KO SELEMAIA 28
28
Ko Selemaia mo e Palōfita Ko ‘Ananaia
1PEA na‘e ai ha me‘a na‘e hoko ‘i he ta‘u ko ia, ‘i he taimi kimu‘a ‘o e pule ‘a Setekaia ko e Tu‘i Siuta,#28.1 ‘i he ta‘u… Siutá; Ko hono faka-Hepeluú ia, ka ‘oku pehē ‘i he hiki fuoloa ‘e taha: ‘I he ta‘u pē ko iá. ‘io, ‘i hono fā ta‘u mo hono nima māhina; ko ‘Ananaia ko e foha ‘o e palōfita ko ‘Āsuli, ‘a ia ko e tangata Kipione, na‘a ne lea mai kiate au ‘i he fale ‘o Sihova, ‘i he ‘ao ‘o e kau taula‘eiki mo e kakai kotoa, ‘o pehē,#2 Tu‘i 24.18-20; 2 Kal 36.11-13 2Ko e folofola eni ‘a Sihova Sāpaoti, ko e ‘Otua ‘o ‘Isileli: Kuo u fesi‘i ‘a e ‘ioke ‘a e Tu‘i Pāpilone. 3‘Oku toe pē ha ta‘u ‘e ua mālō, pea te u fakafoki ki he potu ni ‘a e nāunau kotoa ‘o e fale ‘o Sihova, ‘a ia na‘e to‘o ‘e Nepukanesa ko e Tu‘i Pāpilone mei he potu ni, ‘o ‘ave ki Pāpilone: 4pea ko Sekonaia foha ‘o Sihoiakimi, ko e Tu‘i Siuta, mo e kau pōpula kotoa ‘o Siuta na‘e ‘alu ki Pāpilone, te u fakafoki kinautolu ‘e au ki he potu ni–ko Sihova ia mei he Ta‘ehāmai–he te u fesi‘i ‘a e ‘ioke ‘a e Tu‘i Pāpilone.
5Pea tali ‘a e palōfita ko Selemaia ki he palōfita ko ‘Ananaia ‘i he ‘ao ‘o e kau taula‘eiki, pea ‘i he ‘ao ‘o e kakai kātoa na‘e tu‘u ‘i he fale ‘o Sihova, 6‘io, na‘e pehē ‘e he palōfita ko Selemaia, ‘Ēmeni: tauange mo Sihova ke ne fakaai ‘a e ngaahi lea kuo ke palofisai ‘aki, ‘o fakafoki ‘a e nāunau ‘a Sihova, mo e kau pōpula kotoa mei Pāpilone ki he potu ni. 7Ka ko eni, ke ke fanongo mu‘a ki he lea ni ‘oku ou ‘ai ki ho telinga, mo e telinga ‘o e kakai kotoa: 8Ko e kau palōfita na‘e holomu‘a ‘iate au mo koe, talu mei mu‘a, na‘a nau fai ‘enau palofisai ki he ngaahi fonua lahi, pea ki he ngaahi pule‘anga mā‘olunga, ‘o lau ki he tau mo e kovi mo e mahaki faka‘auha. 9Ka ai ha palōfita ‘oku palofisai ki he melino, ka toki hokosia ‘a e lea ‘a e palōfita ko ia, pea mahino ai ko e palōfita ia kuo fekau mo‘oni mai ‘e Sihova.
10Toki to‘o ‘e he palōfita ko ‘Ananaia ‘a e ‘akau ‘o e ‘ioke mei he kia ‘o e palōfita ko Selemaia, ‘o ne fesi‘i ia. 11Pea lea ‘a ‘Ananaia ‘i he ‘ao ‘o e kakai kotoa, ‘o pehē, Ko e folofola eni ‘a Sihova: ‘E pehē ‘eku fesi‘i ‘a e ‘ioke ‘a Nepukanesa ko e Tu‘i Pāpilone mei he kia ‘o e ngaahi pule‘anga kotoa pē, ‘i he ‘osi ‘a e ta‘u ‘e ua mālō. Pea laka atu ai ki tu‘a ‘a e palōfita ko Selemaia, ‘o ‘alu.
12Pea hoko ‘a e folofola ‘a Sihova kia Selemaia, hili ‘a e fesi‘i ‘e he palōfita ko ‘Ananaia ‘a e ‘ioke mei he kia ‘o e palōfita ko Selemaia, ‘o pehē, 13‘Alu, ‘o lea kia ‘Ananaia, ‘o pehē, Ko e folofola ‘a Sihova eni: Ko e ‘ioke ‘akau na‘a ke fesi‘i; ka te ke#28.13 ke; Ko hono faka-Hepeluú ia, ka ‘oku pehē ‘i he hiki fuoloa ‘e taha: ne. fetongi ‘aki ‘a e ‘ioke ‘aione. 14He ko e folofola eni ‘a Sihova Sāpaoti, ko e ‘Otua ‘o ‘Isileli: Ko e ‘ioke ‘aione kuo u ‘ai ki he kia ‘o e ngaahi pule‘anga kotoa, ke nau ngāue kia Nepukanesa ko e Tu‘i Pāpilone; ‘io, te nau hopoate ki ai: pea na‘a mo e manu ‘o e vao kuo u tuku kiate ia.
15Pea na‘e toki lea ‘a e palōfita ko Selemaia ki he palōfita ko ‘Ananaia, Fanongo mai, ‘Ananaia; kuo ‘ikai fekau koe ‘e Sihova; ka ‘oku ke ngaohi ‘a e kakai ni ke tui ki ha loi. 16Ko ia ko e folofola eni ‘a Sihova, Ko au eni ‘oku ou fekau ke ke ‘alu mei he funga ‘o e kelekele: ko e ta‘u ni te ke mate ai, koe‘uhi kuo ke fai angatu‘u kia Sihova.
17Pea na‘e pekia ‘a e palōfita ko ‘Ananaia ‘i he ta‘u ko ia, ‘i hono māhina fitu.
Currently Selected:
KO SELEMAIA 28: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
