KO SELEMAIA 14
14
Ko ha La‘ala‘ā Fakalilifu
1AI mo e hoko ha folofola ‘a Sihova kia Selemaia, ‘o kau ki he fa‘a la‘ala‘ā. 2‘Oku tangi ‘a Siuta, pea ‘oku vaivai ‘a hono ngaahi matanikolo, ‘oku nau nofo mamahi ‘i he kelekele mo e tauanga‘a; ‘io, ‘oku ‘alu hake ‘a e tangi ‘a Selusalema. 3Ko honau hou‘eiki kuo nau fekau honau kakai tu‘a ke kumi vai: ‘oku nau a‘u ki he ngaahi lepa, ‘oku ‘ikai te nau ‘ilo ai ha vai; ‘oku nau foki mo honau ngaahi nge‘esi ipu: kuo nau mā mo laea, ‘o nau fakapūlou honau ‘ulu. 4‘Oku mā ‘a e kau fa‘a, ‘oku nau fakapūlou honau ‘ulu, koe‘uhi ko e kelekele, ‘a ia ‘oku puputu‘u ko e ‘ikai ha ‘uha ‘e tō ki he fonua. 5Seuke, na‘a mo e hainiti ‘i he vao, ‘oku ne fā‘ele, ‘o li‘aki ko e ‘ikai ha musie. 6Pea ko e fanga ‘asi kaivao, ‘oku nau tu‘u ‘i he ngaahi funga mo‘unga molemole, ‘o tōtōngā ai, ‘o hangē ko e fanga siakali: kuo ‘osi‘osi honau mata ko e ‘ikai ha mohuku. 7Neongo ‘oku talatalaaki‘i kimautolu ‘e he‘emau ngaahi kovi, ‘e Sihova, ke ke ngāue telia ho huafa: he ko ‘emau ngaahi holomui ‘oku lahi; kuo mau hia ki he ‘Afiona. 8Si‘i ‘Amanaki‘anga ‘o ‘Isileli, ko si‘ono Fakamo‘ui ‘i he taimi faingata‘a, ko e hā ‘oku ke hangē ai ko ha ‘āunofo ‘i he fonua, ‘io, hangē ko ha tangata fononga kuo afe mai ke mohe? 9Ko e hā ‘oku ke hangē ai ko ha tangata puputu‘u, hangē ha mafi ‘oku ‘ikai lava ke tokoni? ka ‘oku ke ‘i homau lotolotonga, ‘Eiki, pea ko ho huafa ‘oku ui‘aki ‘a kimautolu; ‘oua ‘e tuku ai pē kimautolu.
10Ko e folofola eni ‘a Sihova ki he kakai ni, Na‘e pehē ‘enau manako ke hē; na‘e ‘ikai te nau ta‘ofi honau va‘e: ko ia, ‘oku ‘ikai ke manako ‘e Sihova kiate kinautolu; te ne manatu eni ‘enau kovi, mo ‘eke ‘enau hia.
11Pea folofola ‘a Sihova kiate au, ‘Oua te ke hufekina ‘a e kakai ni ke nau lelei. 12He ka nau ka ‘aukai, ‘oku ‘ikai te u ongo‘i ‘enau tangi; pea ka nau ka ‘omi feilaulau-mōifua, pe ko e feilaulau-me‘akai, ‘oku ‘ikai te u hōhō‘ia ai: kaekehe te u faka‘osi kinautolu ‘e au, ‘aki ‘a e heletā, mo e honge mo e mate faka‘auha.
13Pea u pehē ‘e au, ‘Ātonai Sihova ē, vakai, ‘oku tala ‘e he kau palōfita kiate kinautolu, ‘E ‘ikai te mou sio ki he heletā, pea ‘e ‘ikai hoko ha honge kiate kimoutolu; kaekehe ‘oku ou tuku atu ‘a e melino pau ‘i he potu ni.
14Pea folofola ‘a Sihova kiate au, Ko e loi pē ‘a e palofisai ‘oku fai ‘e he kau palōfita ‘i hoku hingoa. Tala‘ehai kuo u fekau atu kinautolu, pea tala‘ehai kuo u fai ha tu‘utu‘uni ki ai, pea tala‘ehai kuo u lea kiate kinautolu: ko e vīsone loi pē mo e tongafisi, mo e me‘a faka‘aitoli, mo e kākā ‘a honau loto, ko ia ia ‘oku nau fai‘aki ‘enau palofisai kiate kimoutolu. 15Ko ia, ko e folofola eni ‘a Sihova ki he kau palōfita ‘oku nau fai ‘enau palofisai ‘i hoku hingoa; ‘osi, ‘oku ‘ikai ko au na‘e fekau kinautolu, ko e fa‘ahinga ‘oku nau pehē, ‘E ‘ikai hoko ‘a e heletā mo e honge ki he fonua ni–Ko e heletā mo e honge ‘e mate ai ‘a e kau palōfita ko ia. 16Pea ko e kakai ‘a ia ‘oku palofisai ki ai ‘a e fa‘ahinga ko ia, ‘e li‘ekina noa pē kinautolu ‘i he ngaahi hala ‘o Selusalema, ko e me‘a ‘i he honge mo e heletā; pea ‘e ‘ikai tanu kinautolu ‘e ha taha, ‘a kinautolu mo honau ngaahi uaifi mo ‘enau fānau tangata mo fānau fefine: he ‘oku ou lilingi kiate kinautolu ‘enau kovi.
17Pea te ke lea‘aki kiate kinautolu ‘a e lea ko eni, “Ke fetafei hoku mata ‘i he lo‘imata he pō mo e ‘aho, ‘o ‘oua ‘e tuku; he kuo maumau ‘a e ta‘ahine tāupo‘ou ‘o hoku kakai ‘aki ha maumau lahi, ko e tā mamahi ‘aupito.” 18Kapau te u hū ki tu‘a ki he vao, vakai ko e kakai ena kuo tō ‘i he heletā; pea kapau te u hū ki he kolo, pea tā ko e kakai ena ‘oku mahaki ‘i he honge. Seuke, ko e palōfita mo e taula‘eiki kuo ‘alu, ‘o hē noa ki ha fonua, ‘o ‘ikai ‘ilo pe ko ‘enau ‘alu ki fē.
Ko e Fakakolekole ‘a e Kakaí kia Sihova
19Kuo ke mātu‘aki li‘aki koā ‘a Siuta? ‘oku fakalili‘a koā ho laumālie ki Saione? Ko e hā kuo ke taa‘i pehē ai kimautolu ke ‘oua na‘a lava ha faito‘o? ‘Oku mau ‘amanaki ki ha tu‘umālie, ka ‘oku ‘ikai ha lelei; pea ‘oku mau ‘amanaki ki ha taimi faito‘o, pea tā ko e fakalilifu. 20‘Oku mau ‘ilo, ‘Eiki, ‘emau angahala, ‘a e kovi ‘o ‘emau ngaahi kui; seuke, kuo mau angahala ki he ‘Afiona. 21‘Oua te ke keu‘i, telia ho huafa; ‘oua te ke fakalielia‘i ‘a e taloni ‘o ho lāngilangi: manatu mu‘a, ‘oua ‘e maumau‘i ho‘o kovinānite mo kimautolu. 22Hono ai ha taha ‘i he ngaahi ‘aitoli noa ‘i he ngaahi pule‘anga ‘oku lava ke faka‘uha? ‘io, ‘e lava ‘e he ngaahi langi ke lōvai? ‘ikai ko koe pē ia, ‘e Sihova, ko homau ‘Otua? pea ko koe ‘oku mau sio ki ai; he ko koe na‘a ke ngaohi ‘a e ngaahi me‘a ko ia kotoa.
Currently Selected:
KO SELEMAIA 14: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
