KO SELEMAIA 13
13
Ko e No‘o Līneni
1KO eni ‘a e folofola ‘a Sihova kiate au, ‘Alu, ‘o fakatau mai ha no‘o līneni, pea ‘ai ki ho kongaloto, pea ‘oua ‘e unu ki ha vai. 2Pea u fakatau ‘a e no‘o, hangē ko e folofola ‘a Sihova, pea u ‘ai ki hoku kongaloto. 3Pea hoko ‘a e folofola ‘a Sihova kiate au ko hono tu‘o ua, ‘o pehē, 4To‘o ‘a e no‘o na‘a ke fakatau, ‘a ia ‘oku ‘i ho kongaloto, pea ke tu‘u, ‘o ‘alu ki ‘Eufaletesi, pea fufū ia ‘i ai, ‘i ha ava ‘o e makatu‘u. 5Pea u ‘alu, pea u fufū ia ‘i ‘Eufaletesi, ‘o hangē ko e tu‘utu‘uni au ‘e Sihova.
6Pea hili ‘a e ngaahi ‘aho lahi, na‘e folofola ‘a Sihova kiate au, Tu‘u, ‘alu ki ‘Eufaletesi, pea to‘o mei ai ‘a e no‘o, ‘a ia na‘a ku fekau ke ke fufū ai. 7Ko ia, na‘a ku ‘alu ki ‘Eufaletesi, pea u keli, ‘o u to‘o ‘a e no‘o mei he potu na‘a ku fufū ai ia: pea tā kuo maumau ‘a e no‘o, ‘o ‘ikai ‘aonga ki ha me‘a.
8Pea hoko ‘a e folofola ‘a Sihova kiate au, ‘o pehē, Ko e folofola eni ‘a Sihova: 9‘E pehē ‘eku maumau ‘a e pōlepole‘anga ‘o Siuta, mo e pōlepole‘anga ‘o Selusalema ‘a ia ‘oku hulu. 10Ko e kakai kovi ni, ‘a ia kuo ‘ikai te nau fie fanongo ki he‘eku ngaahi lea, ‘oku nau fou pē ‘i he ta‘emīngao honau loto, pea ‘oku nau muimui ‘otua kehe, ke tauhi ki ai, mo lotu ki ai, te nau hoko hangē ko e no‘o ni, ‘a ia ‘oku ‘ikai ‘aonga ki ha me‘a. 11He hangē ‘oku piki ‘a e no‘o ki he kongaloto ‘o ha tangata, ‘oku pehē mo ‘eku fakapiki kiate au ‘a e fale kotoa ‘o ‘Isileli, mo e fale kotoa ‘o Siuta–ko Sihova ia mei he Ta‘ehāmai; koe‘uhi ke nau hoko kiate au ko e kakai, mo e hingoa, mo e fakamālō, mo e teunga: ka na‘e ‘ikai te nau fakaongo mai.
Ko e Siā Uaine
12Pea te ke lea‘aki kiate kinautolu ‘a e lea ko eni: Ko e folofola eni ‘a Sihova, ko e ‘Otua ‘o ‘Isileli, Ko e siā kotoa ‘e fakafonu uaine. Pea te nau pehē kiate koe, ‘Ā, ‘ikai ‘oku mau lāu‘ilo ki ai, ko e siā kotoa ‘e fakafonu uaine? 13Pea te ke pehē kiate kinautolu, Ko e folofola eni ‘a Sihova; Ko au eni ‘oku ou fakafonu ‘a e nofo kotoa he fonua ni–‘a e ngaahi tu‘i, ‘oku fetongi ‘a Tēvita ‘i hono taloni, mo e kau taula‘eiki, mo e kau palōfita, mo e nofo Selusalema fua pē–‘oku ou fakafonu kinautolu ‘aki ‘a e kona. 14Pea te u fakafepaki kinautolu, ‘io, ‘a e mātu‘a mo e fānau fakataha–ko Sihova ia mei he Ta‘ehāmai: ‘e ‘ikai te u lolou, pea ‘e ‘ikai te u mamae, pea ‘e ‘ikai te u faka‘atu‘i, ka te u faka‘auha pē kinautolu.
Ko ha Fakatokanga ‘a Selemaia ‘i he Anga Hikí
15Fanongo kimoutolu, ‘o mou fokotu‘u telinga mai; ‘oua te mou fakamofutofuta; he ko Sihova ia ‘oku lea. 16Tuku kia Sihova ko homou ‘Otua ‘a e kolōlia, he te‘eki ke ne ‘omi ‘a e po‘uli, pea te‘eki humu homou va‘e ‘i he ngaahi mo‘unga ‘o e efiafi po‘uli; pea ‘oku mou ‘amanaki ki ha maama, ka ‘oku ne liliu ia ko e ‘ata-‘o-mate, ‘oku ne ngaohi ia ko e po‘uli matolu. 17Pea kapau ‘oku ‘ikai te mou fakaongo, tā ‘e tangi ‘i he lilo hoku laumālie koe‘uhi ko e fakapupula na, pea mātu‘aki tangi hoku mata ni, ‘o fetafei ‘i he lo‘imata, koe‘uhi kuo taki pōpula ‘a e tākanga ‘a Sihova.
18Lea ki he tu‘i pea ki he ma‘itaki, Nofo ‘i lalo; he kuo homo hifo ‘a e teu homo ‘ulu, ‘a hono kalauni lāngilangi‘anga. 19Ko e ngaahi kolo ‘i he feitu‘u ko Tonga kuo songo, pea ‘oku ‘ikai lava ‘e ha taha ke fakaava: kuo taki pōpula ‘a Siuta kātoa; kuo taki pōpula, ‘o hiki mo e faliki.
20Ta‘ahine, tāngaki homou mata, ‘o vakai ‘a kinautolu ‘oku ha‘u mei he tokelau. Kofa‘ā ‘a e tākanga na‘e tuku kiate koe, ho‘o fanga sipi faka‘ofo‘ofa? 21Ko e hā ha‘o lau ‘e fai ka ne ka fokotu‘u ha ni‘ihi ke ‘ulu kiate koe, ka ko e fa‘ahinga kuo ke fakamaheni kinautolu ke kaume‘a mo koe? ‘Ikai ‘e puke koe ‘e he mamahi, ‘o hangē ko ha fefine fā‘ele? 22Pea kapau te ke pehē ‘i ho loto, Ko e hā ‘oku mo‘utāmakia ai au ‘e he ngaahi me‘a ni? ‘Ā, ko e lahi ho‘o kovi kuo huke ai ho kāuni, kuo fā homou va‘e. 23‘E lava ‘e ha ‘Itiopea ke liliu hono kili, pe ko ha lēpati ke liliu hono pulepule? ‘e toki lava ai ‘e kimoutolu foki ke fai lelei, ‘a ia ‘oku mou maheni mo e faikovi. 24Ko ia te u veteki ‘a kinautolu, hangē ko e kafukafu ‘oku ifi ‘e he matangi ‘o e toafa. 25Ko eni ho ‘inasi tō, ko ho tufakanga kuo vahe meiate au–ko Sihova ia mei he Ta‘ehāmai: koe‘uhi kuo ke fakangalongalo‘i au, pea kuo ke tu‘u ho‘o falala ki he loi. 26Ko ia foki, ko au te u huke ho kāuni, ‘o pūlou ‘aki ho mata, kae hā ho mā‘anga. 27Ko ho‘o fa‘a tono ‘unoho, ko ho‘o fa‘a tangi tau hangē ha fu‘u hoosi, ko ho‘o fe‘auaki mousa‘a ‘i he ngaahi funga mā‘olunga ‘i he tuku‘uta–‘Ā, kuo u mamata ki ho‘o ngaahi fakalielia, ‘Oiauē koe, Selusalema! ‘e ‘ikai lava ho fakama‘a; kae‘oua ke hili ha taimi–fēfē nai hono fuoloa?
Currently Selected:
KO SELEMAIA 13: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
