Popular Bible Verses from KO ‘AISEA 58

Share

pea ‘e taki koe ‘e Sihova ma‘u ai pē, pea te ne fakatopono ho‘o mo‘ui ‘i he ngaahi potu mōmoa, pea te ne ngaohi ho ngaahi hui ke mohu huhu‘a. pea te ke hangē ko e ngouetapu vai‘ia, pea hangē ko e fauniteni, ‘a ia ‘oku ‘ikai hala hono vai ha taimi.

‘Ikai ko eni pē ‘a e ‘aukai te u manako ki ai? ko e veteange ‘a e ngaahi ha‘i ‘oku hala hono ‘ai, ke tatala ‘a e ngaahi ha‘i ‘o e ‘ioke, mo tukuange tau‘atāina ‘a e kakai ta‘omia, ‘io, ke fesi‘i ‘a e fa‘ahinga ‘ioke kotoa pē? ‘Ikai ko eni foki, ke paki ua ho‘o mā mo e fiekaia, pea ke fakahū ki ho fale si‘i kau masiva kuo li‘aki? ko ho‘o sio leva ki ha taha ta‘ekofu pea ke fakakofu; pea ke ‘oua na‘a ke fekalofaki mei ha taha ‘a ia ko ho kakano tonu?

‘E toki mafoa mai ho‘o maama hangē ko e pongipongi, pea ‘e vave ho fakakakano fo‘ou: ‘e takitau kiate koe ho‘o tonuhia; pea ‘e tukutau ‘a e kolōlia ‘o Sihova.

Te ke toki ui, pea ‘e tali ‘e Sihova; te ke tautapa, pea te ne pehē, Ko au eni. Kapau te ke hiki mei ho lotolotonga ‘a e ‘ioke, ‘a e tuhu manuki, ‘a e lea kovi.

Pea ke tauhi ‘a e fiekaia ‘aki ho mamana, pea ke fakatopono ‘a e loto kuo mafasia; pea ‘e toki hopo ho‘o maama ‘i he po‘uli, pea ko ho kaupō‘uli ‘e hangē ko e ho‘atā

Pea ko e ni‘ihi ‘oku tupu meiate koe te nau langa ‘a e ngaahi kolo maumau talu mei tuai: te ke hoko hake ‘a e ngaahi tu‘unga na‘e ‘ai ‘e he to‘utangata mo e to‘utangata; pea ‘e ui koe ko Monomono-ava, ko e Fakafo‘ou ‘o e ngaahi hala ke fai ai ha nofo.

Kapau te ke ta‘ofi ho va‘e mei he maumau Sāpate, mei he fai ho‘o ngāue ‘i hoku ‘aho tapu; pea ke lau ‘a e Sāpate ko e me‘a fakafiefia, pea ke lau ‘a e tapu ‘a Sihova ko e me‘a ke fakalāngilangi‘i; pea ke fai hono fakalāngilangi‘i ‘i he faka‘ehi‘ehi mei ho‘ou ngaahi founga, mo e nofo ki ha‘au ngāue mo e fa‘a lea: Pea te ke toki fakafiefia ‘ia Sihova; pea te u tuku koe ke ke heka ki he ngaahi mā‘olunga ‘o e fonua; pea te u tuku ke ke kai ‘a e ‘inasi ‘o ho‘o kui ko Sēkope: he kuo folofola ki ai ‘a e fofonga ‘o Sihova.

Vakai, ‘oku fai ho‘omou ‘aukai ke fakakikihi mo kē, pea ke tā ‘aki ‘a e nima kuo kuku ke fai ha tuki: tala‘ehai ‘oku mou ‘aukai ‘i onopooni koe‘uhi ke ongo homou le‘o ‘i Taukakapa. Ko eni koā ‘a e ‘aukai te u manako ai? ko e ‘aho tokua ke fakamamahi ‘e ha tangata ‘ene mo‘ui? ke tāupe hono ‘ulu hangē ha moa‘i fusi, pea ke folahi tauanga‘a mo e efu ke ne toka ai? ‘oku ke ui ha me‘a pehē ko e ‘aukai, mo e ‘aho ‘e hōifua ai ‘a Sihova?