KO ‘AISEA 16
16
Ko e Tu‘unga Faka‘ofa ‘o Moape
1MOU ‘ave ‘a e tukuhau lami mei Sela ‘i he hala toafa ki he mo‘unga ‘o e ta‘ahine ko Saione. 2Pea ‘e faifai pea hangē ‘a e puna holo ‘a e fanga manupuna kuo vetekina ‘a e pununga, ‘e pehē ‘a e kau fefine Moape ‘i ha ngaahi a‘a‘anga ‘o ‘Alanoni.
3Fale‘i kimautolu, fai ‘a e fakalalo,
‘Ai ho malu ke hangē ko e pō ‘i he ho‘atā mālie:
Fufū si‘i kau fakahee‘i,
‘Oua ‘e lavaki‘i ‘a e hē fano.
4Ke ‘āunofo mo koe si‘i kau fakaheke‘i ‘o Moape;
Ke ke hoko ko e unga‘anga ki ai telia ‘a e tangata vete.
He ko e kau fakaehaua kuo ‘ikai,
Ko e fakalala fonua kuo ‘osi,
Kuo fakaeve mei ha fonua ‘a e kau malaki.
5Pea ‘oku ai ha taloni ‘oku tu‘u ‘i he fai ‘ofa,
Pea ‘e ‘afio ai ha taha ‘oku tu‘u ‘i he mo‘oni;
‘Io, ‘i he tēniti ‘o Tēvita ha taha ‘oku fai fakamaau,
Pea ‘oku mamahi‘i ‘a e fakakonisitūtone,
Pea ‘oku ne maheni mo e totonu.
6Kuo mau fanongo ki ha mahiki ‘a Moape,
‘O fu‘u fakatuputupulangi;
‘Ene pupula, mo ‘ene mahiki, mo ‘ene fa‘a ‘ita;
‘A ‘ene lea‘aki ‘a e ngaahi me‘a ‘oku ‘ikai ko ia.
7Ko ia, ‘e tangi ‘oiauē ‘a Moape koe‘uhi ko Moape,
‘Io, ‘e tangi ‘oiauē ‘a e me‘a kotoa;
Te mou hanu koe‘uhi ko e takaonga kālepi ‘o Kili-Haleseti,
Kuo ka‘anga ‘aupito.
8He ko e ngaahi ngoue fo‘i ‘akau ‘a Hesiponi kuo tamatemate;
Ko e vaine ‘o Sīpima–ko hono ‘elito na‘a mo e hou‘eiki ‘o e ngaahi pule‘anga na‘e tulaki ai–
Na‘e a‘u ki Siasea, na‘e tu‘utu‘uholo ‘i he toafa;
‘Oku mafola atu hono pikilau, ‘oku laka ki he kauvai ‘o e tahi.
9Ko ia, ‘oku ou fai ‘a e tangi ‘a Siasea koe‘uhi ko e vaine ‘o Sīpima;
‘Oku ou fakaviviku koe ‘aki hoku lo‘imata,
Si‘i Hesiponi mo ‘Eleale:
He tō kovi ‘a e tau‘a‘alo
He toli ‘o e to‘u kai fua‘i ‘akau mo e to‘ukai kālepi.
10Pea kuo ‘ave ‘a e fiefia mo e tome‘e mei he tokanga ngoue,
Pea ‘i he ngaahi ngoue vaine ‘oku ‘ikai ha mavava, ‘oku ‘ikai ha kaila;
‘Oku ‘ikai fai ha malaki ‘i he ngaahi tata‘onga;
Ko e tau‘a‘alo kuo u fakalongo ‘e au.#16.10 kuo u fakalongo ‘e au; Ko hono faka-Hepeluú ia, ka ‘oku pehē ‘i he hiki fuoloa ‘e taha: kuo longo.
11Ko ia ‘eku tokomohū hoku fatu
Hangē ha ha‘ape koe‘uhi ko Moape,
Pea ko hoku loto‘i sino koe‘uhi ko Kili-Hēlesi.
12Pea ka faifai pea hā kuo fiu ‘a Moape he fai ‘i he sia, pea kuo ne hū ki hono faletapu ke hufekina, ‘e ‘ikai te ne lava.
13Ko e folofola ia na‘e fai ‘e Sihova, ‘o kau ki Moape ‘i he taimi mu‘a. 14Ka ko eni kuo folofola ‘a Sihova, ‘o pehē, ‘I he ‘osi ‘a e ta‘u ‘e tolu, ko e ta‘u ‘o e unga ngāue, pea ‘e fakapaikuiku ‘a e lāngilangi ‘o Moape, pehē mo ‘ene fu‘ufu‘unga kakai; pea neongo ‘oku ai ha toenga, ka ko e momo‘i me‘a–hono ‘uke!
Currently Selected:
KO ‘AISEA 16: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
