KO SELEMAIA 30
30
Ko e ngaahi Tala‘ofa ‘a Sihova ki Hono Kakaí
1KO E folofola na‘e hoko kia Selemaia meia Sihova, ‘o pehē, 2Ko e folofola eni ‘a Sihova ko e ‘Otua ‘o ‘Isileli, Ke ke hanga ‘o tohi ‘a e ngaahi me‘a kuo u lea‘aki kiate koe ‘i ha tohi. 3He vakai ‘oku hoko mai ha taimi–ko Sihova ia mei he Ta‘ehāmai–‘a ia te u fakafoki ai ‘a e pōpula ‘o hoku kakai ‘Isileli mo Siuta–ko e folofola ia ‘a Sihova: pea te u fakafoki kinautolu ki he fonua na‘a ku ‘atu ki he‘enau ngaahi kui pea te nau ma‘u ia.
4Pea ko eni ia ‘a e ngaahi lea na‘e folofola‘aki ‘e Sihova, ‘o kau ki ‘Isileli mo Siuta. 5‘Io, ko eni ‘a e folofola ‘a Sihova: ‘Oku ongoonga‘a mai ‘a e fetete‘i, ‘a e ilifia, ‘o ‘ikai ha momo‘i fiemālie ai. 6Fehu‘i mu‘a ‘o vakai pe ‘oku fā‘ele ha tangata: pea ko e hā ē ‘oku ou sio ki he motu‘a kotoa pē ‘oku ne ala ki hono tapa‘i kete, ‘o hangē ha fefine fā‘ele, pea kuo liliu honau mata kotoa ‘o tea? 7‘Oiauē! he ko e ‘aho lahi ‘a e ‘aho ko ia, ‘o ‘ikai hano tatau: pea ko e taimi fakamamahi kia Sēkope; kae fakahaofi mai ia.
8Pea ‘i he taimi ko ia–ko Sihova Sāpaoti eni mei he Ta‘ehāmai–te u fesi‘i ‘ene ‘ioke mei ho kia, pea te u motuhi ho ngaahi ha‘i; pea ‘e ‘ikai toe fakafatongia‘i ia ‘eni muli: 9ka te nau tauhi kia Sihova ko honau ‘Otua, pea kia Tēvita ko honau tu‘i, ‘a ia te u fokotu‘u ma‘anautolu. 10Pea ‘oua te ke manavahē,#Sel 46.27-28 ‘a koe Sēkope ko ‘eku tamaio‘eiki–ko Sihova ia mei he Ta‘ehāmai–pea ‘oua te ke mo‘utāfu‘ua, si‘i ‘Isileli: he ko au eni te u fakahaofi koe mei he potu mama‘o na, pea mo ho hako mei he fonua ‘oku nau pōpula ai; pea ‘e foki ‘a Sēkope ‘o nonga, ‘o nofo falala, ‘o ‘ikai ha taha ke ne ilifia ai. 11He ‘oku ou ‘iate koe ‘e au–ko Sihova eni mei he Ta‘ehāmai–ke fakahaofi koe; pea te u faka‘osi ‘a e ngaahi pule‘anga na‘a ku veteki koe ki ai, kae ‘ikai te u faka‘osi koe; ka te u tautea koe ke fe‘unga, ‘o ‘ikai te u tuku koe ke ‘alu ta‘etautea ‘aupito.
12He ko e folofola eni ‘a Sihova, ‘Oku matamata kovi ho lavea, kuo o‘o ho tā. 13‘Oku ‘ikai ha taha ke fakamo‘ui ho‘o me‘a, ‘oku ‘ikai ha‘o faito‘o; hao ‘oposi ki he kafo. 14Kuo fakangalongalo‘i koe ‘e ho kau ‘ofa‘anga; ‘oku ‘ikai te nau kumi kiate koe; he kuo u taa‘i koe ‘aki ‘a e tā ‘a ha fili, ‘aki ‘a e tautea ‘a ha taha manako fakamamahi: koe‘uhi na‘e lahi ho‘o faikovi, na‘e fokotu‘uniu ho‘o ngaahi angahala. 15Ko e hā ‘oku ke tangi kaila ai ‘i ho lavea? Ko e matamatakovi ho kafo? Koe‘uhi ko e lahi ho‘o faikovi, ‘a e fokotu‘uniu ho‘o ngaahi angahala, ko ia ia kuo u fai pehē ai kiate koe. 16Ko ia ko kinautolu kotoa ‘oku keina koe, ‘e keina kinautolu; pea ko kinautolu ‘oku fakamamahi‘i koe, ‘e taki pōpula honau kotoa; pea ko kinautolu ‘oku kaiha‘a meiate koe, ‘e nofo kaiha‘asia; pea ko kinautolu na‘e vete koe, te u tuku ke vetea. 17He te u fakakili mai koe, pea te u faito‘o ho ngaahi lavea–ko Sihova ia mei he Ta‘ehāmai: kuo nau ui koe ko e kapusia, tokua ko Saione, ko e fefine ‘oku ‘ikai kumi ha taha ki ai.
18Ko e folofola eni ‘a Sihova, Ko au eni te u liliu ‘a e pōpula ‘a e ngaahi tēniti ‘o Sēkope, pea te u faka‘atu‘i hono ngaahi nofo‘anga; pea ‘e toe langa ‘a e kolo ‘i hono fo‘i mā‘olunga ‘o‘ona, pea ‘e nofo‘ia ‘a e palasi ‘i hono anga ‘o‘ona. 19Pea ‘e ‘alu atu meiate kinautolu ‘a e fakafeta‘i, mo e le‘o ‘o e kakai ‘oku kata; pea te u fakatokolahi kinautolu, pea ‘e ‘ikai te nau toko si‘i; pea te u fakalāngilangi‘i kinautolu, pea ‘e ‘ikai te nau ngali iiki. 20Pea ko ‘enau fānau ‘e hangē ko e taimi mu‘a, pea ko ‘enau fakataha ‘e fokotu‘u ma‘u ‘i hoku ‘ao, pea te u tautea ‘a kinautolu kātoa ‘oku fakamamahi kinautolu. 21Pea ko hono ‘eiki ko e taha ‘iate kinautolu, pea ko hono pule ko e tupu mei honau lotolotonga; pea te u fakaofiofi ia, pea te ne ‘unu kiate au: ka ko hai tū ia ‘e falala pehē ki hono loto ke fie ‘unu‘unu kiate au?–ko Sihova ia mei he Ta‘ehāmai. 22Pea te mou hoko ko hoku kakai, pea te u hoko au ko homou ‘Otua.
23Sī! ko e ‘ahiohio ē ‘a Sihova–ko ‘ene tafulu ‘oku ‘alu atu!–ko ha ‘ahiohio feolo: ‘e tataha ‘aki ‘a e ‘ulu ‘o e kau faikovi. 24‘Ē, ‘ikai foki ‘a e kakaha ‘o e houhau ‘o Sihova, kae‘oua ke ‘osi fai, pea ‘oua ke fakaai ‘a e ngaahi fakakaukau ‘a hono finangalo: ‘i he ngaahi ‘aho faka‘osi ‘e hā ki homou ‘atamai ‘a e ngaahi me‘a ko ia.
Currently Selected:
KO SELEMAIA 30: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
