KO SELEMAIA 16
16
Ko e Finangalo ‘o e ‘Otuá ki he Mo‘ui ‘a Selemaiá
1PEA na‘e hoko ‘a e folofola ‘a Sihova kiate au, ‘o pehē, 2‘E ‘ikai te ke ma‘u hao uaifi, pea ‘e ‘ikai te ke ma‘u ha‘o fānau tangata pe fānau fefine ‘i he potu ni. 3He ko e folofola eni ‘a Sihova ‘i he fānau tangata mo e fānau fefine ‘oku fanau‘i ‘i he potu ni, pea koe‘uhi ko ‘enau ngaahi fa‘ē na‘e fanau‘i kinautolu, pea koe‘uhi ko ‘enau ngaahi tamai na‘e fakatupu kinautolu ‘i he fonua ni: 4Ko e ngaahi pekia‘anga fakamamahi te nau pekia ai; ‘e ‘ikai tēngihia kinautolu, pea ‘e ‘ikai tanu; te nau hoko ko e kinoha‘a ‘i he funga kelekele: pea ‘e ‘osi‘osi kinautolu ‘i he heletā mo e honge; pea ko honau ngaahi ‘anga‘anga ‘e hoko ko e me‘akai ‘a e manupuna ‘o e ‘atā, mo e manu ‘o e fonua.
5He ko e folofola eni ‘a Sihova, ‘Oua te ke hū ki ha fale ‘oku ‘i ai ha tangi, pea ‘oua te ke ‘alu ke fai ha tēngihia, pea ‘oua te ke maumau‘ia ‘iate kinautolu: he kuo u ‘ave ‘eku melino mei he kakai ni–ko Sihova ia mei he Ta‘ehāmai–‘a e ‘ofa mo e fai faka‘atu‘i. 6Pea ko e lalahi mo e iiki ‘e pekia ‘i he fonua ni: ‘e ‘ikai tanu kinautolu, pea ‘e ‘ikai fai honau tēngihia, ‘e ‘ikai fai ha fefofoa‘i, pea ‘e ‘ikai fai ha fakatekefua koe‘uhi ko kinautolu. 7Pea ‘e ‘ikai tufa ha me‘akai kiate kinautolu ‘i he‘enau tangi, pe fai ha fakalelu koe‘uhi ko ha pekia; pea ‘e ‘ikai fakatau ‘a e kava fakafiemālie kiate kinautolu koe‘uhi ko e pekia ‘a ‘ene tamai pe ko ‘ene fa‘ē.
8Pea ‘oua te ke hū ki ha fale ‘oku fai ai ha kātoanga, ke nofo mo kinautolu, ke kai mo inu. 9He ko e folofola eni ‘a Sihova Sāpaoti, ko e ‘Otua ‘o ‘Isileli: Ko au eni ‘oku ou ‘ai ke tuku ‘i he potu ni–‘o mou sio ki ai, ‘io, ‘i homou taimi–‘a e le‘o ‘o e fiefia mo e le‘o ‘o e mavava, ‘a e le‘o ‘o e ‘eiki ta‘ane mo e le‘o ‘o e ta‘ahine.#Sel 7.34; 25.10; Fkhā 18.23
10Pea ‘i he taimi ko ia, hili ho‘o fakahā ki he kakai ni ‘a e ngaahi fu‘u me‘a ko eni, pea te nau pehē atu, Koe‘uhi ko e hā kuo folofola‘aki pehē ‘e Sihova ‘a e ngaahi fu‘u kovi ni kiate kimautolu? Pea ko e hā ‘emau kovi? Mo e hā ‘emau angahala kuo mau fai kia Sihova ko homau ‘Otua? 11Pea te ke pehē kiate kinautolu, Koe‘uhi na‘e li‘aki au ‘e ho‘omou ngaahi kui–ko Sihova ia mei he Ta‘ehāmai–pea nau muimui ‘otua kehe mo tauhi ia, mo lotu ki ai, ka nau li‘aki au, pea ko ‘eku lao na‘e ‘ikai te nau tauhia; 12pea ko kimoutolu na‘a mou fai kovi ange ‘i ho‘omou ngaahi kui; pea vakai, ko kimoutolu ē ‘oku muimui takitaha ki he ta‘emīngao hono loto kovi, ke ‘oua te mou fakaongo kiate au: 13ko ia, ‘oku ou heu‘i atu kimoutolu mei he funga fonua ni, ki ha fonua ‘oku ‘ikai te mou ‘ilo ki ai, ‘a kimoutolu, pe ko ho‘omou ngaahi tamai; pea te mou toki tauhi ai ki ha ngaahi ‘otua kehe ‘aho mo e pō; he tala‘ehai te u fai atu ha ‘ofa.
Ko e Foki Mai mei he Nofo Fakahē ‘i Pāpiloné
14Ko ia, vakai, ‘oku hoko mai ha taimi–ko Sihova eni mei he Ta‘ehāmai–‘a ia ‘e ‘ikai kei lau, Tangi ‘a e mo‘ui ‘a Sihova, ‘a ia na‘a ne ‘ohake ‘a ha‘a ‘Isileli mei ‘Isipite; 15ka ko eni pē, Tangi ‘a e mo‘ui ‘a Sihova, ‘a ia na‘a ne ‘ohake ‘a ha‘a ‘Isileli mei he fonua tokelau, pea mei he fonua kehekehe, ‘a ia kuo fakateka kinautolu ki ai: he te u toe ‘omi kinautolu ki he kelekele na‘a ku ‘atu ki he‘enau ngaahi kui.
Ko e ‘Amanaki ke Hoko Mai ‘a e Tauteá
16Ko au eni ‘oku ou fekau ke omi ha kau taumāta‘u tokolahi–ko Sihova ia mei he Ta‘ehāmai–pea te nau taumāta‘u‘i kinautolu; pea hili ia te u fekau ke ‘omi ke lahi ha kau tulimanu, ‘a ia te nau pō kinautolu mei he mo‘unga kehekehe, pea mei he ngaahi potu mā‘olunga kehekehe, pea mei he ngaahi ava‘i makatu‘u. 17He ko hoku ongo mata ni ‘oku hanga ki honau hala kotoa pē: ‘oku ‘ikai ke puli meiate au, pea ‘oku ‘ikai ke fufū ‘enau kovi, ka ‘oku fe‘ao mo au. 18Ka te u tomu‘a fakaai ‘a e lōua ‘o ‘enau kovi mo ‘enau hia; koe‘uhi ko ‘enau ‘uli‘i hoku fonua ‘aki ‘a e ‘anga‘anga ‘o ‘enau me‘a fakalielia, pea kuo nau fakafonu hoku tofi‘a ‘aki ‘enau ngaahi me‘a mousa‘a.
Ko e Lotu Loto Falala ‘a Selemaia kia Sihova
19‘E Sihova, ko hoku mālohinga, mo ‘eku kolo talitau‘anga, mo hoku hūfanga ‘i he taimi faingata‘a, ko koe ‘e ha‘u ki ai ‘a e ngaahi pule‘anga mei he ngaahi ngata‘anga ‘o māmani, pea te nau pehē, ‘Ā, ko e loi pē ‘a e me‘a na‘e hokosi ‘e he‘emau ngaahi tamai, ko e muna pē, pea ‘oku ‘ikai hano ‘aonga. 20‘E ngaohi koā ‘e ha tangata ha ngaahi ‘otua ma‘ana; ‘osi, ko e fa‘ahinga ‘ata‘i ‘otua kinautolu?
21Ko ia, ko au eni ‘oku ou ‘ai ke nau ‘ilo, ‘a e tātu‘otaha ni, ‘oku ou ‘ai ke nau ‘ilo hoku nima mo hoku ngū; ‘io, te nau ‘ilo ko Sihova hoku hingoa.
Currently Selected:
KO SELEMAIA 16: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
