KO SELEMAIA 24
24
Ko e Kato Fiki
1NA‘E fakasio au ‘e Sihova, pea tā ko e ongo kato fiki ‘oku tuku ‘i he mata temipale ‘o Sihova–ko e hili ia ‘a e taki pōpula ‘e Nepukanesa ko e Tu‘i Pāpilone ‘a Sekonaia foha ‘o Sihoiakimi ko e Tu‘i Siuta, pea mo e hou‘eiki Siuta, mo e kau tufunga, mo e kau tuki ukamea, mei Selusalema, ‘o ‘ave ki Pāpilone.#2 Tu‘i 24.12-16; 2 Kal 36.10 2Ko e kato fiki ‘e taha na‘e lelei ‘aupito, ‘o hangē ko e fiki tokamu‘a: ko e kato fiki ‘e taha na‘e kovi ‘aupito, ‘a ia ‘e ‘ikai lava hono kai ko ‘ene kovi. 3Pea folofola ‘a Sihova kiate au, Ko e hā ‘a e me‘a ‘oku ke sio ki ai, Selemaia?
Pea u pehē, Ko e ngaahi fiki; ko e ngaahi fiki lelei ‘oku lelei ‘aupito; pea ko e ngaahi fiki kovi ‘oku kovi ‘aupito, ‘o ‘ikai lava hono kai ko ‘enau kovi.
4Pea hoko ‘a e folofola ‘a Sihova kiate au, ‘o pehē, Ko e folofola eni ‘a Sihova, ko e ‘Otua ‘o ‘Isileli: 5Hangē ko e fai ki he ngaahi fiki lelei na, ‘e pehē ‘eku sio tokanga ki he kau pōpula ‘o Siuta, ‘a ia kuo u kapusi mei he potu ni ki he fonua ‘o e kau Kalitia. 6Pea ‘e hanga hoku mata kiate kinautolu ke nau lelei, pea te u fakafoki kinautolu ki he fonua ni: pea te u langa hake kinautolu, ‘o ‘ikai holoki; pea te u hunuki kinautolu, ‘o ‘ikai ta‘aki. 7Pea te u tuku kiate kinautolu ha loto ‘oku ‘ilo au, tokua ko Sihova au: pea te nau hoko ko hoku kakai, pea te u hoko au ko honau ‘Otua: he te nau foki kiate au ‘aki ‘a e kotoa ‘o honau loto.
8Pea ko e me‘a ki he ngaahi fiki kovi, ‘a ia na‘e ‘ikai lava hono kai ko ‘ene kovi–ko e folofola eni ‘a Sihova: Te u ngaohi ke hangē ko ia ‘a Setekaia ko e Tu‘i Siuta, mo hono hou‘eiki, mo e toenga ‘o Selusalema, ‘a kinautolu ‘oku toe ‘i he fonua ni, mo kinautolu ‘oku nofo ‘i ‘Isipite. 9Pea te u tuku kinautolu ko e me‘a ke tekatali ‘aki ‘e he ngaahi pule‘anga ‘o māmani ke nau kovi ai; ke nau hoko ko e me‘a ke manukia mo fakatokotokanaki ‘aki, ko e me‘a ke fai ai ha luma mo ha kape, ‘i he ngaahi potu te u fakateka kinautolu ki ai. 10Pea te u fekau atu kiate kinautolu ‘a e heletā, ‘a e honge, mo e mahaki faka‘auha, kae‘oua ke nau ‘osi mei he funga kelekele na‘a ku foaki kiate kinautolu, pea ki he‘enau ngaahi kui.
Currently Selected:
KO SELEMAIA 24: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
