KO SELEMAIA 12
12
Ko Hano Fakafehu‘i ‘e Selemaia ‘a Sihova
1‘E Sihova, kapau te u fakamaau mo koe, kuo pau te ke tonuhia: kaekehe ke u ‘a‘au ‘eku me‘a mo koe. Ko e hā ‘oku monū‘ia ai ‘a e founga ‘o e kau angahala? Ko e hā ‘oku tu‘umālie ai ‘a kinautolu fua pē ‘oku fai kākā? 2Kuo ke tō kinautolu, kuo nau aka hifo foki; ‘oku nau tupu, ‘io, ‘oku nau fua: ‘oku ke ofi ki honau ngutu, ka ‘oku ke mama‘o mei honau kofuua. 3Ka ka koe, ‘e Sihova, ‘oku ke ‘ilo au; ‘oku ke siofi au, pea ‘oku ke sivi ‘a e fakafeangai ‘a hoku loto ki he ‘Afiona. Toho atu kinautolu ‘o hangē ko e fanga sipi ke tāmate‘i, pea ke polo‘i kinautolu ki ha ‘aho tāmate. 4‘E ngata afe ‘a e tangi ‘a e fonua, mo e mae ‘a e mohuku ‘o e tuku‘uta kotoa? ko e me‘a ‘i he kovi ‘a e kakai ‘oku nofo ai, ko ia kuo mole ai ‘a e manu ‘o e vao, mo e manupuna; he ‘oku nau pehē, ‘E ‘ikai te ne sio ki hotau iku‘anga.#12.4 hotau iku‘anga; Ko hono faka-Hepeluú ia, ka ‘oku pehē ‘i he ngaahi hiki fuoloa ‘e ni‘ihi: he‘enau me‘a ‘oku fai.
5Kapau kuo ke lele mo e kau ha‘ele, pea ke hela ai, pea fēfē ‘oka ke ka veipā mo e fanga hoosi? pea kapau ‘oku ke pehē ‘i ha fonua melino, ‘a ia ‘oku ke nofo falala ai, pea ko e hā te ke fai ‘i he lāngilangi ‘o Soatani? 6He na‘a mo ho kāinga, mo e fale ‘o ho‘o tamai, na‘a mo kinautolu te#12.6 te; ‘Oku hiki ‘e he ni‘ihi: kuo. nau fai kākā kiate koe; na‘a mo kinautolu te nau tuli koe mo e fu‘u kaila: ‘oua te ke tui kiate kinautolu, neongo ‘enau lea‘aki ‘a e ngaahi lelei kiate koe.
Ko e Mamahi e Finangalo ‘o Sihová koe‘uhi ko Hono Kakaí
7Kuo u li‘aki hoku fale, kuo u tukuange hoku tofi‘a; ko e me‘a ‘oku ‘ofa ki ai ‘eku mo‘ui kuo u ‘atu ki he nima ‘o hono ngaahi fili. 8Ko hoku tofi‘a kuo hoko kiate au ‘o hangē ko e laione ‘i he vao; kuo ne ofa‘aki hono le‘o kiate au; ko ia kuo u puke ‘i he fehi‘a kiate ia. 9Kuo hoko koā si‘oku tofi‘a ko e haoke pulepule? kuo loki ia koā ‘e he fanga haoke, ‘o ngaohia? Ha‘u ange, tānaki ‘a e manu kotoa ‘o e vao, ‘omi kinautolu ke keina. 10Ko e kau tauhi tokolahi kuo maumau ‘i ‘eku ngoue vaine, kuo nau malaki hoku tofi‘a, kuo nau ngaohi hoku tofi‘a mamana ko e toafa ‘āngoa. 11Kuo nau tuku ia ko e lala; ‘oku ne tangi kiate au ko ‘ene lala; ko e koto lala ‘a e fonua kotoa, koe‘uhi na‘e ‘ikai ha taha ‘e ‘ai ia ki hono loto. 12Ko e funga mo‘unga molemole kotoa ‘o e toafa kuo ha‘u ki ai ‘a e kau vete; he ‘oku ai ha heletā ‘a Sihova ‘oku keina mei he ngata‘anga ‘e taha ‘o e fonua ‘o a‘u ki he ngata‘anga ‘e taha; ‘e ‘ikai ha fiemālie ki ha kakano ‘e taha. 13Na‘a nau tō uite, ka kuo nau utu ‘a e ‘akau talatala; kuo nau vaivai ‘i he ngāue, ka kuo ‘ikai ‘aonga: ko ia ‘e fakamaa‘i kimoutolu ‘e he fua ‘o ho‘omou fai, koe‘uhi ko e houhau kakaha ‘a Sihova.
Ko e Tala‘ofa ‘a Sihova ki he ngaahi Fonua Kaungā‘api ‘o ‘Isileli
14Ko e folofola eni ‘a Sihova ki hoku ngaahi kaungā‘api kovi ‘a ia kuo nau ala ki he tofi‘a kuo u vahe ki hoku kakai ‘Isileli: Ko au eni ‘oku ou hamusi kinautolu mei honau kelekele, pea te u hamusi ‘a e fale ‘o Siuta mei honau lotolotonga. 15Pea ‘i he taimi ko ia, hili ‘eku hamusi kinautolu, te u tafoki ‘o ‘ofa kiate kinautolu, pea te u fakafoki kinautolu takitaha ki hono tofi‘a, pea takitaha ki hono fonua. 16Pea ‘i he taimi ko ia, kapau te nau mātu‘aki ako ‘i he ngaahi ‘alunga ‘o hoku kakai, ke fai ‘enau fuakava ‘i hoku hingoa, ‘o pehē, Tangi ‘a e mo‘ui ‘a Sihova; ‘o hangē ko ‘enau ako hoku kakai ke fuakava ‘ia Peali; 17pea ‘e toki langa kinautolu ‘i he lotolotonga ‘o hoku kakai, Ka ‘o kapau ‘oku ‘ikai te nau fakaongo, pea te u ta‘aki ‘a e pule‘anga ko ia, te u ta‘aki mo faka‘auha–ko Sihova ia mei he Ta‘ehāmai.
Currently Selected:
KO SELEMAIA 12: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
