KO SELEMAIA 18
18
Ko e Selemaia ‘i he Fale ‘o e Tufunga Ipu
1KO E folofola na‘e hoko kia Selemaia meia Sihova, ‘o pehē, 2Tu‘u, ‘o ‘alu hifo ki he fale ‘o e tufunga ipu ‘umea, pea te u tuku ke ke fanongo ai ki he‘eku lea. 3Pea u ‘alu hifo ki he fale ‘o e tufunga ipu ‘umea, pea tā ‘oku fai ‘ene ngāue ‘i he mīsini. 4Pea ka maumau ‘i he nima ‘o e tufunga ‘a e ipu ‘oku ne ngaohi ‘aki ‘a e ‘umea, pea ne hanga ‘o ngaohi ia ko e ipu kehe, ha me‘a pē na‘e hā lelei ki he tufunga ke ngaohi.
5Pea hoko ‘a e folofola ‘a Sihova kiate au, ‘o pehē, Fale ‘o ‘Isileli ē, ‘ikai koā te u lava ke fai kiate kimoutolu ‘o hangē ko e tufunga ni? 6ko Sihova ia mei he Ta‘ehāmai. Vakai, hangē ko e ‘umea ‘i he nima ‘o e tufunga, ko kimoutolu ia ‘i hoku nima, si‘i fale ‘o ‘Isileli. 7Ka fokifā te u lea ‘i ha kakai, pe ha pule‘anga, ke ta‘aki ia mo holoki mo faka‘auha; 8ka ‘oka tafoki ‘a e kakai na‘a ku lea ki ai mei hono kovi ko ia, pea te u fakatomala ai ‘i he kovi na‘a ku fakakaukau ke fai ki ai. 9Pea ka fokifā te u lea ‘i ha kakai, pe pule‘anga, ke langa hake mo hunuki hifo; 10ka ‘o kapau te ne fai ‘a e me‘a ‘oku tau kovi kiate au, ‘o ‘oua te ne fakaongo ki hoku le‘o, pea te u fakatomala ‘i he lelei ‘a ia na‘a ku pehē ke fai ki ai. 11Pea ko eni, lea mu‘a ki he tangata Siuta, pea ki he nofo Selusalema, ‘o pehē, Ko e folofola eni ‘a Sihova: Vakai, ‘oku ou tufunga‘i ha kovi ke fai kiate kimoutolu, pea ‘oku ou fa‘u ha fakakaukau ke mou kovi ai: ‘ē, mou foki takitaha mei hono hala kovi, ‘o mou ngaohi ke lelei homou ngaahi ‘alunga mo ho‘omou ngaahi fai anga. 12Ka ‘oku nau pehē, ‘E ‘ikai lava: ka te mau muimui ki he‘emau ngaahi fakakaukau, pea takitaha fai ki he ta‘emīngao hono loto kovi.
Ko Hono Fakasītua‘i ‘e he Kakaí ‘a Sihova
13Ko ia ko e folofola eni ‘a Sihova: Fehu‘i mu‘a ‘i he ngaahi pule‘anga: ko hai kuo ne fanongo ki ha me‘a hangē ko eni? Ko e me‘a faka‘ulia faufau kuo fai ‘e he tāupo‘ou ko ‘Isileli. 14‘E mole ‘a e sinou ‘o Lepanoni mei he makatu‘u ‘o e tuku‘uta? pe mātu‘u koā ‘a e vai muli na ‘oku tafe momoko mai? 15He kuo fakangalongalo‘i au ‘e hoku kakai, kuo nau tutu ‘inisēnisi ki he me‘a launoa; pea kuo nau fakahumu kinautolu ‘i honau ngaahi ‘alunga, ‘a e ngaahi hala tupu‘a, ke ‘alu ki he ngaahi hala fakateiapa‘a, ko e hala ‘oku ‘ikai tanu; 16ke ngaohi honau fonua ko e me‘a ke fai ai ha ofo mo ha faka‘ise‘isa ‘o ta‘engata; ‘ilonga ha taha ‘oku laka ofi ai te ne ofo mo kalokalo hono ‘ulu. 17Te u veteki kinautolu ‘i he ‘ao ‘o e fili, ‘o hangē ko e fai ‘a e matangi hahake; te u sī kiate kinautolu ‘aki hoku tu‘a, ‘o ‘ikai ‘aki hoku mata, ‘i he ‘aho ‘o ‘enau tu‘utāmaki.
Ko Hano Puleaki‘i ‘o e Mo‘ui ‘a Selemaiá
18Pea na‘a nau pehē, Ha‘u ā ke tau puleaki‘i ‘a Selemaia; he tala‘ehai ‘e mole ‘a e lao mei he taula‘eiki, mo e fakakaukau mei he poto, mo e folofola mei he palōfita. Ha‘u ā ke tau tā ‘elelo‘i ia, ‘oua na‘a tau tokanga‘i ‘ene ngaahi fu‘u lea.
19‘E Sihova, ke ke tokanga‘i au ‘e koe, pea ke ongo atu ‘a e le‘o ‘o e kakai ‘oku fakakikihi mo au. 20‘E totongi ‘a e lelei ‘aki ‘a e kovi? he kuo nau keli ha luo ki he‘eku mo‘ui. Manatu ki he‘eku tu‘u ‘i ho ‘ao ke fai ha fakalaloa ma‘anautolu, ke ta‘ofi ho houhau meiate kinautolu. 21Ko ia, ke ke ‘atu ‘enau fānau ki he honge, pea tukuange kinautolu ke fa‘iteliha ‘a e heletā; ke nofo ta‘eha fānau mo uitou honau ngaahi uaifi; ke mate honau kau tangata ‘i he mahaki faka‘auha, ko honau kau talavou ke te‘ia ‘aki ‘a e heletā ‘i he tau. 22Ke ongo mai ‘a e tautapa mei honau ngaahi fale, ‘oka ‘iloange kuo ke ‘omi kiate kinautolu ha kongakau: he kuo nau keli ha luo ke pō au, kuo nau ‘ufi‘ufi ha ngaahi tauhele ke mo‘ua hoku va‘e. 23Ka ko koe, ‘e Sihova, ‘oku ke ‘afio‘i ‘enau ngaahi fakakaukau kiate au ke u mate; ‘oua te ke fakamolemole ‘enau kovi, pea ‘oua te ke tāmate‘i ‘enau angahala, kae tuku ke fe‘ao ia mo koe: ka nau hoko ko e koto tō fo‘ohake ‘i ho ‘ao; ‘i he taimi ‘o ho houhau, ngāue kiate kinautolu.
Currently Selected:
KO SELEMAIA 18: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
