ‘o pehē, 13Ko e folofola eni ‘a Sihova, ko e ‘Otua ‘o ‘Isileli: Na‘a ku fai kovinānite au mo ho‘omou ngaahi kui ‘i he taimi na‘a ku ‘ohake ai kinautolu mei ‘Isipite, mei he fale pōpula, ‘o pehē, 14‘I he ‘osi ha fitu‘i ta‘u, te mou tukuange takitaha hono kāinga, ‘a e Hepelū kuo ne fakatau ia kiate koe, ‘io, te ne ngāue kiate koe ‘o ta‘u ono, pea te ke toki tukuange ke ‘alu tau‘atāina: ka na‘e ‘ikai tokanga kiate au ‘e ho‘omou ngaahi kui, pea na‘e ‘ikai te nau fokotu‘u telinga mai.#‘Eki 21.2; Teu 15.12 15Ka ko kimoutolu na‘a mou tafoki ‘i he ‘aho ko ē, pea mou fai ‘a e me‘a na‘a ku matamatatotonu‘ia ai; he na‘a mou takitaha tala ‘a e tau‘atāina ki hono kaungā nonofo; pea na‘a mou fai ha fuakava ‘i hoku ‘ao, ‘i he fale ‘oku ui‘aki hoku hingoa. 16Ka na‘a mou toe liliu, ‘o mou va‘inga‘aki hoku hingoa, pea mou takitaha fakafoki mai ‘ene tamaio‘eiki mo ‘ene kaunanga, ‘a ia kuo mou tukuange ke tau‘atāina ke fai ‘enau fa‘iteliha; pea na‘a mou fakamālohia kinautolu, ke nofo tamaio‘eiki mo kaunanga kiate kimoutolu. 17Ko ia, ko e folofola eni ‘a Sihova, Ko kimoutolu kuo ‘ikai te mou talangofua kiate au, ke tala tau‘atāina takitaha ki hono kāinga pe kaungā nonofo: ka ko au eni ‘oku ou tala ‘oku mou tau‘atāina–ko Sihova ia mei he Ta‘ehāmai–‘oku mou ‘atā ki he heletā, mo e mahaki faka‘auha, mo e honge; pea te u tuku kimoutolu ko e me‘a ke tekatali ‘aki ‘e he ngaahi pule‘anga kotoa ‘o māmani. 18Pea te u ngaohi ‘a e kau tangata na‘e laka kehe mo ‘etau kovinānite, ‘a kinautolu kuo ‘ikai te nau tauhi ‘a e lea ‘o e kovinānite na‘a nau fai ‘i hoku ‘ao–‘io, te u ngaohi kinautolu ke hangē ko e kafi na‘a nau fahi ua ‘o laka ‘i he vaha‘a ‘o hono ngaahi konga; 19‘a e hou‘eiki Siuta, mo e hou‘eiki Selusalema, ‘a e kau ‘iunoke, mo e kau taula‘eiki, mo e kakai kotoa ‘o e fonua, ‘a kinautolu na‘e laka ‘i he vaha‘a ‘o e ngaahi konga kafi; 20pea te u tuku kinautolu ki he nima ‘o honau ngaahi fili, pea ki he nima ‘o e kakai ‘oku kumi ki he‘enau mo‘ui: pea ko honau ngaahi ‘anga‘anga ‘e hoko ‘o me‘akai ‘aki ‘e he manupuna ‘o e ‘atā, mo e manu ‘o e fonua. 21Pea ko Setekaia ko e Tu‘i Siuta mo hono hou‘eiki te u tuku ki he nima ‘o honau ngaahi fili, pea ki he nima ‘o e kakai ‘oku kumi ki he‘enau mo‘ui, pea ki he nima ‘o e tau ‘o e Tu‘i Pāpilone, ‘a ia kuo mātuku atu meiate kimoutolu. 22Ko au eni ‘oku ou fai tu‘utu‘uni–ko Sihova ia mei he Ta‘ehāmai–pea te u fakafoki kinautolu ki he kolo ni; pea te nau fai tau ki ai, ‘o hamu, pea te nau tutu ia ‘aki ‘a e afi: pea ko e ngaahi kolo ‘o Siuta te u tuku ke lala, ‘o ‘ikai ha nofo ai.
Currently Selected:
KO SELEMAIA 34: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
