KO ‘AISEA 3
3
Ko e Moveuveu ‘i Selusalema
1HE vakai, ko e ‘Eiki, ‘a Sihova Sāpaoti, ‘oku ne ‘ave mei Selusalema pea mei Siuta, ‘a e tokonaki mo e tokoni, hono kotoa ‘o e tokonaki me‘akai mo hono kotoa ‘o e tokonaki vai; 2‘a e mafi mo e tangata tau, ‘a e fakamaau mo e palōfita; 3‘a e tongafisi mo e motu‘a; ‘a e kapiteni toko‘i nimangofulu, mo e tangata ‘ilonga, mo e kau fale‘i, mo e tufunga poto, mo e ala ‘i he tuki fakatēvolo. 4Pea te u tuku ‘ani talavou mo‘onau hou‘eiki, pea ‘e fai‘aki honau pule ‘a e me‘a ‘a tamaiki. 5Pea ‘e fefakamālohi‘aki ‘a e kakai–‘a Me‘a mo Me‘a, mo Me‘a mo Me‘a–‘e ‘oho fua ‘a e talavou ki he motu‘a, mo e tu‘a ki he matāpule.
6Ka puke ha siana ki ha taha ‘o hono kāinga, ‘i he fale ‘o ‘ene ‘Eiki, ‘o ne pehē, Ko e ma‘u pulupulu koe, te ke hoko ko hotau pule, ‘o fa‘iteliha ki he koto maumau ni.
7Te ne ‘ioho mai leva, ‘o pehē, ‘E ‘ikai te u hoko ko e pule; he ‘oku ‘ikai ha me‘akai ‘i hoku fale, pea ‘oku ‘ikai ha kofu: ‘e ‘ikai te mou fokotu‘u au ke pule ki he kakai.
8He kuo lusa ‘a Selusalema, pea ko Siuta kuo tō: he ko ‘enau lea mo ‘enau ngāue ‘oku tau‘i ‘a Sihova, ‘o fakafepaki mo e ongo fo‘i fofonga ‘o hono Sikaina. 9‘Oku faka‘ilo kinautolu ‘e he anga ‘o honau mata; pea ‘oku nau fakae‘a ‘enau angahala hangē ko Sōtoma, ‘o ‘ikai te nau fufū, ‘Oiauē honau laumālie! he ‘oku nau maumau kinautolu ‘e kinautolu.
10Ko e me‘a ki he kau faitotonu, ko ho‘omou lau eni, Te nau monū‘ia,#3.10 ko… monū‘ia; Ko hono faka-Hepeluú ia, ka ‘oku ngali tonu hono hiki ‘o: Te nau monū‘ia. he ko e fua ‘o ‘enau ngāue te nau kai. 11‘Oiauē ‘a e angahala! te ne mala‘ia: he ‘ange kiate ia ‘a e me‘a kuo fai ‘e hono nima.
12Si‘oku kakai, ko honau kau fakamamahi ko e tamaiki pē, pea ‘oku pule‘i kinautolu ‘eni kau fefine.
Si‘oku kakai, ko ho‘o kau takimu‘a ko e kau takihē, pea ‘oku nau folofua ‘a e hala na‘e totonu ke ke fou ai.
Ko e Fakamāu‘i ‘e he ‘Otuá Hono Kakaí
13Kuo hanga ‘a Sihova ‘o tu‘u he fai ‘a e talatalaaki; ‘io, ‘oku ne tu‘u ke fakamaau ‘a e ngaahi kakai.#3.13 ‘a e ngaahi kakaí; Ko hono hiki faka-Hepeluú ia, ka ‘oku pehē ‘i he ngaahi hiki ‘e ni‘ihi: ‘a hono kakaí. 14‘E hopo ‘a Sihova mo e mātu‘a ‘o hono kakai, pea mo honau hou‘eiki, Tā ko kimoutolu kuo fakaeve ‘a e ngoue vaine; ko e vete ‘o si‘i ngaohikovia ‘oku ‘i homou fale. 15Ko ho‘omou fai ke hā, ho‘omou tuki hoku kakai, mo vau ‘a e mata ‘o si‘i masiva? Ko e folofola ia mei he Ta‘ehāmai ‘a ‘Ātonai Sihova Sāpaoti.
Ko e Fakatokanga ki he Kakai Fefine ‘o Selusalemá
16Pea kuo folofola mai ‘a Sihova, ‘o pehē, Ko e me‘a ‘i he fakapupula ‘a e kau ta‘ahine Saione, ‘o nau laka faka-kia-maneke, ‘o lalama honau mata; ‘oku hikohikopuku ‘enau laka, ‘o ‘ai ke tatangi honau vesa: 17ko ia ‘e faka‘ulupala‘i ‘e ‘Ātonai ‘a e kau ta‘ahine Saione, pea ‘e fakatelefua‘i ‘e Sihova ‘a e potu ‘oku vala‘i.
18‘I he taimi ko ia ‘e ‘ave ‘e ‘Ātonai honau teunga‘ia–‘a e ngaahi vesa koloa, mo e fanga ki‘i la‘ā, mo e fanga ki‘i māhina; 19‘a e ngaahi hau mo e ngaahi lelu, mo e ngaahi veili; 20‘a e ngaahi pale, mo e seini fakanavau, mo e ngaahi no‘o kafa fakatafu‘ufu‘u, mo e ngaahi hina kaloni, 21mo e ngaahi siueli fakalanu; ‘a e ngaahi mama sila, mo e ngaahi mama ihu; 22mo e ngaahi kofu kātoanga, mo e ngaahi siāketi, mo e ngaahi pulupulu, mo e ngaahi ‘ainga-pa‘anga; 23mo e ngaahi sio‘ata, mo e ngaahi sote, mo e ngaahi fa‘u, mo e ngaahi pūlou masilini.
24Pea ‘e fetongi ‘aki ‘enau namu lelei ‘a e namu tuotua, pea ‘e fetongi ‘aki ‘a e kiekie ha potu‘i kafa, pea ‘e fetongi ‘aki ‘a e fakamingimingi ‘a e tula, pea ‘e fetongi ‘aki ‘a e vala tō‘onga ‘a e tauanga‘a–kuo tūpoko ‘a e la‘e ē ‘i he potu na‘e matamatalelei.
25‘E tō ho kau tangata ‘i he heletā, pea mo ho mālohinga ‘i he tau. 26Pea ‘e fakamamahi mo tangilāulau hono ngaahi matapā; ‘io, ko si‘i lala ia; ko e kelekele ‘oku ne nofo ai. 27Pea ‘i he taimi ko ia ‘e puke ha fefine ‘e toko fitu ki ha tangata ‘e toko taha, ‘o nau pehē, Te mau ma‘u ‘a e me‘akai ‘amautolu pē, pea ko homau kofu pē te mau ‘ai; kehe pē ke ui‘aki kimautolu ho hingoa; ‘ē, ‘ave homau mā‘anga.
Currently Selected:
KO ‘AISEA 3: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
