KO ‘AISEA 1
1
1KO E vīsone ‘a ‘Aisea foha ‘o ‘Āmosi, ‘a ia ‘oku kau ki Siuta mo Selusalema: na‘a ne sio ki ai ‘i he taimi ‘o ‘Ūsaia, Siotame, ‘Āhasi, mo Hesekaia, ko e ngaahi Tu‘i Siuta.#2 Tu‘i 15.1-7; 15.32–16.20; 18.1–20.21; 2 Kal 26.1–32.33
Ko Hono Valoki‘i ‘e he ‘Otuá ‘a Hono Kakaí
2Fanongo mai, ‘a langi, pea fokotu‘u telinga mai mo māmani, he kuo folofola mai ‘a Sihova ‘o pehē, Kuo u tauhi ‘a e fānau, mo hākeaki‘i kinautolu, pea kuo nau angatu‘u kiate au. 3‘Oku ‘ilo ‘e he pulu ‘a e taha ‘oku ne ma‘u ia, mo e ‘asi ‘a e ‘ai‘angakai ‘a e fa‘ahinga ‘oku pule kiate ia: ko ‘Isileli pē ‘oku ‘ikai ke ‘ilo, ko hoku kakai pē ‘oku ‘ikai ke fakakaukau.
4‘Oiauē, pule‘anga angahala, kakai moū ‘i he kovi, hako faikovi, fānau fakahalahala: kuo nau li‘aki ‘a e ‘Eiki, kuo nau fakasīkaka‘i ‘a e Tāpuhā ‘o ‘Isileli, kuo nau mahu‘i ‘o fulitu‘a! 5Koe‘uma‘ā homou toe taa‘i? ‘E fakautuutu ai pē ho‘omou afe. Ko e koto mahaki ‘a e ‘ulu, pea ko e koto ngangale ‘a e loto. 6Mei he ‘aofiva‘e ‘o a‘u ki he tumu‘aki ‘oku ‘ikai hano ‘ila ‘e toe; ko e lavea pē, mo e makafakafa, mo e kafo kuo kovi: koloto ke fakapela, pea koloto ke ha‘iha‘i, pea koloto ke fai hano fakamafola ‘aki ha lolo.
7Ko homou fonua ko e koto maumau; ko homou ngaahi kolo ko e koto vela pē; ko homou kelekele, ko e muli ē ‘oku ne keikeina ia ‘i homou ‘ao: ‘io, ko e koto maumau ia ‘o hangē ko e fulihi ‘o ha fonua muli. 8Pea ‘oku toe pē ‘a e ta‘ahine ko Saione hangē ha fakahekeheke ‘i ha ngoue vaine, hangē ha ki‘i palepale ‘i ha toutu‘u kukumipa, hangē ha kolo kuo ‘ākilotoa. 9Ka ne ta‘e‘oua ‘a e fakatoe mai ‘e Sihova Sāpaoti hatau ki‘i toenga–seuke, pehē kuo tau hangē ko Sōtoma, kuo tau tatau mo Komola.#Sēn 19.24; Lom 9.29
10Fanongo mai ki he folofola ‘a Sihova, hou‘eiki faka-Sōtoma; fokotu‘u telinga mai ki he lao ‘a hotau ‘Otua, ‘a e kakai faka-Komola. 11Koe‘uma‘aki ho‘omou fakalahi feilaulau mai–ko e folofola ‘a Sihova ia–kuo u pāhia ‘i he fanga sipi tangata ‘o e feilaulau-mōifua, mo e ngako ‘o e manu fafanga; pea ko e toto ‘o e fanga pulu, mo e lami, mo e kosi tangata,#‘Ēmosi 5.21-22 12‘oku ‘ikai te u manako ki ai. Ko ho‘omou omi ē ke hā ‘i hoku ‘ao–he na‘e tala ‘e hai ‘a e fatongia ko ē, ke malaki hoku ngaahi loto‘ā? 13‘Oua ‘e toe ‘omi nge‘esi me‘a‘ofa: ko e tutu ‘inisēnisi ko e me‘a fakalielia ia kiate au; ‘a e fakamāhina fo‘ou mo e faka-Sāpate, ‘a e fanongonongo kātoanga–‘oku ‘ikai te u makātaki ‘a e ō ‘a e kovi mo e fu‘u fakataha. 14Ko ho‘omou ngaahi fakamāhina fo‘ou, mo ho‘omou ngaahi kātoanga tu‘utu‘uni, ‘oku fehi‘a ki ai ‘a hoku laumālie; kuo nau hoko ko e kavenga kiate au: kuo u fiu hono fafa.
15Pea ka mou ka fola nima hake, te u hanga kehe meiate kimoutolu; ‘io, ka mou ka fakalahi lotu, ‘e ‘ikai te u fakaongo: ko homou nima na ‘oku toto‘ia. 16Fufulu kimoutolu, ‘ai ke mou ma‘a; ‘ave ‘a e kovi ‘o homou fai anga ke ‘oua na‘a vakai ‘e hoku mata; 17tuku ‘a e faikovi: ako ke fai lelei; mamahi‘i ‘a e fai fakamaau, ta‘ofi ki he totonu ‘a ia ‘oku fai fakamālohi, fakamaau ‘a e tamai mate, taukapo‘i ‘a si‘i fefine uitou.
18Ha‘u mu‘a ke ta sivi–ko e folofola ‘a Sihova ia: neongo ‘e hā kulokula ho‘omou hia, ‘e hoko ‘o hinehina hangē ko e sinou;#1.18 neongo… sinou; pe kuo hā kulokula ho‘omou hiá; pea ‘oku mou ‘amanaki koā te u fufulu kimoutolu ke mou hinehina ‘o hangē ha sinoú? neongo ‘e hā kula maama te nau tatau mo e vavae ‘au‘au.#1.18 neongo… ‘au‘au; pe Kuo hā kulokula [ho‘omou hiá], pea ‘oku mou ‘amanaki koā te mou hinehina ‘o hangē ha vavae ‘au‘aú? 19Kapau te mou lotolelei mo talangofua, te mou kai ‘a e lelei ‘o e fonua; 20ka ‘o kapau te mou fakapāpākū mo angatu‘u, ‘e keina kimoutolu ‘e he heletā: he kuo folofola pehē ‘a e fofonga ‘o Sihova.
Kolo Kolo Fai Angahala
21‘Oiauē, ‘a e hoko ‘a e kolo alafianga ko e pa‘umutu! ‘a e kolo na‘e fonu ‘i he fai fakakonisitūtone–ne me‘a mo toka ai ‘a Totonu ‘e ia–ka ko eni ko e koto fakapō. 22Ko ho‘o siliva kuo tolosia, ko ho‘o kava kuo talovai. 23Ko ho hou‘eiki kuo hoko ko e angatu‘u, mo e tākanga ‘o e kau kaiha‘a; ‘oku nau manako me‘a‘ofa kotoa pē, ‘o muia ki he fakakoloa: ko e me‘a ‘a e tamai mate ‘oku ‘ikai te nau fakatonutonu, pea ko e faka‘ilo ‘a e fefine uitou ‘oku ‘ikai ke a‘u kiate kinautolu.
24Ko ia, ‘oku folofola ai ‘a e ‘Eiki mei he Ta‘ehāmai, ‘a Sihova Sāpaoti, ‘a e Mafi ‘o ‘Isileli, ‘Ā! te u fai ke u hōhō‘ia ‘i he kakai ‘oku tā mai; pea te u sauni au ki hoku ngaahi fili: 25pea te u toe ala kiate koe, pea te u fakatalatala ‘aupito ho‘o tolosia, pea te u lave kotoa ho efe. 26Pea te u fakafoki ho kau fakamaau hangē ko e taimi mu‘a, pea mo ho kau fale‘i hangē ko ia ‘i he kamata‘anga: hili ia pea ‘e ui koe ko e Nofo‘anga ‘o Totonu, ko e Kolo Alafianga.
27‘E fou ‘i he fakamaau ‘a e huhu‘i ‘o Saione, pea ‘i he faitotonu ‘a e huhu‘i ‘o ‘ene kau foki. 28Pea ‘e ai ha laiki ‘o e kau talangata‘a mo e kau angahala fakataha, pea ko e kau li‘aki Sihova ‘e ‘auha.
29He te nau maa‘i ‘a e ngaahi ‘oke na‘a mou pātapata ai, pea te mou laea ‘i he ngaahi hauhau na‘a mou fili ki ai.#1.29 ngaahi… ai; Na‘e tui ‘a e kakai ‘o ono‘ahó ko ‘ete fakatāpui ha hauhau, pe ngoue tapu, ki ha ‘otua na‘e pule tokua ki he fanafanau ‘a e tangatá mo e monumanú mo e tupu ‘a e ‘akaú, pea kuo pau ke ne tāpuaki‘i ‘ete ngoué. 30He te mou hoko ‘o hangē ha ‘oke kuo momoho hono lau ke tō, pea hangē ha ngouetapu kuo ‘osi hono vai. 31Pea ‘e hoko ‘a e nima mālohi ko e te‘ekafa, Pea ko e me‘a kuo ne fokotu‘u ko e kalofiama; pea te na fakatou vela fakataha, pea ‘oku ‘ikai ha taha ‘e tāmate‘i.
Currently Selected:
KO ‘AISEA 1: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
