KO SELEMAIA 25
25
Ko e Fili mei he Tokelaú
1KO E folofola na‘e tō kia Selemaia, ‘o kau ki he kakai Siuta kātoa, ‘i hono fā ‘o e ta‘u ‘o Sihoiakimi foha ‘o Siosaia ko e Tu‘i Siuta; ko e ‘uluaki ta‘u ia ‘o Nepukanesa ko e Tu‘i Pāpilone.#2 Tu‘i 24.1; 2 Kal 36.5-7; Tān 1.1-2 2Ko e folofola foki na‘e ‘a‘au ‘e he palōfita ko Selemaia ki he kakai Siuta kātoa, pea ki he nofo Selusalema kotoa, ‘o pehē: 3Talu ‘a e hongofulu mā tolu ta‘u ‘o Siosaia foha ‘o ‘Āmoni ko e Tu‘i Siuta, ‘o a‘u mai ki he ‘aho ko eni, ko e ta‘u ‘e uofulu mā tolu, mo e hoko ‘a e folofola ‘a Sihova kiate au, mo ‘eku lea kiate kimoutolu, ‘o u ‘ā hengihengi ‘o lea; kae ‘ikai te mou tali. 4Pea fekau atu kiate kimoutolu ‘e Sihova ‘ene fu‘u kau sevāniti ko e kau palōfita, ‘o ne ‘ā hengihengi ‘o fekau atu; kae ‘ikai te mou tali, pea na‘e ‘ikai te mou fokotu‘u telinga ke fanongo. 5Na‘a nau pehē atu, Mou tafoki mu‘a takitaha mei hono ‘alunga kovi, pea mei he kovi ‘o ho‘omou ngaahi fai anga, pea te mou toki nofo ‘i he kelekele ‘a ia na‘e foaki ‘e Sihova kiate kimoutolu, pea ki ho‘omou ngaahi kui, talu mei mu‘a ‘o fai ‘o ta‘engata. 6Pea ‘oua te mou muimui ‘otua kehe, ke tauhi kiate kinautolu, pea ke lotu ki ai, ke ‘oua te mou faka‘ita ‘aki au ‘a e ngāue ‘a homou nima; ‘o ‘oua na‘a ku fai ha kovi kiate kimoutolu. 7Ka na‘e ‘ikai te mou fakaongo kiate au–ko Sihova ia mei he Ta‘ehāmai–ko e fai ke fakatupu ‘eku ‘ita ‘aki ‘a e ngāue ‘a homou nima; pea mou kovi ai.
8Ko hono ō ia kuo folofola peheni ‘a Sihova Sāpaoti: Ko e me‘a ‘i he ‘ikai te mou fakaongo ki he‘eku ngaahi lea, 9ko au eni ‘oku ou fekau atu ke ma‘u mai ‘a e ngaahi fa‘ahinga kotoa pē ‘o e tokelau–ko Sihova ia mei he Ta‘ehāmai–pea ki he‘eku sevāniti ko Nepukanesa ko e Tu‘i Pāpilone, ke u ‘omi kinautolu ki he fonua ni, pea ki he kakai ‘oku nofo ai, pea ki he ngaahi pule‘anga takatakai; ke u mōifua kinautolu, pea ke u ngaohi kinautolu ko e me‘a ke fai ai ha ofo, mo ha faka‘ise‘isa, ‘io, ko e koto ka‘anga ta‘engata. 10Pea te u ‘ai ke mate meiate kinautolu ‘a e le‘o ‘o e fiefia, mo e le‘o ‘o e mavava, ‘a e le‘o ‘o e ‘eiki ta‘ane, mo e le‘o ‘o e ta‘ahine, ‘a e ongo ‘a e maka momosi, mo e ulo ‘a e maama.#Sel 7.34; 16.9; Fkhā 18.22-23 11Pea ‘e hoko ‘a e fonua ni kātoa ko e ka‘anga, mo e me‘a ke fai ai ha ofo; pea ‘e ngāue ‘a e ngaahi pule‘anga ni ki he Tu‘i Pāpilone, ‘o fitungofulu ta‘u.#2 Kal 36.21; Sel 29.10; Tān 9.2 12Pea ka kakato ‘a e fitungofulu‘i ta‘u, te u tautea ‘a e Tu‘i Pāpilone, mo e pule‘anga ko ia–ko Sihova ia mei he Ta‘ehāmai–koe‘uhi ko ‘enau faikovi, mo e fonua foki ‘o e kau Kalitia; ‘io, te u ngaohi ia ko e koto lala ‘o ta‘engata. 13Pea te u ‘omi ki he fonua ko ia ‘a e me‘a kotoa kuo u lea‘aki ke hoko ki ai, ‘io, ‘a e me‘a kotoa kuo tohi ‘i he tohi ni, ‘a ia kuo palofisai ‘aki ‘e Selemaia ki he ngaahi pule‘anga. 14He ‘e fakafatongia‘i kinautolu, ‘io, ‘a e fa‘ahinga ko ia foki, ‘eni pule‘anga lahi moni tu‘i mā‘olunga: pea te u totongi kiate kinautolu ke tuha mo ‘enau fai, mo e ngāue ‘a honau nima.
Ko Hono Fakamāu‘i ‘e he ‘Otuá ‘a e ngaahi Pule‘angá
15He ko e folofola eni ‘a Sihova ko e ‘Otua ‘o ‘Isileli kiate au, ‘o pehē: To‘o mei hoku nima ‘a e ipu uaine–‘a e tafulu ni–‘o fakainu ‘aki ‘a e ngaahi pule‘anga kotoa ‘oku ou fekau atu koe ki ai. 16Pea te nau inu, ‘o tāsipesipa, ‘o nau sesele ko e me‘a ‘i he heletā ‘oku ou tuku atu ki honau lotolotonga.
17Pea u to‘o ‘a e ipu mei he nima ‘o Sihova, pea u fakainu‘aki ‘a e ngaahi pule‘anga, ‘a ia na‘e fekau atu au ki ai ‘e Sihova; 18‘a Selusalema, mo e ngaahi kolo ‘o Siuta, mo hono ngaahi tu‘i, mo hono hou‘eiki, ke ngaohi kinautolu ko e ka‘anga, ko e me‘a ke fai ai ha ofo, mo ha faka‘ise‘isa, mo ha kape; ‘o hangē ko ia he ‘aho ni; 19‘a Felo ko e Tu‘i ‘Isipite, mo ‘ene kau tamaio‘eiki, mo hono hou‘eiki, mo hono kakai kotoa; 20mo e ngaahi fa‘ahinga kuo fefiofi, mo e ngaahi tu‘i ‘o e fonua ko ‘Usa, mo e ngaahi tu‘i ‘o e fonua ‘o e kau Filisitia, mo ‘Asikeloni, mo Kesa, mo ‘Ekiloni, mo e toe ‘o ‘Asitoti; 21‘a ‘Ītomi, mo Moape, mo Ha‘a ‘Āmoni, 22mo e ngaahi Tu‘i Taia, mo e ngaahi Tu‘i Saitoni; 23mo e ngaahi tu‘i ‘o e ngaahi motu mei he tu‘a tahi, ‘a Tētani, mo Teima, mo Pusa, mo e ha‘a Tele-tuliki-honau-kava; 24mo e ngaahi Tu‘i ‘Ālepea, mo e ngaahi tu‘i ‘o e ngaahi fa‘ahinga fefiofi ‘oku nofo ‘i he toafa; 25mo e ngaahi Tu‘i Sīmeli, mo e ngaahi Tu‘i ‘Īlami, mo e ngaahi Tu‘i Mītia; 26mo e ngaahi tu‘i kehekehe ‘o tokelau, ‘a e ofi mo e mama‘o, hokohoko atu; pea mo e ngaahi pule‘anga kotoa ‘o māmani ‘oku ‘i he funga ‘o e kelekele: pea fakamuimui ‘e inu ‘e he Tu‘i Sēsaki.#25.26 Tokua ko e fakakehe ia ‘o e lea Pāpiloné. ‘Oku toe hā he vahe 51 veesi 41.
27Pea te ke pehē kiate kinautolu, Ko e folofola eni ‘a Sihova Sāpaoti, ko e ‘Otua ‘o ‘Isileli; Mou inu ‘o konā ai, ‘o lua, ‘o tō, ‘o ‘oua ‘e toe tu‘u, ko e me‘a ‘i he heletā ‘oku ou fekau atu ki homou lotolotonga. 28Pea kapau te nau fakafisi ke to‘o ‘a e ipu mei ho nima, ‘o inu, pea te ke pehē kiate kinautolu, Ko e folofola eni ‘a Sihova Sāpaoti: kuo pau te mou inu. 29He ko au eni ‘oku ou kamata ke ngaohikovi‘i ‘a e kolo ‘oku ui‘aki hoku hingoa, pea ko e pehē ke mou hao kimoutolu? ‘E ‘ikai te mou ‘alu ta‘etautea: he te u ui kia Heletā ke tō ki he nofo kotoa ‘o māmani–ko Sihova Sāpaoti ia mei he Ta‘ehāmai.
30Ko ia, te ke palofisai kiate kinautolu, ‘o fai‘aki ‘a e ngaahi lea ko eni, pea te ke pehē kiate kinautolu, ‘E kālou ‘a Sihova mei Taukakapa, pea te ne tuku atu hono le‘o mei hono ‘afio‘anga tapu; te ne mātu‘aki kālou ki hono loto‘ā sipi; te ne tali ‘aki ha tau‘a‘alo, ‘o hangē ko e kau mala kālepi, ki he kau nofo he māmani. 31‘E a‘u ha longoa‘a ki he ngata‘anga ‘o māmani; he ‘oku ai ha fakakikihi ‘a Sihova mo e ngaahi pule‘anga, ‘e talatalaaki‘i ‘e ia ‘a e kakano kotoa; ko e me‘a ki he kau angahala, te ne tuku kinautolu ki he heletā–ko Sihova ia mei he Ta‘ehāmai.
32Ko e folofola eni ‘a Sihova Sāpaoti; Vakai, ko e kovi ē ‘e ‘alu mei he pule‘anga ki he pule‘anga, pea ‘e langa‘i hake ha fu‘u afā mei he ngaahi ngata‘anga ‘o māmani. 33Pea ‘e fokotu‘utu‘u ‘a e tā ‘a Sihova ‘i he ‘aho ko ia mei he ngata‘anga ‘e taha ‘o māmani, ‘o a‘u ki hono ngata‘anga ‘e taha: ‘e ‘ikai tēngihia kinautolu, pea ‘e ‘ikai tānaki, pea ‘e ‘ikai tanu; te nau hoko ko e kinoha‘a pe ‘i he funga kelekele.
34Tangi ‘oiauē, ‘a e kau tauhi sipi, pea ‘ioho; pea mou paniefua, ‘a e kau fotu ‘i he tākanga; he kuo kakato homou taimi ke tāmate‘i,#25.34 ‘Oku ‘i ai e fo‘i lea faka-Hepelū ‘e taha ‘oku tu‘u he kupu ko ení ka ‘oku ‘ikai ke mahino ‘a hono ‘uhingá. pea te u laiki kimoutolu, pea te mou tō hangē ha ipu mahu‘inga.#25.34 pea… mahu‘inga; Ko hono faka-Hepeluú ia, ka ‘oku pehē ‘i he hiki fuoloa ‘e taha: ‘e fahi kimoutolu ‘o hangē ha sipi tangatá. 35Pea kuo mole ‘aupito ‘a e hola‘anga mei he kau tauhi, mo e hao‘anga mei he kau fotu ‘i he tākanga. 36Sī! ko e ‘ioho ‘a e kau tauhi, mo e ‘oiauē ‘a e kau fatu ‘i he tākanga! he ‘oku faka‘auha ‘e Sihova ‘enau kaikai‘anga. 37Pea kuo fakalongo ‘a e ngaahi loto‘ā malu ‘i he fotu mai ‘a e kakaha ‘o e houhau ‘o Sihova. 38Kuo ne hanga ‘o li‘aki hono falenga,#25.38 Kuó ne… falengá [hono kakaí]; pe ‘Oku hola ‘a e kakai ‘a Sihová. hangē ha laione: seuke, kuo hoko honau fonua ko e me‘a ke fai ai ha ofo, ko e me‘a ‘i he kakaha ‘o e malaki na‘e fai, ‘io, ko e me‘a ‘i he kakaha hono houhau.
Currently Selected:
KO SELEMAIA 25: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
