KO SELEMAIA 23
23
Ko e ‘Amanaki Lelei ki he Kaha‘ú
1‘OIAUĒ ‘a e kau tauhi ‘oku maumau mo veteki ‘a e tākanga ‘oku ou fafanga!–ko Sihova ia mei he Ta‘ehāmai. 2Ko ia ko e folofola eni ‘a Sihova, ko e ‘Otua ‘o ‘Isileli ‘i he kau tauhi ‘oku tauhi hoku kakai: Ko kimoutolu ē kuo mou veteki ‘eku tākanga, pea kuo mou sese‘e kinautolu, pea kuo ‘ikai te mou ‘a‘ahi kiate kinautolu, ko au eni te u ‘a‘ahi kiate kimoutolu, ‘o ‘eke ‘a e kovi ‘o ho‘omou ngaahi fai anga–ko Sihova ia mei he Ta‘ehāmai. 3Pea te u tānaki ‘a e toe ‘o ‘eku tākanga mei he ngaahi fonua kotoa pē kuo u sese‘e kinautolu ki ai, pea te u fakafoki kinautolu ki honau kaikai‘anga, koe‘uhi ke nau tupu mo fakatokolahi. 4Pea te u fokotu‘u ke pule kiate kinautolu ha kau tauhi te nau fafanga kinautolu: pea ‘e ‘ikai te nau toe manavahē, pea ‘ikai te nau mo‘utāfu‘ua, pea ‘e ‘ikai ha tō ‘oka lau#23.4 ‘e ‘ikai ha tō ‘oka lau; pe ‘e ‘ikai te u toe tautea kinautolu. –ko Sihova ia mei he Ta‘ehāmai.
5Vakai, ‘oku hoko mai ha taimi–ko Sihova eni mei he Ta‘ehāmai–‘a ia te u fokotu‘u ai kia Tēvita ha Huli mā‘oni‘oni, ‘a ia te ne nofo ko e tu‘i, pea te ne fai fakapotopoto, pea te ne feia ‘a e fakalao mo e totonu ‘i he fonua.#Sel 33.14-16 6‘I hono taimi ‘o‘ona ‘e tu‘umālie ‘a Siuta, pea ‘e nofo nonga ‘a ‘Isileli: pea ko eni ‘a e huafa ‘e ui‘aki ia ko Sihova Sitikenu (ko Sihova-ko-hotau-mā‘oni‘oni‘anga).
7Ko ia, vakai, ‘oku hoko mai ha taimi–ko Sihova eni mei he Ta‘ehāmai–‘a ia ‘e ‘ikai kei lau, Tangi ‘a e mo‘ui ‘a Sihova, ‘a ia na‘a ne ‘ohake ‘a ha‘a ‘Isileli mei ‘Isipite; 8ka ko eni pē, Tangi ‘a e mo‘ui ‘a Sihova, ‘a ia na‘a ne ‘ohake mo taki mai ‘a e hako ‘o e fale ‘o ‘Isileli mei he fonua tokelau, pea mei he fonua kehekehe ‘a ia kuo u fakateka kinautolu ki ai; pea te nau nofo ‘i honau kelekele ‘onautolu.
Ko e Fakahā meia Selemaia ‘o Kau ki he Kau Palōfitá
9Ko e me‘a ki he kau palōfita. Kuo mafesi hoku loto ‘iate au, ‘oku ngatata hoku ngaahi hui kotoa. Kuo u hoko ‘o hangē ko e tangata ‘oku konā, ‘io, ‘o hangē ko ha mafi kuo ha‘aki ‘e he uaine; koe‘uhi ko Sihova, pea koe‘uhi ko ‘ene ngaahi lea tāpuhā. 10He ‘oku fonu ‘a e fonua ‘i he kau tono ‘unoho; pea ko e me‘a ‘i he mala#23.10 ‘Oku hiki ‘e he ni‘ihi: koe me‘a ‘i he kapekape. ‘oku mae ‘a e fonua, “oku pakupaku ‘a e ngaahi kaikai‘anga ‘i he toafa, pea kuo hoko ‘o kovi honau fāinga manako pea ko e me‘a ‘oku nau tōtōivi ki ai ‘oku ‘ikai totonu.
11Seuke, ‘oku ‘uli ‘a e palōfita mo e taula‘eiki fakatou‘osi; ‘io, na‘a mo hoku fale kuo u ‘ilo ai ki he‘enau kovi–ko Sihova ia mei he Ta‘ehāmai. 12Ko ia ‘e hoko honau hala ko e koto hekea ‘i he po‘uli: ‘e tulaki kinautolu, pea te nau tō ai; he te u ‘omi ha kovi kiate kinautolu, ko honau ta‘u ‘eke–ko Sihova ia mei he Ta‘ehāmai. 13Pea kuo u mamata ki he vale ‘i he kau palōfita ‘o Samēlia; na‘a nau palofisai ‘ia Peali, pea nau takihee‘i hoku kakai ‘Isileli. 14Pea ‘i he kau palōfita ‘o Selusalema kuo u mamata ki ha me‘a fakalilifu,#Sēn 18.20; ‘Isi 16.49 ko e tono ‘unoho, mo e fou ‘i he loi, pea ‘oku nau poupou ‘a e nima ‘o e kau faikovi, ko ia ‘oku ‘ikai ke foki ha taha mei he‘ene faikovi: kuo nau hoko kotoa pē kiate au ko e Sōtoma tofu pē, pea ko e nofo he kolo ‘oku tatau mo Komola.
15Ko ia ko e folofola eni ‘a Sihova Sāpaoti ‘i he kau palōfita, Ko au eni ‘oku ou fafanga kinautolu ‘aki ‘a e kona-‘ī‘ī, pea ‘oku ou fakainu ‘aki ‘a e vai-‘ahu: he kuo ‘alu atu mei he kau palōfita ‘o Selusalema ‘a e angahala-loto ki he fonua kotoa.
16Ko e folofola eni ‘a Sihova Sāpaoti, ‘Oua te mou tokanga ki he lea ‘a e kau palōfita ‘oku fai palofisai kiate kimoutolu; ‘oku fiemua‘i kimoutolu ‘e he fa‘ahinga ko ia: ko e me‘a ‘oku nau lau ko e vīsone ‘o honau loto pē, ‘oku ‘ikai ko e me‘a mei he fofonga ‘o Sihova. 17‘Oku nau lea ai pē kiate kinautolu ‘oku ta‘etoka‘i au, ‘o pehē, Kuo tala ‘e Sihova te mou tu‘umālie pē; kiate ia fua pē ‘oku fou ‘i he ta‘emīngao hono loto, ‘oku nau lau, ‘E ‘ikai hoko ha kovi kiate kimoutolu.
18He ko hai na‘e tu‘u ‘i he kāpineti ‘o Sihova, ke sio mo fanongo ‘i he‘ene folofola? ko hai na‘e tokanga‘i ‘eku lea, ‘o fanongo ki ai? 19Sī, ko e ‘ahiohio ē ‘a Sihova–ko ‘ene tafulu ‘oku ‘alu atu–‘io, ko e ‘ahiohio fakatakamilo ‘e tataha ‘aki ‘a e ‘ulu ‘o e kau faikovi. 20‘E ‘ikai foki ‘a e houhau ‘a Sihova, kae‘oua ke ‘osi fai, pea ‘oua ke fakaai ‘a e ngaahi fakakaukau ‘a hono finangalo: ‘i he ngaahi ‘aho faka‘osi, ‘e mahino ki homou ‘atamai ‘a e me‘a ko ia.
21Tala‘ehai na‘a ku fekau atu ‘a e kau palōfita na, ka na‘a nau ‘oho atu pē. Kuo ‘ikai te u lea kiate kinautolu, ka na‘a nau palofisai ai pē. 22Ka ‘oka ne nau tu‘u ‘i he‘eku kāpineti, pehē kuo nau fanongonongo ki hoku kakai ‘eku ngaahi lea, pea kuo nau fakafoki kinautolu mei honau ngaahi hala kovi, pea mei he kovi ‘o ‘enau ngaahi fai anga.
23He ko e ‘Otua au ‘o e ofi pē?–ko Sihova ia mei he Ta‘ehāmai–‘o ‘ikai ko e ‘Otua ‘o e mama‘o foki? 24‘E lava ‘e ha taha ke loi ‘i he ngaahi potu lilo, ‘o ‘oua na‘a ku sio kiate ia?–ko Sihova ia mei he Ta‘ehāmai. ‘Ikai ‘oku fonu ‘iate au ‘a e ngaahi langi mo māmani?–ko Sihova ia mei he Ta‘ehāmai. 25Kuo u fanongo ki he me‘a ‘oku lau ‘e he kau palōfita ‘oku palofisai ‘i hoku hingoa, ka ko e loi pē, he‘enau pehē, Kuo u misi, Kuo u misi. 26‘E fēfē hono fuoloa ‘o e ‘i he loto ‘o e kau palōfita ‘oku palofisai loi ‘a e me‘a ni? ‘io, ‘o e kakai ‘oku palofisai ‘aki ‘a e kākā ‘a honau loto? 27‘Oku nau fakakaukau koā ke fakangalo hoku hingoa ‘i hoku kakai ‘aki ‘enau ngaahi misi, ‘a ia ‘oku lau ‘a ē ki hē, ‘o hangē ko e ngalo hoku hingoa ‘i he‘enau ngaahi kui koe‘uhi ko Peali? 28Ko e palōfita ‘oku ‘iate ia ha misi, ke ne ‘a‘au ‘a e misi; pea ko ia ‘oku ‘iate ia ‘eku lea, ke ne tala totonu ia. ‘E fakatataua ‘a e kau‘i uite ki he uite–ko Sihova ia mei he Ta‘ehāmai. 29‘Ikai ko e anga eni ‘o ‘eku lea, ko e afi tofu pē?–ko Sihova ia mei he Ta‘ehāmai–‘io, ko e hāmala ia ‘oku ne laiki ke lailai ‘a e makatu‘u. 30Ko ia ko au eni ‘oku ou fili ‘aki ‘a e kau palōfita na–ko Sihova ia mei he Ta‘ehāmai–‘a kinautolu ‘oku kaiha‘a ‘eku lea, ‘a e taha mei he taha. 31Ko au eni ‘oku ou fili ‘aki ‘a e kau palōfita na–ko Sihova ia mei he Ta‘ehāmai–‘a kinautolu ‘oku fakahehu honau ‘elelo, ‘o lea fakamisiteli, “Ko e lea mei he Ta‘ehāmai.” 32Ko au eni ‘oku ou fili ‘aki ‘a e kau palōfita misi loi–ko Sihova ia mei he Ta‘ehāmai–‘a ia ‘oku nau ‘a‘au ‘a e ngaahi misi ko ia, ‘o nau takihee‘i hoku kakai ‘aki ‘enau ngaahi loi, pea ‘aki ‘enau pōlepole; ‘osi, kuo ‘ikai te u fekau kinautolu ‘e au, pea na‘e ‘ikai te u fai ha tu‘utu‘uni ki ai; pea ‘oku ‘ikai te nau momo‘i ‘aonga ki he kakai ni–ko Sihova ia mei he Ta‘ehāmai.
Ko e “Kavenga” meia Sihova
33Pea ka fehu‘i kiate koe ‘e he kakai ni, pe ko ha palōfita, pe ko ha taula‘eiki, ‘o pehē, Ko e hā ‘a e anga ‘o e “kavenga meia Sihova”? pea te ke pehē kiate kinautolu, Ko e anga ‘o e “kavenga,” ‘a ‘eku li‘aki kimoutolu–ko Sihova ia mei he Ta‘ehāmai. 34Pea ko e palōfita, pe taula‘eiki, pe kakai, ‘a ia te ne pehē, “Ko e kavenga meia Sihova”–te u ‘eke ia ki he tangata ko ia, pea ki hono fale. 35Ko eni ‘a e lau te mou fai ‘i he talanoa mo e kaungā‘api, pea ‘i he talanoa mo e kāinga, Ko e hā ‘a e tali ‘a Sihova? pē, Ko e hā ‘a e folofola ‘a Sihova? 36Ka ko e “kavenga meia Sihova”#23.36 ‘Oku tatau ‘a e faka-Hepelū ‘o e fakahā [tala] mo e kavengá. ‘e ‘ikai te mou toe lau ki ai: he ka lea pehē ha taha, ko e kavenga meia Sihova ia ki he tangata ko ia; he ‘oku mou piko‘i ‘a e folofola ‘a e ‘Otua Mo‘ui, ‘a Sihova Sāpaoti ko hotau ‘Otua. 37Ko e anga eni ‘o ho‘omou lau ki he palōfita, “Ko e hā ‘a e tali ‘a Sihova kiate koe?” pe, “Ko e hā ‘a e folofola ‘a Sihova?” 38Ka ‘o kapau te mou lau “kavenga meia Sihova,” vakai, ko e folofola eni ‘a Sihova, Ko e me‘a ‘i ho‘omou ‘ai ‘a e fo‘i lea ni, “kavenga meia Sihova,” ‘osi na‘a ku fekau atu ‘oku tapu ho‘omou lau “kavenga meia Sihova;” 39ko ia ko au eni te u mātu‘aki fakangalongalo‘i#23.39 fakangalongalo‘i; pe to‘o hake; Ko e faka-Hepelū ‘o e to‘o haké ko e tupu‘i lea tatau pē mo e faka-Hepelū ‘o e fakahā [tala] mo e kavenga. kimoutolu, pea te u li‘aki mei hoku ‘ao ‘a kimoutolu, pea mo e kolo na‘a ku foaki kiate kimoutolu mo ho‘omou ngaahi kui: 40pea te u hilifaki kiate kimoutolu ha ongoongokovi ta‘engata, mo e mā ‘o lauikuonga, ‘o ‘ikai mangalo.
Currently Selected:
KO SELEMAIA 23: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
