KO ‘AISEA 58
58
Ko e ‘Aukai Mo‘oní
1KALANGA mei ho loto u‘a, ‘oua ‘e fakama‘uma‘u:
‘Ai atu ho le‘o hangē ha talupite,
‘O fakahā ki hoku kakai ‘enau talangata‘a,
Pea ki he fale ‘o Sēkope ‘enau hia.
2Ka ‘oku nau kumi kiate au ‘i he ‘aho hokohoko, pea ‘oku nau faka‘amu ke ‘ilo hoku ngaahi founga: ‘o hangē ko ha pule‘anga kinautolu kuo feia ‘a e totonu, pea kuo ‘ikai li‘aki ‘a e lao ‘a honau ‘Otua, ‘oku nau kole meiate au ‘a e ngaahi fakamaau totonu, ‘oku nau faka‘amu ke ‘unu‘unu mai ‘a e ‘Otua.#58.2 ‘unu‘unu… ‘Otuá; pe ‘unu‘unu ki he ‘Otuá.
3‘Oku nau lau, Ko e hā kuo mau ‘aukai ai, ka ‘oku ‘ikai te ke sio ki ai? ‘oku mau fakamamahi ‘emau mo‘ui, ka ‘oku ‘ikai te ke toka‘i? ‘Ā, ‘i he ‘aho ‘o ho‘omou ‘aukai ‘oku mou fai atu ho‘omou me‘a, ‘oku mou fakapuhopuha‘a ki ho‘omou kau ngāue kotoa.#58.3 pe ‘oku mou… kotoa; pe ‘oku mou ‘eke homou fatongiá kotoa.
4Vakai, ‘oku fai ho‘omou ‘aukai ke fakakikihi mo kē, pea ke tā ‘aki ‘a e nima kuo kuku ke fai ha tuki: tala‘ehai ‘oku mou ‘aukai ‘i onopooni koe‘uhi ke ongo homou le‘o ‘i Taukakapa. 5Ko eni koā ‘a e ‘aukai te u manako ai? ko e ‘aho tokua ke fakamamahi ‘e ha tangata ‘ene mo‘ui? ke tāupe hono ‘ulu hangē ha moa‘i fusi, pea ke folahi tauanga‘a mo e efu ke ne toka ai? ‘oku ke ui ha me‘a pehē ko e ‘aukai, mo e ‘aho ‘e hōifua ai ‘a Sihova?
6‘Ikai ko eni pē ‘a e ‘aukai te u manako ki ai? ko e veteange ‘a e ngaahi ha‘i ‘oku hala hono ‘ai, ke tatala ‘a e ngaahi ha‘i ‘o e ‘ioke, mo tukuange tau‘atāina ‘a e kakai ta‘omia, ‘io, ke fesi‘i ‘a e fa‘ahinga ‘ioke kotoa pē? 7‘Ikai ko eni foki, ke paki ua ho‘o mā mo e fiekaia, pea ke fakahū ki ho fale si‘i kau masiva kuo li‘aki? ko ho‘o sio leva ki ha taha ta‘ekofu pea ke fakakofu; pea ke ‘oua na‘a ke fekalofaki mei ha taha ‘a ia ko ho kakano tonu?#Māt 25.35
8‘E toki mafoa mai ho‘o maama hangē ko e pongipongi, pea ‘e vave ho fakakakano fo‘ou: ‘e takitau kiate koe ho‘o tonuhia; pea ‘e tukutau ‘a e kolōlia ‘o Sihova. 9Te ke toki ui, pea ‘e tali ‘e Sihova; te ke tautapa, pea te ne pehē, Ko au eni. Kapau te ke hiki mei ho lotolotonga ‘a e ‘ioke, ‘a e tuhu manuki, ‘a e lea kovi.
10Pea ke tauhi ‘a e fiekaia ‘aki ho mamana, pea ke fakatopono ‘a e loto kuo mafasia; pea ‘e toki hopo ho‘o maama ‘i he po‘uli, pea ko ho kaupō‘uli ‘e hangē ko e ho‘atā: 11pea ‘e taki koe ‘e Sihova ma‘u ai pē, pea te ne fakatopono ho‘o mo‘ui ‘i he ngaahi potu mōmoa, pea te ne ngaohi ho ngaahi hui ke mohu huhu‘a.#58.11 ke mohu huhu‘a; pe ke mālohi. pea te ke hangē ko e ngouetapu vai‘ia, pea hangē ko e fauniteni, ‘a ia ‘oku ‘ikai hala hono vai ha taimi. 12Pea ko e ni‘ihi ‘oku tupu meiate koe te nau langa ‘a e ngaahi kolo maumau talu mei tuai: te ke hoko hake ‘a e ngaahi tu‘unga na‘e ‘ai ‘e he to‘utangata mo e to‘utangata; pea ‘e ui koe ko Monomono-ava, ko e Fakafo‘ou ‘o e ngaahi hala ke fai ai ha nofo.
13Kapau te ke ta‘ofi ho va‘e mei he maumau Sāpate, mei he fai ho‘o ngāue ‘i hoku ‘aho tapu; pea ke lau ‘a e Sāpate ko e me‘a fakafiefia, pea ke lau ‘a e tapu ‘a Sihova ko e me‘a ke fakalāngilangi‘i; pea ke fai hono fakalāngilangi‘i ‘i he faka‘ehi‘ehi mei ho‘ou ngaahi founga, mo e nofo ki ha‘au ngāue mo e fa‘a lea:#58.13 fa‘a lea; pe fai ‘o e ngaahi lea ‘a‘au. 14Pea te ke toki fakafiefia ‘ia Sihova; pea te u tuku koe ke ke heka ki he ngaahi mā‘olunga ‘o e fonua; pea te u tuku ke ke kai ‘a e ‘inasi ‘o ho‘o kui ko Sēkope: he kuo folofola ki ai ‘a e fofonga ‘o Sihova.
Currently Selected:
KO ‘AISEA 58: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
