KO SELEMAIA 21
21
Ko Hono Kikite‘i ‘o e Ikuna‘i ‘o Selusalema
1KO E folofola na‘e hoko kia Selemaia meia Sihova, ‘i he taimi na‘e fekau kiate ia ‘e Kingi Setekaia ‘a Pāsua foha ‘o Malakaia, mo Sefanaia foha ‘o Ma‘aseia ko e taula‘eiki, ke lea ‘o pehē, 2Huhū mu‘a kia Sihova ma‘atautolu; he ‘oku fai tau kiate kitautolu ‘e Nepukanesa ko e Tu‘i Pāpilone: hei‘ilo ‘e fai ma‘atautolu ‘e Sihova, ‘o taau mo ‘ene fu‘u ngāue fakaofo ko ē, kae ‘alu hake ia meiate kitautolu.#2 Tu‘i 25.1-11; 2 Kal 36.17-21
3Pea tali ‘e Selemaia kiate kinautolu: Ko eni ‘a e lea te mou fai kia Setekaia, Ko e folofola eni ‘a Sihova ko e ‘Otua ‘o ‘Isileli: 4Ko au eni ‘oku ou fakafoki ‘a e mahafu ‘oku ‘i homou nima, ‘a ia ‘oku mou fai tau ‘aki ‘i tua‘ā ki he Tu‘i Pāpilone, mo e kau Kalitia ‘oku fai ke ha‘o kimoutolu; pea te u fakatefua kinautolu ‘i loto kolo ni. 5Pea ‘oku ou fai tau kiate kimoutolu ‘e au ‘aki ‘a e nima kuo mafao mo e nima mālohi, pea ‘i he ‘ita, mo e houhau, mo e tuputāmaki lahi. 6Pea te u taa‘i ‘a e nofo he kolo ni, ‘a e tangata mo e manu fakatou‘osi: te nau mate ‘i ha fu‘u mahaki faka‘auha. 7Pea hili ia–ko Sihova eni mei he Ta‘ehāmai–te u tuku ‘a Setekaia ko e Tu‘i Siuta, pea mo ‘ene kau tamaio‘eiki, pea mo e kakai, kaekehe ‘a kinautolu ‘i he kolo ni ‘oku toe mei he mahaki faka‘auha, mei he heletā, pea mei he honge–te u tuku kinautolu ki he nima ‘o Nepukanesa ko e Tu‘i Pāpilone, ‘io, ki he nima ‘o honau ngaahi fili, mo e nima ‘o e kakai ‘oku kumi ki he‘enau mo‘ui: pea te ne taa‘i kinautolu ‘aki ‘a e mata ‘o e heletā; ‘e ‘ikai te ne mamae kiate kinautolu, pea ‘e ‘ikai te ne lolou, pea ‘e ‘ikai te ne faka‘atu‘i.
8Pea ko ho‘o lea ki he kakai ni ‘e pehē, Ko e folofola eni ‘a Sihova: Ko au eni ‘oku ou tuku ‘i homou ‘ao ‘a e hala ki he mo‘ui mo e hala ki he mate. 9Ko ia te ne nofo ‘i he kolo ni te ne mate ‘i he heletā, mo e honge, mo e mate faka‘auha; ka ko ia te ne hū kitu‘a, ‘o tō ki he kau Kalitia ‘oku ‘ākolo‘i kimoutolu, te ne ‘ave ‘ene mo‘ui ma‘ane vete. 10He kuo hanga hoku mata ki he kolo ni ke kovi, ‘o ‘ikai ke lelei–ko Sihova ia mei he Ta‘ehāmai–‘e tuku ia ki he nima ‘o e Tu‘i Pāpilone, pea te ne fakamomofi ‘aki ‘a e afi.
Ko Hono Fakamāu‘i ‘o e Fale ‘Alo ‘o Siutá
11Pea ko e me‘a ki he fale ‘o e Tu‘i Siuta, mou fanongo ki he folofola ‘a Sihova: 12Fale ‘o Tēvita ē, ko e folofola eni ‘a Sihova, Fai pongipongi ‘a e fakamaau, pea hamusi si‘i ngaohikovia mei he nima ‘o e fakamālohi, na‘a pā atu ‘eku houhau hangē ha afi, ‘o vela ta‘emafu‘ifu‘i, koe‘uhi ko e kovi ho‘omou fai anga. 13Ko au eni ‘oku ou fili ‘aki koe, si‘i fefine nofo#21.13 nofo; pe nofo taloni. he tele‘a, he makatu‘u ‘o e toafa–ko Sihova ia mei he Ta‘ehāmai–‘a e fa‘ahinga ‘oku mou lau, Ko hai tū ‘e lava ke ‘alu hifo kiate kitautolu? pea ko hai tū ‘e lava ke hū ki hotau ngaahi nofo‘anga? 14‘Ā, te u tautea kimoutolu, ‘o taau mo e fua ‘o ho‘omou fai anga–ko Sihova ia mei he Ta‘ehāmai–pea te u tafu ha afi ‘i hono vao, ‘a ia te ne keina hono feitu‘u kotoa takatakai,
Currently Selected:
KO SELEMAIA 21: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
