KO SELEMAIA 19
19
Ko e Ipu Foa
1KO E folofola eni ‘a Sihova, ‘Alu fakatau ha hina ‘a e tufunga ipu ‘umea, pea ‘ave ha ni‘ihi ‘o e mātu‘a ‘o e kakai, mo e ni‘ihi ‘o e mātu‘a ‘o e kau taula‘eiki; 2pea ke ‘alu ‘atu ki he Tele‘a ‘o e foha ‘o Hīnomi, ‘a e potu ‘oku hanga ki he Matapā-nge‘esi-ipu-maumau, pea ke fanongonongo ai ‘a e ngaahi lea te u ‘atu kiate koe:#2 Tu‘i 23.10; Sel 7.30-32; 32.34-35 3pea te ke pehē, Fanongo ki he folofola ‘a Sihova, ‘a e ngaahi Tu‘i Siuta, mo e nofo Selusalema. Ko eni ‘a e folofola ‘a Sihova Sāpaoti, ko e ‘Otua ‘o ‘Isileli: Ko au eni ‘oku ou ‘omi ha kovi ki he potu ni, ‘a ia ‘e ‘ilonga ha fanongo ki ai ‘e vavana hono telinga. 4Ko hono ‘uhinga ko ‘enau li‘aki au, pea kuo nau ngaohi ‘a e potu ni hangē ha potu muli, pea kuo nau tutu ‘inisēnisi ai ki he ngaahi ‘otua kehe, ‘a ia na‘e ‘ikai te nau ‘ilo ki ai, ‘e kinautolu, pe ko ‘enau ngaahi kui, pe ko e ngaahi Tu‘i Siuta; pea kuo nau fakafonu ‘a e potu ni ‘aki ‘a e toto ‘o e ta‘ehalaia; 5pea kuo nau tanu ‘a e ngaahi ‘esi kia Peali, ke fakamomofi ‘enau fānau ‘i he afi, ko e ngaahi feilaulau-mōifua kia Peali; ‘a ia na‘e ‘ikai te u tu‘utu‘uni, pea na‘e ‘ikai ha‘aku lea ki ai, pea na‘e ‘ikai ake ‘i hoku loto.#Lev 18.21 6Vakai, ‘oku hoko mai ha taimi–ko Sihova ia mei he Ta‘ehāmai–‘a ia ‘e ‘ikai kei ui ‘a e potu ni ko Tōfeti, mo e Tele‘a ‘o e foha ‘o Hīnomi, ka ko Tele‘a Tamate. 7Pea te u fakaikunoa ‘a e fakakaukau ‘a Siuta mo Selusalema ‘i he potu ni; pea te u tuku ke nau tō ‘i he heletā ‘i he ‘ao ‘o honau ngaahi fili, mo e tā ‘a e kakai ‘oku kumi ki he‘enau mo‘ui: pea te u tuku honau ‘anga‘anga ke me‘akai ‘aki ‘e he manu ‘o e ‘atā mo e manu ‘o e fonua. 8Pea te u ngaohi ‘a e kolo ni ko e me‘a ke fai ai ha ofo mo ha faka‘ise‘isa; ‘ilonga ha taha ‘oku laka ofi ai te ne ofo mo faka‘ise‘isa ‘i he ngaahi fu‘u tā kuo fai. 9Pea te u tuku ke nau kai ‘a e kakano ‘o ‘enau fānau tangata mo e kakano ‘o ‘enau fānau fefine, ‘io, ‘e kai takitaha ‘a e kakano ‘o hono kaungā‘api, ‘i he ‘ākilotoa mo e ‘efihia, ‘a ia ‘oku faka‘efihi ai kinautolu ‘e honau ngaahi fili, mo e kakai ‘oku kumi ki he‘enau mo‘ui.
10Pea te ke toki maumau ‘a e hina, kae sio ki ai ‘a e kau tangata na‘e ō mo koe, pea te ke pehē kiate kinautolu. 11Ko e folofola eni ‘a Sihova Sāpaoti: ‘Ē, pehē ‘eku maumau ‘a e kakai ni mo e kolo ni, ‘o hangē ko e maumau ‘a e ipu ‘a e tufunga ni, ‘a ia ‘e ‘ikai toe lava ke fakama‘opo: pea te nau tanu kakai ‘i Tōfeti, ko e ‘ikai ha potu ke tanu ai.#19.11 ko e ‘ikai ha potu ke tanu ai; pe kae‘oua ke ‘ikai toe ha potu ke tanu ai. 12‘E pehē ‘eku fai ki he potu ni–ko Sihova ia mei he Ta‘ehāmai–pea ki he nofo ai, ke ngaohi ‘a e kolo ni ke hangē ko Tōfeti: 13pea ‘e hoko ‘a e ngaahi fale ‘o Selusalema, mo e ngaahi fale ‘o e ngaahi Tu‘i Siuta, ‘o hangē ko e potu ko Tōfeti, ko e koto ta‘ema‘a ‘a e ngaahi fale ko ia, ‘a ia kuo nau tutu ‘inisēnisi ‘i hono tu‘a fale ki he hōsitē kotoa ‘o langi, pea kuo nau lilingi ‘a e ngaahi feilaulau–kava ki hani ‘otua kehe.
14Pea ha‘u ‘a Selemaia mei Tōfeti, ‘a ia kuo fekau ia ki ai ‘e Sihova ke fai ‘ene palofisai; pea ne ‘alu ‘o tu‘u ‘i he loto‘ā ‘i he fale ‘o Sihova, ‘o ne lea ki he kakai kotoa: 15Ko e folofola eni ‘a Sihova Sāpaoti, ko e ‘Otua ‘o ‘Isileli, Ko au eni ‘oku ou ‘omi ki he kolo ni, ‘io, ki he ngaahi kolo kotoa, ‘a e fu‘u kovi kuo u lea‘aki ‘e tō ki ai; he kuo nau fakakekeva honau kia ke ‘oua te nau fakaongo ki he‘eku ngaahi lea.
Currently Selected:
KO SELEMAIA 19: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
