KO SELEMAIA 22
22
Ko ha Fakahā meia Selemaia ki he Fale‘alo ‘o Siutá
1KO E folofola eni ‘a Sihova, ‘Alu hifo ki he fale ‘o e Tu‘i Siuta, pea ke fai ai ‘a e lea ko eni, ‘io, te ke pehē, 2Fanongo ki he folofola ‘a Sihova, ‘a e Tu‘i Siuta, ‘oku ‘afio ‘i he taloni ‘o Tēvita, ‘a e ‘afiona mo ho‘o kau tamaio‘eiki, pea mo ho kakai na ‘oku hū mai ‘i he ngaahi matapā ni. 3Ko e folofola eni ‘a Sihova: Fai ‘a e fakalao mo e totonu, pea hamusi si‘i ngaohikovia mei he nima ‘o e fakamālohi; pea ‘oua ‘e fai ha kovi pe ha fakamamahi ki he ‘āunofo, ki he tamai mate, pe ki he uitou, pea ‘oua ‘e lilingi ‘a e toto ‘o e ta‘ehalaia ‘i he potu ni. 4He kapau te mou mātu‘aki fai ‘a e me‘a ko ia, pea ‘e hū ‘i he ngaahi matapā ‘o e fale ni ha ngaahi tu‘i ‘oku fetongi ‘a Tēvita ‘i hono taloni, ‘oku nau heka sāliote mo e hoosi, ‘a ia mo ‘ene tamaio‘eiki mo hono kakai. 5Ka ‘o kapau ‘oku ‘ikai te mou fakaongo ki he ngaahi lea ni, ‘oku ou fuakava ‘iate au ‘e hoko ‘a e fale ni ko e koto ka‘anga–ko Sihova ia mei he Ta‘ehāmai.#Māt 23.38; Luk 13.35
6He ko eni ‘a e folofola ‘a Sihova ki he fale ‘o e Tu‘i Siuta: Ko ha Kiliati koe kiate au, ko ha tumutumu ‘o Lepanoni: tala atu, te u ngaohi koe ko e fonua lala, koni kolo ta‘eha nofo ai. 7Pea te u fakanofo ha ni‘ihi ke ngaohi koe, ko e kau faka‘auha, takitaha mo hono nāunau: pea te nau tā ‘a e lelei ‘o ho ngaahi sita, ‘o lī ki he afi.
8Pea ‘e laka ofi ki he kolo ni ha ngaahi kakai lahi, pea te nau lea ‘a ē ki hē, ‘o pehē, Ko e hā kuo fai pehē ai ‘e Sihova ki he fu‘u kolo ni? 9Pea te nau tali, Koe‘uhi ā na‘a nau li‘aki ‘a e kovinānite ‘a Sihova ko honau ‘Otua, pea nau lotu ki he ngaahi ‘otua kehe, ‘o nau tauhi ki ai.
Ko ha Fakahā meia Selemaia ‘o Kau kia Sihoa‘asi
10‘Oua te ke tēngihia ‘a e pekia,
Pea ‘oua te ke maumau‘ia ai:
Fai mu‘a ho‘o tangi koe‘uhi ko ia kuo ‘alu;#22.10 ko ia kuo ‘alú; pe ko Sihoa‘asi ko e ‘alo ‘o Siosaia.
He ‘e ‘ikai te ne toe foki mai,
Pe sio he fonua na‘e fanau‘i ai.
11He ko eni ‘a e folofola ‘a Sihova kia Sālumi#22.11 Sālumi; ko Sihoa‘asi ia, ko e ‘alo ‘o Siosaia. foha ‘o Siosaia ko e Tu‘i Siuta, ‘a ia na‘a ne fetongi ‘ene tamai ko Siosaia, ‘o ne ‘alu atu mei he potu ni:#2 Tu‘i 23.31-34; 2 Kal 36.1-4 12‘E ‘ikai te ne toe foki mai; ka ko e potu kuo taki pōpula ia ki ai, ko e potu ia te ne pekia ai, pea ko e fonua ni ‘e ‘ikai te ne toe sio ki ai.
Ko e Fakahā meia Selemaia ‘o Kau kia Sihoiakimi
13‘Oiauē ia ‘oku langa hono fale ‘i he ta‘etotonu,
‘O ‘ai hono ngaahi loki ‘olunga ‘i he maumau konisitūtone!
‘Oku ne fakangāue‘i hono kaungā‘api ta‘etotongi,
Pea ko e fua ‘o ‘ene ngāue ‘oku ‘ikai te ne ‘ange:
14He‘ene pehē, Te u langa mo‘oku ha fale ‘oku ‘amo atu,
Mo e ngaahi loki ‘olunga ‘oku fu‘u ‘atā,
Pea ‘oku ne ‘ai ke lahi hono tupa,
Pea ‘oku ‘aofi ‘aki ‘a e sita,
Pea ‘oku vali kulokula.
15‘Oku ke ngali tu‘i koā koe‘uhi ko ho‘o veipā he ‘akau sita? Ko ho‘o ‘eiki na, ‘ikai na‘a ne kai mo inu, mo fai ‘a e fakalao mo e totonu? ko e taimi ko ia na‘a ne tu‘umālie. 16Na‘a ne fakamaau ‘a e me‘a ‘a e tōkilalo mo e masiva; ko e taimi ko ia na‘e lelei. ‘Ikai ko e fai pehē ko e ‘ilo‘i ‘o‘oku? ko Sihova ia mei he Ta‘ehāmai. 17Ka ko e me‘a pē ‘oku hanga ki ai ho fofonga mo ho loto, ke ma‘u ha‘o koloa, pea ke lilingi ‘a e toto ‘o e ta‘ehalaia, pea ke fai ha fakamālohi mo ha have‘i.
18Ko ia, ko e folofola eni ‘a Sihova kia Sihoiakimi foha ‘o Siosaia ko e Tu‘i Siuta:#2 Tu‘i 23.35–24.6; 2 Kal 36.5-7 ‘E ‘ikai fai hano tangilāulau, ‘Oiauē si‘oku tokoua! pē, ‘Oiauē si‘oku tuofefine! ‘e ‘ikai fai hano tangilāulau ‘o pehē, ‘Oiauē hoku tu‘a‘ofa ‘eiki! pē, ‘Oiauē ‘a e mole hono hau! 19Ko hono tanu ko e tanu ‘o ha ‘asi, ‘a ia ‘oku toho ‘o li‘aki mama‘o mo e ngaahi matanikolo ‘o Selusalema.
Ko e Fakahā me ia Selemaia ‘o Kau ki he Iku‘anga ‘o Selusalema
20Si‘i fefine, ‘alu hake ki Lepanoni, ‘o ‘ioho;
Pea ofa‘aki ho le‘o ‘i Pēsani:
Pea ‘ioho mei ‘Apalemi;
He kuo maumau kotoa ho kau ‘ofa‘anga.
21Na‘a ku lea kiate koe ‘i ho‘o tu‘umālie; na‘a ke tali, ‘E ‘ikai te u tokanga. Ko ho ‘alunga ia talu ho‘o talavou, ‘a e ‘ikai te ke fakaongo ki hoku le‘o. 22Ko ho kau tauhi kotoa ‘e keikeina ‘e he matangi, pea ko e kakai ‘oku ‘ofa kiate koe te nau ‘alu pōpula: seuke, te ke toki mā, ‘io, ‘e fakamaa‘i koe ‘i ho‘o fu‘u kovi.
23Si‘i fefine nofo Lepanoni,
‘O ngaohi ho pununga ‘i he sita,
‘E nifi koā ho‘o māpuhoi ‘oka hoko mai ho‘o ngaahi mamahi,
Ko e langā hangē ha fefine fā‘ele!
Ko Hono Fakamāu‘i ‘e he ‘Otuá ‘a Sihoiakimi
24Tangi ‘eku mo‘ui–ko Sihova ia mei he Ta‘ehāmai–neongo ko e mama sila ‘i hoku nima to‘omata‘u ‘a Konaia foha ‘o Sihoiakimi ko e Tu‘i Siuta, ka te u to‘o koe mei ai;#2 Tu‘i 24.8-15; 2 Kal 36.9-10 25‘o tuku ki he nima ‘o e kakai ‘oku kumi ki ho‘o mo‘ui, pea ki he nima ‘o e kakai ‘oku ke manavahē ki ai; ‘io, ki he nima ‘o Nepukanesa ko e Tu‘i Pāpilone, pea ki he nima ‘o e kau Kalitia. 26Pea te u lī koe, mo ho‘o fa‘ē na‘e fanau‘i koe, ki ha fonua kehe, ‘a ia na‘e ‘ikai te mou tutupu ai: pea te mou pekia ‘i he potu ko ia. 27Pea ko e fonua ‘a ia ‘oku holi si‘enau mo‘ui ke foki ki ai, ko e potu ko ia ‘e ‘ikai te nau foki ki ai.
28He ko e pakula‘ā ke li‘aki noa ‘a e tangata ni ko Konaia?
Ko e ipu ia ke ta‘efai ki ai ha manako?
Ko e hā ‘oku lī ai ia mo hono hako,
‘O fakapuna ki ha fonua ‘oku ‘ikai te nau ‘ilo ki ai?
29Fonua, Fonua, Fonua, fanongo ki he folofola ‘a Sihova. 30Ko eni ‘a e folofola ‘a Sihova. Tohi ‘a e tangata ni ko e ta‘e-ha-fānau, ko e tangata ‘e ‘ikai monū‘ia lolotonga ene mo‘ui: e ‘ikai monū‘ia ha tangata mei hono hako, he nofo ‘i he taloni ‘o Tēvita, pe ha‘ane toe pule ki Siuta.
Currently Selected:
KO SELEMAIA 22: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
