KO SELEMAIA 29
29
Ko e Fai Tohi ‘a Selemaia ki he Kakai Siu ‘i Pāpiloné
1PEA ko eni ‘a e lea ‘o e tohi na‘e tuku atu ‘e he palōfita ko Selemaia mei Selusalema ki hono toe ‘o e mātu‘a na‘e taki pōpula, pea ki he kau taula‘eiki, pea ki he kau palōfita, pea ki he kakai kotoa kuo ‘ave pōpula ‘e Nepukanesa mei Selusalema ki Pāpilone.#2 Tu‘i 24.12-16; 2 Kal 36.10 2(Ko e hili ia ‘a e ‘alu mei Selusalema ‘a Kingi Sekonaia mo e ma‘itaki, mo e kau ‘iunoke, mo e hou‘eiki ‘o Siuta mo Selusalema, mo e kau tufunga, mo e kau tuki ukamea). 3Na‘e ‘ave ‘a e tohi ‘e ‘Ēlasa foha ‘o Sāfani, mo Kemalaia foha ‘o Hilikaia, (‘a ia ko e ongo me‘a na‘e fekau ‘e Setekaia ko e Tu‘i Siuta, ke ‘alu ki Pāpilone kia Nepukanesa koe Tu‘i Pāpilone). 4Ko hono anga eni: Ko e folofola eni ‘a Sihova Sāpaoti, ko e ‘Otua ‘o ‘Isileli, ki he kau pōpula, ‘a ia na‘a ku o‘i ke ‘ave pōpula mei Selusalema ki Pāpilone: 5Mou langa fale, ‘o nofo ai; ‘o tō ngouetapu, ‘o kai hono fua; 6ma‘u uaifi, pea fakatupu fānau tangata mo fānau fefine; pea ma‘u uaifi ma‘a ho‘omou fānau tangata, pea ‘ange ho‘omou fānau fefine ke nonofo mo ha kau tangata, ke nau fā‘ele‘i ha fānau tangata mo ha fānau fefine; pea mou tupu ‘i he potu ko ena, ‘o ‘oua ‘e faka‘au ki mui. 7Pea mou mamahi‘i ‘a e tu‘umālie ‘o e kolo kuo u ‘ave pōpula kimoutolu ki ai, pea mou hūfia ia kia Sihova; he ko ‘ene tu‘umālie ko ho‘omou tu‘umālie ia. 8He ko e folofola eni ‘a Sihova Sāpaoti, ko e ‘Otua ‘o ‘Isileli, ‘Oua na‘a takihee‘i kimoutolu ‘e he kau palōfita ‘oku nofo ‘i homou lotolotonga, mo ho‘omou kau tongafisi, pea ‘oua te mou fakaongo ki ho‘omou ngaahi misi ‘oku mou langa‘i ‘e kimoutolu.#29.8 ho‘omou… kimoutolu; Ko hono faka-Hepeluú ia, ka ‘oku ngali tonu hono hiki ‘o: he‘enau… kinautolu. 9He ko e loi pē ‘a e palofisai ‘a e fa‘ahinga ko ia kiate kimoutolu ‘i hoku hingoa: na‘e ‘ikai te u fekau kinautolu–ko Sihova ia mei he Ta‘ehāmai. 10He ko e folofola eni ‘a Sihova, Ka kakato leva ma‘a Pāpilone ‘a e fitungofulu‘i ta‘u, te u ‘a‘ahi kiate kimoutolu, pea te u fakaai ‘eku tala‘ofa kiate kimoutolu, ke fakafoki kimoutolu ki he potu ni.#2 Kal 36.21; Sel 25.11; Tān 9.2 11He ‘oku ou ‘ilo pē ‘a e ngaahi fakakaukau ‘oku ou fakakaukau kiate kimoutolu–ko Sihova ia mei he Ta‘ehāmai–ko e ngaahi fakakaukau lelei, ‘o ‘ikai sio kovi, ke ‘ange kiate kimoutolu ha ‘amui mo ha ‘amanaki.#29.11 ha ‘amui… ‘amanaki; pe ‘a e ‘amui ‘oku mou ‘amanaki ki aí. 12Pea te mou tautapa kiate au, pea te mou ‘alu ‘o hū kiate au, pea te u ongo‘i kimoutolu. 13Pea te mou kumi kiate au, ‘o ma‘u au, ‘o kapau te mou kumi ‘aki ‘a e kotoa ‘o homou loto.#Teu 4.29 14‘Io, te u tuku ke mou ma‘u au–ko Sihova ia mei he Ta‘ehāmai–pea te u liliu ho‘omou nofo pōpula, pea te u tānaki kimoutolu mei he ngaahi pule‘anga mo e ngaahi potu kehekehe, ‘a ia kuo u fakateka kimoutolu ki ai–ko Sihova ia mei he Ta‘ehāmai–pea te u fakafoki kimoutolu ki he potu, ‘a ia kuo u ‘ave pōpula kimoutolu mei ai. 15Tokua kuo mou pehē, Kuo fokotu‘u ma‘atautolu ‘e Sihova ha kau palōfita ‘i Pāpilone. 16Pea ko eni ‘a e folofola ‘a Sihova ‘i he tu‘i ‘oku nofo ‘i he taloni ‘o Tēvita, mo e kakai kotoa ‘oku nofo ‘i he kolo ni, hamou kāinga na‘e ‘ikai ‘alu mo kimoutolu ‘i he taki pōpula; 17ko e folofola eni ‘a Sihova Sāpaoti: Ko au eni ‘oku ou tuku atu kiate kinautolu ‘a e heletā, ‘a e honge, mo e mate faka‘auha, pea te u ngaohi kinautolu ke hangē koni fiki fakalielia, ‘a ia ‘e ‘ikai lava hono kai ko ‘ene kovi. 18Pea te u tuli kiate kinautolu ‘aki ‘a e heletā, ‘aki ‘a e honge, pea ‘aki ‘a e mahaki faka‘auha, pea te u ngaohi kinautolu ko e me‘a ke tekatali ‘aki ‘e he ngaahi pule‘anga ‘o māmani, ko e me‘a ke fai ai ha kape, mo ha ofo, mo ha faka‘ise‘isa, mo ha manuki, ‘i he lotolotonga ‘o e ngaahi kakai kuo u fakateka kinautolu ki ai: 19ko e ‘ātunga ‘o e ‘ikai te nau fie fakaongo ki he‘eku ngaahi lea–ko Sihova ia mei he Ta‘ehāmai–he‘eku tuku atu kiate kinautolu ‘eku kau sevāniti ko e kau palōfita, ‘o u ‘ā hengihengi, ‘o fekau atu; ka na‘e ‘ikai te mou fie ongo‘i–ko Sihova ia mei he Ta‘ehāmai. 20Ko ia, mou fanongo ki he folofola ‘a Sihova, ‘a kimoutolu kotoa ‘oku ‘i he taki pōpula, ‘a ia kuo u kapusi mei Selusalema ki Pāpilone. 21Ko e folofola eni ‘a Sihova Sāpaoti, ko e ‘Otua ‘o ‘Isileli, ‘o kau kia ‘Ēhapi foha ‘o Kolaia, pea mo Setekaia foha ‘o Ma‘aseia, ‘a ia ‘oku na palofisai loi kiate kimoutolu ‘i hoku hingoa: Ko au eni ‘oku ou tuku kinaua ki he nima ‘o Nepukanesa ko e Tu‘i Pāpilone; pea te ne taa‘i kinaua ‘i homou ‘ao. 22Pea ‘e tupu meiate kinaua ha kape, ‘o fai‘aki ‘e he kau pōpula kotoa ‘o Siuta ‘oku ‘i Pāpilone, ‘o pehē, Taumaiā ke ngaohi koe ‘e Sihova ke hangē ko Setekaia mo ‘Ēhapi, ‘a ia na‘e fakamomofi ‘e he Tu‘i Pāpilone: 23koe‘uhiā kuo na fai vale ‘i ‘Isileli, pea kuo na tono‘i ‘a e uaifi ‘o hona kaungā‘api, pea kuo na tala ‘a e ngaahi lea ‘i hoku hingoa, ka ko e loi, he na‘e ‘ikai te u fekau kinaua. Ka ko au ia ‘oku ou ‘ilo mo fakamo‘oni ki ai#29.23 Ka… ki ai; pe na‘á ku sio ki he‘enau fai iá. –ko Sihova ia mei he Ta‘ehāmai.
Ko e Fai Tohi ‘a Sēmaia
24Pea ko e me‘a kia Sēmaia ko e matāpule Nehelami, te ke lea ‘o pehē, 25Ko e folofola eni ‘a Sihova Sāpaoti, ko e ‘Otua ‘o ‘Isileli: Ko e me‘a ‘i ho‘o fai ‘a e ngaahi tohi ‘i ho hingoa ‘o‘ou ki he kakai kehekehe ‘oku ‘i Selusalema, kae‘uma‘ā kia Sefanaia foha ‘o Ma‘aseia ko e taula‘eiki, pea ki he kau taula‘eiki kotoa, ‘o pehē, 26Kuo ngaohi koe ‘e Sihova ke taula‘eiki, ko e fetongi ‘o e taula‘eiki ko Sihoiata, koe‘uhi ke ai ha kau ‘ōfisa#29.26 kau ‘ōfisa; Ko hono faka-Hepeluú ia, ka ‘oku pehē ‘i hono ngaahi hiki fuoloa ‘e ni‘ihi: ‘ōfisa. ‘i he fale ‘o Sihova ke tokanga ki he tangata fua pē ‘oku sesele, ‘o fie palofisai, ke ke tuku ia ki he ‘akau kii‘i. 27Pea ko eni, ko e hā kuo ‘ikai te ke valoki ai ‘a Selemaia mei ‘Anatoti, ‘a ia ‘oku ne fie nofo ko e palōfita kiate kimoutolu? 28He kuo ne fekau kiate kimautolu ‘i Pāpilone, ‘o pehē, ‘E fuoloa ‘a e me‘a: mou langa fale, ‘o nofo ai; pea tō ngouetapu, ‘o kai hono fua.
29Pea na‘e lau ‘e he taula‘eiki ko Sefanaia ‘a e tohi ke fanongo ki ai ‘a e palōfita ko Selemaia. 30Pea hoko ‘a e folofola ‘a Sihova kia Selemaia, ‘o pehē, Fekau atu kiate kinautolu kotoa ‘oku ‘i he taki pōpula, ‘o pehē, 31Ko e folofola eni ‘a Sihova, ‘o kau kia Sēmaia ko e matāpule Nehelami: Ko e me‘a ‘i he fai palofisai ‘e Sēmaia kiate kimoutolu, ka na‘e ‘ikai te u fekau ia ‘e au, pea kuo ne fai ke mou tui ki ha loi; 32ko ia ko e folofola eni ‘a Sihova, Ko au eni te u tautea ‘a Sēmaia ko e matāpule Nehelami, pea mo hono hako; ‘e ‘ikai hano tangata ke nofo ‘i he lotolotonga ‘o e kakai ni, pea ‘e ‘ikai te ne mamata ki he lelei ‘oku ou ‘amanaki fai ki hoku kakai–ko Sihova ia mei he Ta‘ehāmai–he kuo ne lea angatu‘u kia Sihova.
Currently Selected:
KO SELEMAIA 29: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
