KO ‘AISEA 2
2
Ko e Melino Ta‘engata
(Maiká 4.1-3)
1KO E folofola na‘e hā kia ‘Aisea foha ‘o ‘Āmosi, ‘o kau ki Siuta mo Selusalema. 2Pea ‘e hoko ‘o pehē ‘i he kuonga ‘amui, ‘e fokotu‘u ‘a e mo‘unga ‘o e fale ‘o Sihova ko e ‘ulu ‘o e ngaahi mo‘unga, pea ‘e mahiki hake ‘i he ngaahi fo‘i mā‘olunga; pea ‘e tafe ki ai ‘a e ngaahi kakai kotoa pē. 3‘Io, ‘e ō ange ‘a e ngaahi kakai lahi, pea te nau pehē, Ha‘u ā, ke tau ‘alu hake ki he mo‘unga ‘o Sihova,#2.3 mo‘unga ‘o Sihova; Ko Mo‘unga Saione ia, ko e mo‘unga ‘i Selusalema na‘e langa ai e Temipalé. ki he fale ‘o e ‘Otua ‘o Sēkope; pea te ne ako kiate kitautolu hano ngaahi ‘alunga, pea te tau fou ‘i hono ngaahi founga: he ko Saione ‘e ‘alu mei ai ‘a e fakahinohino, mo e folofola ‘a Sihova mei Selusalema. 4Pea te ne fakamaau ‘a e vaha‘a ‘o e ngaahi pule‘anga,#Sioelí 3.10 pea te ne sivi ‘a e me‘a ‘a e ngaahi kakai lahi: pea te nau tuki huo ‘aki ‘enau ngaahi heletā, mo e ngaahi hele ‘auhani ‘aki honau ngaahi tao: ‘e ‘ikai ofa heletā ha pule‘anga ki ha pule‘anga, pea ‘e ‘ikai kei fai ha ako tau.
5Fale ‘o Sēkope ē, Ha‘u ā, ka tau laka ‘i he maama ‘a Sihova.
6He kuo ke li‘aki ho kakai ‘a e fale ‘o Sēkope, koe‘uhi kuo nau fonu ‘i he ngaahi me‘a ‘a Hahake, pea ‘oku nau fai sausau hangē ko e kau Filisitia,#2.6 ‘Oku ngali tonu hono hiki ko iá, ka ‘oku ‘ikai ke mahino ‘a e faka-Hepeluú. pea ‘oku nau fepukenima‘aki mo e hako ‘o e muli. 7Pea ko honau fonua ‘oku fonu siliva mo e koula, pea ‘oku ‘ikai hano ngata‘anga ‘o ‘enau koloa: pea ‘oku fonu honau fonua ‘i he fanga hoosi, pea ‘oku ‘ikai hano ngata‘anga ‘o ‘enau sāliote. 8‘Oku fonu honau fonua foki ‘i he ngaahi ‘aitoli; ‘oku nau hū ki he ngāue ‘a honau nima, ‘a e me‘a kuo ngaohi ‘e he tuhu ‘onautolu.
9Pea ‘oku mapelu ki lalo ‘a e tangata noa, pea ‘oku fakamo‘ulaloa ‘a e tu‘unga ‘Eiki.
10Pea ‘e ‘ikai te ke fakamolemole ‘a kinautolu. Hū ki he makatu‘u, ‘o tanu koe ‘i he efu, ‘i he kite mai ‘a e fakailifia ‘a Sihova, mo e lāngilangi ‘o ‘ene fotu.#Fkhā 6.15; 2 Tes 1.9 11‘E fakamo‘ulaloa ‘a e mata hihiki ‘o e tangata noa, pea ‘e peluki hifo ‘a e mofuta ‘o hou‘eiki, pea ko Sihova toko taha pē ‘e fotu ‘i he ‘aho ko ia. 12He ‘oku ai ha ‘aho tautea ‘a Sihova Sāpaoti ki he me‘a kotoa pē ‘oku fotu mo mā‘olunga, pea ki he me‘a kotoa pē ‘oku hiki hake; pea ‘e fakamo‘ulaloa‘i; 13‘io, ki he ngaahi sita ‘o Lepanoni, ‘a e fa‘ahinga mā‘olunga mo tomo hake: 14pea ki he ngaahi ‘oke kotoa ‘o Pēsani; pea ki he ngaahi mo‘unga kotoa pē ‘oku mā‘olunga, pea ki he fo‘i tafungofunga kotoa ‘oku hopo hake; 15pea ki he taua kotoa ‘oku mā‘olunga, pea ki he ‘ā kotoa ‘oku ngaohi ki he tau; 16pea ki he ngaahi vaka Tāsisi, pea ki he nāunau faka‘ofo‘ofa kotoa pē. 17Pea ko e hihiki ‘a e tangata noa ‘e peluki ki lalo, pea ko e mofuta ‘a hou‘eiki ‘e fakamo‘ulaloa‘i: pea ko Sihova toko taha ‘e fotu ‘i he ‘aho ko ia.
18Pea ‘e mole ‘aupito ‘a e ngaahi ‘aitoli.
19Pea ‘e hū ‘a e kakai ki he ngaahi ‘ana‘i maka, mo e ngaahi luoki efu, ‘i he kite mai ‘a e fakailifia ‘a Sihova, mo e lāngilangi ‘o ‘ene fotu, ‘oka ‘iloange ‘oku ne tu‘u hake ke lulu‘i ‘a māmani. 20‘I he ‘aho ko ia ‘e lī ‘e he tangata ki he fanga mole mo e fanga peka ‘a ‘ene ngaahi ‘aitoli siliva, mo ‘aitoli koula, ‘a ia kuo nau ngaohi ke hū ki ai: 21koe‘uhi ke nau hū ki he ngaahi ava‘i maka, mo e ngaahi ‘ana ‘i he ngaahi mato, ‘i he kite mai ‘a e fakailifia ‘a Sihova, mo e lāngilangi ‘o ‘ene fotu, ‘oka ‘iloange ‘oku ne tu‘u ke lulu ‘a māmani.
22Pe‘i tuku ai pē ‘a e tangata, ‘a ia ‘oku ‘i hono ava‘i ihu ‘ene mānava mo‘ui: he ko e hā fua hono mahu‘inga?
Currently Selected:
KO ‘AISEA 2: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
