KO SELEMAIA 26
26
Ko Hano Faka‘ilo ‘o Selemaia
1HE kamata‘anga ‘o e pule ‘a Sihoiakimi foha ‘o Siosaia ko e Tu‘i Siuta, na‘e hoko mai ‘a e folofola ko eni meia Sihova, ‘o pehē, Ko e folofola eni ‘a Sihova.#2 Tu‘i 23.35–24.6; 2 Kal 36.5-7 2Ke ke tu‘u ‘i he loto‘ā ‘i he fale ‘o Sihova, pea ke ke tala ki he ngaahi kolo ‘o Siuta, ‘oku hū mai ke fai ‘enau lotu ‘i he fale ‘o Sihova, ‘a e ngaahi lea kotoa ‘oku ou tu‘utu‘uni atu ke ke fai kiate kinautolu; ‘oua te ke li‘aki ha fo‘i lea. 3Hei‘ilo te nau tali, ‘o foki takitaha mei hono ‘alunga kovi; ka u fakatomala ‘i he kovi ‘oku ou fakakaukau ke fai kiate kinautolu koe‘uhi ko e kovi ‘enau ngaahi fai anga.
4Pea te ke pehē kiate kinautolu, Ko e folofola eni ‘a Sihova: Kapau ‘e ‘ikai te mou fakaongo kiate au, ke fou ‘i he‘eku lao, ‘a ia kuo u tuku ‘i homou ‘ao, 5mo fakaongo ki he lea ‘a hoku kau sevāniti ko e kau palōfita, ‘a ia na‘a ku fekau atu kiate kimoutolu, ‘o u ‘ā hengihengi ‘o fekau atu, ka na‘e ‘ikai te mou fakaongo; 6pea te u ngaohi ‘a e fale ni ke hangē ko Sailo,#26.6 Sailo; Vakai ki he 7.12. pea ko e kolo ko ena te u tuku ko e me‘a ke kape ki ai ‘a e ngaahi pule‘anga kotoa ‘o māmani.#Sios 18.1; Saame 78.60; Sel 7.12-14
7Pea na‘e fanongo ‘a e kau taula‘eiki mo e kau palōfita mo e kakai kotoa kia Selemaia, ‘ene fai ‘a e ngaahi lea ko ia ‘i he fale ‘o Sihova. 8Pea ‘i he ‘osi fai ‘e Selemaia ‘ene lea‘aki ‘a e lea kotoa kuo tu‘utu‘uni ‘e Sihova ke ne fai ki he kakai kotoa, na‘e puke ia ‘e he kau taula‘eiki mo e kau palōfita mo e kakai kotoa, ‘o nau pehē, Kuo pau te ke mate. 9Ko e hā ‘oku ke palofisai ai ‘i he huafa ‘o Sihova, ‘o pehē, ‘E hoko ‘a e fale ni ‘o hangē ko Sailo, pea ‘e lala ‘a e kolo ni ‘o ‘ikai ha nofo ai? Pea na‘e fakatefua mai ‘a e kakai kia Selemaia ki he fale ‘o Sihova.
10Pea ‘i he fanongo ‘a e hou‘eiki Siuta ki he ngaahi me‘a ko ia, na‘a nau me‘a hake mei he fale ‘o e tu‘i ki he fale ‘o Sihova; ‘o nau nofo ‘i he hū‘anga ‘o e matapā ‘o Sihova, ‘a e matapā fo‘ou. 11Pea tali ‘a e kau taula‘eiki mo e kau palōfita ki he hou‘eiki mo e kakai kotoa, ‘o pehē, Ko e tautea totonu ‘o e tangata ni ko e mate; he kuo ne palofisai ‘a e ngaahi me‘a ki he kolo ni, hangē ko ia kuo fanongo ki ai homou telinga.
12Pea tali ‘e Selemaia ki he hou‘eiki kotoa mo e kakai kotoa, ‘o pehē, Na‘e fekau au ‘e Sihova ke palofisai ki he fale ni mo e kolo ni, ‘o fai‘aki ‘a e ngaahi lea kuo mou fanongo ki ai. 13Pea ko eni, mou ngaohi ke lelei homou ngaahi ‘alunga mo ho‘omou ngaahi fai anga, pea fakaongo ki he le‘o ‘o Sihova ko homou ‘Otua; pea ‘e toki fakatomala ‘e Sihova ‘i he kovi na‘e tala ‘e hoko kiate kimoutolu. 14Pea ko e me‘a kiate au, vakai, ‘oku ou ‘i homou nima; mou fai kiate au ‘a e me‘a ‘oku hā lelei mo totonu kiate kimoutolu. 15Ka ke mou ‘ilo pau, kapau te mou hanga ‘o tāmate‘i au, ko ho‘omou fusi mai ‘a e mala ‘o e lingi toto tu‘unga‘a pē kiate kimoutolu, pea ki he kolo ni, mo e nofo ‘i ai: he kuo fekau mo‘oni au ‘e Sihova kiate kimoutolu, ke lea‘aki ‘i homou telinga ‘a e ngaahi lea kotoa ko ia.
16Pea tali ‘a e hou‘eiki mo e kakai kotoa ki he kau taula‘eiki mo e kau palōfita, ‘Oku ‘ikai totonu ke tautea ‘a e tangata ni ‘aki ‘a e mate; he kuo ne lea kiate kitautolu ‘i he huafa ‘o Sihova ko hotau ‘Otua.
17Pea tu‘u hake ha tu‘unga me‘a ko e ni‘ihi ‘i he kau mātu‘a ‘o e fonua, ‘o nau lea ki he fakataha kotoa ‘o e kakai, ‘o pehē, 18Ko Maika mei Molese na‘e fai palofisai ia ‘i he taimi ‘o Hesekaia ko e Tu‘i Siuta; pea na‘a ne lea ki he kau Siuta kotoa, ‘o pehē, Ko e folofola eni ‘a Sihova Sāpaoti:#Maiká 3.12 ‘E keli ‘a Saione hangē ha ngoue‘anga, pea ‘e hoko ‘a Selusalema koni ngaahi tuva maka, pea ko e mo‘unga ‘oku tu‘u ai ‘a e fale ‘e hoko ko e ngaahi mā‘olunga ‘i ha vao tātā. 19He na‘e momo‘i tāmate‘i ia ‘e Hesekaia ko e Tu‘i Siuta mo e kau Siuta? ‘Ikai na‘a ne ‘apasia kia Sihova, ‘o ne fai ke fakamokomoko ‘a e finangalo ‘o Sihova? pea na‘e fakatomala ai ‘e Sihova ‘i he kovi kuo ne tala ‘e hoko kiate kinautolu. Pea na‘a ‘iloange te tau fai ha fu‘u kovi ‘e tō ki he‘etau mo‘ui.
20Pea na‘e ai mo ha tangata foki na‘e fai palofisai ‘i he huafa ‘o Sihova, ko ‘Ūlaia foha ‘o Sēmaia mei Kiliatisialimi; pea ko e palofisai na‘a ne fai ki he kolo ni pea ki he fonua ni na‘e tatau mātē mo e ngaahi lea ‘a Selemaia: 21pea ‘i he fanongo ‘e Kingi Sihoiakimi mo ‘ene kau helo mo e hou‘eiki ki he‘ene ngaahi lea, pea feinga ‘e he tu‘i ke tāmate‘i; ka ‘i he fanongo ki ai ‘a ‘Ūlaia, na‘a ne manavahē, ‘o ne hola ‘o ‘alu ki ‘Isipite. 22Ka ka fekau atu ‘e Kingi Sihoiakimi ha tu‘unga tangata ki ‘Isipite, ‘a ‘Elinetane foha ‘o ‘Akepoa, pea ai mo e ni‘ihi na‘a nau ō mo ia ki ‘Isipite: 23pea nau taki mai ‘a ‘Ūlaia mei ‘Isipite, ‘o ‘omi kia Kingi Sihoiakimi; ‘a ia na‘a ne taa‘i ia ‘aki ‘a e heletā, ‘o ne lī hono ‘anga‘anga ki he ngaahi fa‘itoka ‘o e kakai noa.
24Ka na‘e kau mo Selemaia ‘a ‘Ahikami foha ‘o Sāfani, ke ‘oua te nau tuku ia ki he nima ‘o e kakai ke tāmate‘i.
Currently Selected:
KO SELEMAIA 26: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
