KO ‘AISEA 57
57
Ko Hono Valoki‘i ‘o e Lotu Tamapua ‘a ‘Isilelí
1‘OKU mole ‘a e tangata faitotonu, kae ‘ikai ha taha ‘e fakatokanga hono loto ki ai; pea ‘oku utu ki fa‘itoka ‘a e kakai lotu mo‘oni, ta‘emahino ki ha taha ‘oku ‘ave ‘a e tangata faitotonu ke ‘oua te ne sio ki he kovi ‘oku ha‘u. 2‘Oku ne hū ki he fiemālie; ‘oku nau mālōlō ‘i honau toka‘anga, ha taha kuo tonusika hono founga.
3Ka ko kimoutolu, mou ‘unu‘unu mai ki heni, ‘a e fānau ‘a e fefine fai sausau, ‘a e hako ‘o e tono fefine mo e fai fe‘auaki. 4Ko hai ‘oku mou fakakata ‘aki? ‘oku mou mio‘i mafa‘a ‘a e ngutu kia hai, mo fakatete‘e ‘elelo? ‘Ikai ko e tupu‘i talangata‘a kimoutolu, ko e hako‘i loi? 5‘a e fa‘ahinga ‘oku tafunaki ho‘omou holi ‘aki ‘a e ngaahi ‘aitoli#57.5 ‘aitoli; ‘Oku hiki ‘e he ni‘ihi: ‘oke. ‘i he lolo ‘akau mata fua pē, ‘a e fa‘ahinga tāmate‘i fānau ‘i he ngaahi tele‘a, ‘i he lalo ava‘i makatu‘u. 6‘Oku ke ma‘u ho tofi‘a ‘i he ngaahi maka molemole ‘o e halanga vai; ko kinautolu, ko kinautolu ho‘o koloa: seuke kuo ke lilingi kiate kinautolu ha feilaulau-inu, kuo ke ‘atu ha feilaulau-me‘akai. Pea te u nofo fiemālie koā ‘i ha me‘a pehē? 7Kuo ke ‘ai ho mohenga ki ha funga mo‘unga mā‘olunga, mahiki hake: kuo ke ‘alu hake foki ki ai ke fai ho‘o feilaulau. 8Pea ko ho‘o fakamanatu kuo ke ‘ai ki he tu‘a matapā mo e tu‘a pou: he kuo ke vete kofu ki ha taha kehe, ‘o ‘ikai ko au, pea kuo ke heka ki ai; na‘a ke ngaohi ho mohenga ke laulahi, pea na‘a ke tu‘utu‘uni ‘a e me‘a te nau fai kiate koe; na‘a ke ‘ofa ki he‘enau tokoto mai, ‘oku ke fakasio ki he kupu. 9Pea na‘a ke ‘a‘ahi ki he tu‘i kuo ke tākai, pea kuo ke ‘ai ke lahi ‘a e ngaahi fa‘ahinga ahi, pea na‘a ke tuku atu ho‘o kau talafekau ki he mama‘o, pea na‘a ke fakamā‘ulalo koe ‘o a‘u ki lolofonua. 10Na‘a ke ongosia ‘i he lōloa ho fononga; ka tala‘ehai na‘a ke pehē, ‘Oku ta‘e‘aonga. Na‘a ke ma‘u ha fakafo‘ou ‘o ho mālohi; ko ia na‘e ‘ikai te ke ongo‘i vaivai ai.
11Pea ko hai kuo ke hoha‘a ki ai, ‘o ke manavahē ai, ‘o ke fai kākā, ‘o ‘ikai te ke manatu‘i au, ‘o ‘ikai te ke ‘ai ‘a e me‘a ki ho loto? ‘ikai kuo u fakalongo pē, ‘io, ‘o talu fuoloa? tala‘ehai na‘a ke manavahē kiate au. 12Ko au te u fakahā ho‘o tonuhia tokua; pea ko ho‘o ngaahi ngāue, tala‘ehai te nau ‘aonga kiate koe. 13Ka fai ho‘o tangi, pea ke fakahaofi koe ‘e ho‘o fokotu‘unga me‘a na. ‘Ā, ‘oku punakaki kotoa ‘e ha matangi: ‘e ‘ave pē ‘e ha fo‘i hō: ka ko ia ‘oku falala kiate au te ne ma‘u ‘a e fonua, pea te ne tofi‘a ‘aki hoku mo‘unga tapu.
14Pea na‘e ongo mai ha le‘o ‘o pehē,
“Tanu hake, tanu hake,
Fakatonutonu ha hala.
Hiki ‘a e tūkia‘anga
Mei he hala ‘o hoku kakai.”
15He ko e folofola ena ‘a e Fotu mo Mahiki-hake, ‘a e Toko Taha ‘oku ne ‘afioa ‘a ‘ītāniti, pea ko Tāpuhā hono huafa: ‘Oku ou nofo ‘i Taukakapa, pea ‘i he Potu Tapu, pea mo ia ‘oku loto mafesi mo anga malū, ke fakamānava hake ‘a e laumālie ‘o e anga malū, pea ke fakamānava hake ‘a e loto ‘o e kau mafesi. 16He ‘oku ‘ikai te u veipā ma‘u ai pē, pea ‘oku ‘ikai te u ‘ita ‘o ta‘engata; na‘a pongia ‘a e laumālie ‘i he fai mo au, ‘io, ko e ‘ū mo‘ui kuo u ngaohi.#57.16 He… ngaohi; pe Ko au na‘á ku ‘oange ‘a e mo‘ui ‘a hoku kakaí, pea ‘e ‘ikai te u talatalaaki‘i ai pē kinautolu pe ‘ita ‘iate kinautolu ‘o ta‘engata. 17Koe‘uhi ko e kovi ‘o ‘ene mānumanu, ko ia na‘a ku ‘ita ai, pea u taa‘i ia, na‘a ku fufū au meiate ia, he kuo u ‘ita: ka ka ‘alu atu pē ia, ‘o afe ai pē ‘i he hala ‘oku ne loto ki ai.
18Kuo u sio ki hono ngaahi founga, pea te u faito‘o ia; pea te u taki ia, pea te u fakaai hono fakalelulelu kiate ia, mo ‘ene kau tangi. 19“Ko ia ‘oku ne fakatupu ‘a e fua ‘o e loungutu ‘oku ne tala nonga, ka ko ha nonga, ki he mama‘o mo e ofi”–ko e folofola ‘a Sihova ia; he te u faito‘o ia.#‘Efe 2.17 20Ka ko e kau angahala, ‘oku hangē ko e tahi hou; he ‘oku ‘ikai ke manonga, pea ‘oku ta‘aki hake ‘e hono ngaahi peau ‘a e kele mo e pela. 21‘Oku ‘ikai ha fiemālie ki he kau angahala–ko e folofola ia ‘a hoku ‘Otua.#‘Ais 48.22
Currently Selected:
KO ‘AISEA 57: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
