KO SELEMAIA 11
11
Ko Selemaia mo e Kovinānité
1KO E folofola na‘e hoko kia Selemaia meia Sihova, ‘o pehē, 2Mou fanongo ki he ngaahi lea ‘o e kovinānite ko eni, pea lea‘aki ia ki he tangata Siuta, pea ki he nofo Selusalema; 3pea te ke pehē kiate kinautolu, Ko e folofola eni ‘a Sihova, ko e ‘Otua ‘o ‘Isileli: Mala‘ia ā ka ko ia ‘oku ‘ikai ke fakaongo ki he ngaahi lea ‘o e kovinānite ko eni, 4‘a ia na‘a ku tu‘utu‘uni ki ho‘omou ngaahi kui ‘i he taimi na‘a ku fakahao mai kinautolu mei he fonua ko ‘Isipite, mei he fōnise haka ‘aione, he‘eku pehē, Mou fakaongo ki hoku le‘o, pea mou fai ‘a e ngaahi me‘a ko ē, ‘a e me‘a fua pē kuo u tu‘utu‘uni atu: pea te mou toki hoko ko hoku kakai, pea te u hoko au ko homou ‘Otua: 5koe‘uhiā ke u fakaai ‘a e fuakava na‘a ku fai mo ho‘omou ngaahi kui, ke ‘ange kiate kinautolu ha fonua ‘oku mahutafea ‘i he hu‘akau mo e honi, ‘o hangē ko ia he ‘aho ni.
Pea u tali, pea u pehē, ‘Ēmeni, ‘Eiki.
6Pea folofola ‘a Sihova kiate au, Fanongonongo ‘a e ngaahi lea kotoa ko eni ki he ngaahi kolo ‘o Siuta, mo e ngaahi hala ‘o Selusalema, ‘o pehē, Mou fakaongo ki he ngaahi lea ‘o e kovinānite ko eni, pea mou fai ia. 7He talu e ‘aho na‘a ku ‘ohake ai kinautolu mei ‘Isipite, ‘o fai mai ki he ‘aho ni, mo ‘eku mātu‘aki tapou ki ho‘omou ngaahi kui, ‘o u ‘ā hengihengi ke fai, he‘eku pehē, Mou fakaongo ki hoku le‘o. 8Ka na‘e ‘ikai te nau fakaongo, pea na‘e ‘ikai te nau fokotu‘u telinga mai, ka nau fou takitaha ‘i he ta‘emīngao ‘a honau loto kovi: ko ia kuo u ‘omi kiate kinautolu ‘a e ngaahi me‘a kehekehe ‘oku tu‘u ‘i he kovinānite ko eni, ‘a ia na‘a ku tu‘utu‘uni ke nau fai ki ai, ka na‘e ‘ikai te nau fai.
9Pea folofola ‘a Sihova kiate au, Kuo ‘ilo ha puleaki ‘i he tangata Siuta, mo e nofo Selusalema. 10Kuo nau foki ki he ngaahi kovi ‘o ‘enau ngaahi ‘uluaki kui, ‘a ia na‘e ‘ikai te nau loto ke fakaongo ki he‘eku ngaahi lea, pea kuo nau muimui, ‘a e fa‘ahinga ko eni, ki he ngaahi ‘otua kehe ke tauhi ki ai: kuo maumau‘i ‘e he fale ‘o ‘Isileli mo e fale ‘o Siuta ‘a e kovinānite na‘a ku fai mo ‘enau ngaahi kui. 11Ko ia ko e folofola eni ‘a Sihova, Ko au eni ‘oku ou ‘omi kiate kinautolu ha kovi ‘e ‘ikai te nau hao mei ai; pea neongo ‘enau tautapa kiate au, ka ‘e ‘ikai te u ongo‘i kinautolu. 12Pea ko e ngaahi kolo ‘o Siuta, mo e nofo Selusalema, te nau ‘alu ‘o tautapa ki he ngaahi ‘otua, ‘a ia ‘oku nau tutu ‘inisēnisi ki ai: ka ‘e ‘ikai te nau momo‘i tokoni kiate kinautolu ‘i he taimi ‘o ‘enau kovi. 13He hangē ko e lau ‘o ho ngaahi kolo, ‘e Siuta, ‘oku pehē ‘a e lau ‘o ho ngaahi ‘otua; pea hangē ko e lau ‘o e ngaahi hala ‘i Selusalema, ‘oku pehē ‘a e lau ‘o e ngaahi ‘ōlita kuo mou fokotu‘u ki he Me‘a Fakamā, ‘a e ngaahi ‘ōlita ke tutu ‘inisēnisi ai kia Peali. 14Ko ia, ko koe, ‘oua te ke hufekina ‘a e kakai ni, pea ‘oua te ke ofa‘aki ha‘o tangi pe lotu koe‘uhi ko kinautolu: he ‘e ‘ikai te u ongo‘i kinautolu ‘i he taimi ‘oku nau tautapa mai ai kiate au, koe‘uhi ko e kovi ‘oku nau ‘i ai.
15Ko e hā ‘a hoku ‘ofa‘anga ‘i hoku fale, ‘a e tu‘unga fefine fai kākā? ‘E lava ‘e ha ngaahi tangi mo e kakano tapu ke ‘ave ‘a e kovi meiate koe, ‘oka ke ka mo‘ua ai? Ka pehē, pea tonuhia ho‘o tome‘e.#11.15 ‘Oku fihi ‘aupito ‘a e vēsí ni. ‘Oku pehē ‘i he hiki fuoloa ‘e taha: ‘Oku fai kovi ‘a e kakai ‘oku ou ‘ofa aí. ‘Oku tu‘unga he hā ‘enau hū ki hoku Temipalé? ‘Oku nau fakakaukau koā te nau hao he ‘auha koe‘uhí ko ‘enau ngaahi tukupā ‘oku faí?. 16Ko e ‘ōlive mata faka‘ofo‘ofa ‘i hono fua matamatalelei–na‘e pehē ho ui ‘e Sihova: na‘a ne tutu ‘aki ‘a e afi mo e fu‘u longoa‘a, pea na‘e ‘auha hono ngaahi va‘a.
17Pea ko Sihova Sāpaoti, ‘a ia na‘a ne tō koe, kuo ne tu‘utu‘uni ha kovi ke hoko atu, koe‘uhi ko e kovi ‘a e fale ‘o ‘Isileli mo e fale ‘o Siuta, ‘a ia kuo nau fai ‘e kinautolu ke langa‘i ‘eku ‘ita, he‘enau tutu ‘inisēnisi kia Peali.
Ko ha Fa‘ufaufono ke Tāmate‘i ‘a Selemaia
18Pea na‘e faka‘ilo kiate au ‘e Sihova ke u ‘ilo: na‘a ke toki tuku ke u sio ki he‘enau fai anga. 19Ka ko au na‘a ku hangē ha lami pusiaki ‘oku taki atu ke tāmate‘i; ‘o ‘ikai te u ‘ilo ‘oku nau fakakaukau‘i ha kovi ke fai kiate au, ‘o pehē, Tau faka‘auha ‘a e ‘akau mo hono me‘akai,#11.19 mo hono me‘akai; Ko hono faka-Hepeluú ia, ka ‘oku ngali tonu ‘a hono hiki ‘o: ‘i he‘ene kei mo‘ui leleí. ‘io, ke tau tu‘usi ia mei he fonua ‘o e mo‘ui, pea ‘oua na‘a toe manatua hono hingoa.
20Ka ko Sihova Sāpaoti, ‘a e Fakamaau Totonu, ‘a e ‘Afio ‘oku sivi ‘a e kofuua mo e loto–te u sio ki ho‘o sauni ‘oku fai kiate kinautolu: he kuo u tala ‘eku me‘a kiate koe.
21Ko ia ko e folofola eni ‘a Sihova, ‘o kau ki he kau tangata ‘Anatoti, ‘a kinautolu ‘oku kumi ho‘o mo‘ui, he‘enau pehē, ‘E ‘ikai te ke palofisai ‘i he huafa ‘o Sihova, na‘a ke mate ‘i homau nima: 22ko ia ko e folofola eni ‘a Sihova Sāpaoti, Ko au eni te u tautea kinautolu: ko honau kau talavou te nau mate ‘i he heletā; ko ‘enau fānau tangata mo fānau fefine te nau mate ‘i he honge; 23pea ‘e ‘ikai hanau toenga: he ‘oku ou ‘omi ha kovi ki he kau tangata ‘Anatoti, ko honau ta‘u ‘eke.
Currently Selected:
KO SELEMAIA 11: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
