Popular Bible Verses from KO ‘AISEA 54

Share

‘Ilonga ha mahafu ‘oku fa‘u ke fai‘aki ha kovi kiate koe, ‘E ‘ikai sia‘a; Pea ‘ilonga ha ‘elelo ‘oku hopo mo koe ‘i he fakamaau, Te ke fakahalaia. Ko e ‘inasi eni ‘o e kau tamaio‘eiki ‘a Sihova, Pea ko ‘enau fakatonuhia meiate au– ko Sihova ia mei he Ta‘ehāmai.

Seuke, ‘e hiki nai ‘a e ngaahi mo‘unga, Pea ngaue ‘a e ngaahi potu mā‘olunga; Kae ‘ikai hiki ‘eku ‘ofa meiate koe, Pea ‘e ‘ikai ngaue ‘eku kovinānite melino– ko e folofola ia ‘a Sihova ‘oku ne faka‘atu‘i koe.

‘Oua te ke manavahē, he ‘e ‘ikai fakamaa‘i koe; Pea ‘oua te ke puputu‘u, he ‘e ‘ikai ha me‘a te ke kula ai: He ‘e ngalo ‘iate koe ‘a e mā ‘i ho‘o nofo taka pē, Pea ‘e ‘ikai te ke toe manatu ‘a e manukia ‘o ho‘o nofo uitou.

He ko ho husepāniti ‘a e ‘Afio na‘a ne ngaohi koe; Ko Sihova Sāpaoti hono huafa: Pea ko ho Koeli ‘a e Tāpuhā ‘o ‘Isileli; ‘Oku ui ia ko e ‘Otua ‘o māmani kātoa.

Fakalahi ‘a e tu‘unga ‘o ho tēniti; pea ko e ngaahi tupenu ‘o ho fu‘u nofo‘anga, tuku ke nau falō atu; ‘oua ‘e ta‘ofi: fakaloloa ho‘o ngaahi maea, pea hunuki ke ma‘u ho ngaahi fa‘o.

Pea ko ho‘o fānau fua pē ko e kau ako ‘a Sihova; Pea lahi ‘a e fiemālie ‘i ho‘o fānau.

‘I he fā ‘eku ‘ita na‘a ku hanga kehe meiate koe ko e mōmeniti ‘e taha: Ka ko ‘eku tokanga kiate koe, ‘e fai‘aki ha ‘ofa ta‘engata– ko e folofola ia ‘a ho Koeli ko Sihova.

Na‘a ku li‘aki koe, ka ko e momo‘i kemo pē; Ka ko ‘eku tānaki mai koe, ‘e fai‘aki ha fu‘ufu‘unga faka‘atu‘i.

He ‘oku hangē eni kiate au ko e Lōmaki ‘a Noa: hangē na‘a ku fuakava ‘e ‘ikai toe hoko ki he fonua ‘a e Lōmaki ‘a Noa, ‘oku pehē ‘eku fuakava ‘e ‘ikai te u ‘ita kiate koe, pea ‘e ‘ikai te u ha‘aki valoki‘i koe.

Pea te u ‘ai ho ngaahi taua ko e maka-kula-koloa, Pea ko ho ngaahi matanikolo ko e koto maka ulo, Pea ko e kotoa ho kau‘ā ko e koto maka mahu‘inga.