KO ‘AISEA 14

Ko e Foki Mai ‘a e Kakai na‘e Fakahē‘í

1HE ko Sihova te ne ‘alo‘ofa kia Sēkope, pea te ne kei fili ‘a ‘Isileli, pea te ne fakata‘utu kinautolu ‘i honau kelekele: pea ‘e feuluulufi ‘a e muli mo kinautolu, pea te nau piki ki he fale ‘o Sēkope. 2‘Io, ‘e puke ‘a e ngaahi kakai kiate kinautolu, ‘o moimoi‘i kinautolu ki honau feitu‘u: pea ‘e ma‘u mai kinautolu ‘e he fale ‘o ‘Isileli ma‘anau kau tamaio‘eiki mo kau kaunanga ‘i he‘enau a‘u ki he kelekele ‘o Sihova: pea te nau taki pōpula ‘a kinautolu na‘e taki pōpula kinautolu; pea te nau fakaehaua ‘a kinautolu na‘e fakamo‘ulaloa kinautolu.

Ko e ‘Alu Hifo ‘a e Tu‘i Pāpilonia ki he Fonua ‘o e Kakai Maté

3Pea ka faifai ‘o fakamālōlō koe ‘e Sihova mei ho‘o mamahi, pea mei ho‘o hoha‘a, pea mei he fatongia fefeka na‘a nau fakangāue‘i ai koe; 4‘io, ‘i he taimi ko ia te ke hiva‘aki ‘a e ta‘anga ni ki he Tu‘i Pāpilone, pea ke pehē:

Uoke, kuo tuku ‘ene ngāue ‘a e tama fai fakamālohi!

Kuo tuku ‘ene ngāue ‘a e potu fakahoha‘a!#14.4 ‘a e potu fakahoha‘á; ‘Oku toe hiki: ‘a e kolo koulá.

5Kuo fesi‘i ‘e Sihova ‘a e mātā ‘a e kau angahala,

‘A e sēpita ‘a e kau pule;

6‘A ia na‘e taa‘i ‘a e ngaahi kakai ‘i he ‘ita

‘Aki ‘a e tā ta‘etuku,

Na‘e fakaehaua ha ngaahi pule‘anga he‘enau tuputāmaki

‘Aki ha tuli na‘e ‘ikai hano ta‘ofi.

7‘Oku mālōlō ‘a māmani kātoa, ‘oku nonga,

‘Oku nau pā mavava.

8Na‘a mo e ngaahi paini ‘oku nau fiefia

‘I he me‘a kuo hoko kiate koe.

‘Oku lau ‘e he ngaahi sita ‘o Lepanoni,

“Talu ho‘o tokoto ‘a‘au

Mo e ‘ikai ‘alu hake ha ta‘anga kiate kimautolu.”

9Ko Hētesi ‘i lalo ‘oku ngaungaue ‘ia koe,

Ke tali ho‘o ‘alu ki ai:

‘Oku ne ue‘i hake kiate koe ‘ani ‘ata,

Ko e kau tāimu‘a ‘o māmani#14.9 kau… māmani; pe ko e kosi tangata.

‘Oku ne langa‘i ke tu‘u mei honau ngaahi taloni

‘a e kau tu‘i ‘o e ngaahi pule‘anga.

10‘Oku nau tali ho‘o ‘alu,

‘O nau pehē mai kotoa,

“Ko koe foki koā kuo ke vaivai hangē ko kimautolu?

Kuo fakatatau koe koā kiate kimautolu?”

11Kuo ‘ohifo ki Hētesi ‘a e me‘a na‘a ke toma ai,

‘A e ongoonga‘a mai ho‘o ngaahi helefilo;

Ko e me‘a ‘oku fofola ‘i lalo ‘iate koe ko e ‘uanga,

Pea ko ho ngaahi kafu ko e kelemutu.

12Uoke! ho‘o tō hifo mei langi,

‘E Lusefā tama ‘a Hengihengi!

‘a e tulaki koe ki he kelekele,

‘A koe na‘e ha‘aki ‘a e ngaahi pule‘anga!#Fkhā 8.10; 9.1

13Ka ko koe na‘a ke pehē ‘i ho loto,

“Ko e langi te u ‘alu hake ki ai,

Te u fokotu‘u hoku taloni

Ke mā‘olunga ‘i he ngaahi fetu‘u ‘a ‘Ela;

‘Io, te u nofo ‘i he mo‘unga ‘alofi‘anga,

‘I he tuliki ‘o e noate:#Māt 11.23; Luk 10.15

14Te u ‘alu hake ke mā‘olunga ‘i he ngaahi tumutumu‘i ‘ao,

Te u tu‘u pau mo ‘Elioni.”

15‘Osi, ‘e ‘ohifo koe ki Hētesi,

Ki he tuliki ‘o e Luo.

16Ko kinautolu ‘oku mamata kiate koe

Te nau fakasiosio atu,

Te nau fakalaulauloto ‘iate koe;

“Ko eni koā ‘a e tangata na‘e ngaohi ‘a māmani ke tete,

Mo e ngaahi pule‘anga ke ngalulu;

17Na‘e ngaohi ‘a e maama nofo‘anga ko e lala,

Pea laiki hono ngaahi kolo;

‘O ‘ikai veteange hono kau pōpula ke ‘alu ki ‘api?”

18Ko e ngaahi tu‘i ‘o e ngaahi pule‘anga

‘Oku nau tōfā kotoa pē ‘i he lāngilangi‘ia,

Takitaha ‘i hono langi ‘o‘ona.

19Ka ko koe kuo li‘aki mama‘o mo ho fonualoto,

Hangē ha huli kuo li‘aki mo e fakalielia;

Kuo ‘ufi‘ufi ‘aki ‘a e ngaahi ‘anga‘anga,

‘A e kakai kuo hoka‘i ‘aki ‘a e heletā;

‘A kinautolu ‘oku ‘ohifo ki he ngaahi maka ‘o e luo:

Kae hangē ha ‘anga‘anga malakia.

20‘E ‘ikai te ke fakataha mo kinautolu ‘i he tanu, koe‘uhi kuo ke maumau‘i ho fonua, kuo ke fakapoongi ho kakai. Ko e hako ‘o e faikovi ‘e ‘ikai ha lau ki ai ‘o ta‘engata. 21Mou teuteu ha tāmate‘anga ki he‘ene fānau, koe‘uhi ko e kovi ‘o ‘enau ngaahi kui; ke ‘oua ā te nau tu‘u, ‘o ma‘u ‘a e fonua, ‘o fakafonu kolo ‘a e funga ‘o e maama nofo‘anga.

‘E Faka‘auha ‘e he ‘Otuá ‘a Pāpilone

22‘Io, te u tu‘u ke fai mo kinautolu–ko e folofola ia ‘a Sihova Sāpaoti mei he Ta‘ehāmai–pea te u tu‘usi mei Pāpilone ‘a e hingoa mo e toenga, ‘a e huli mo e hako–ko Sihova ia mei he Ta‘ehāmai. 23Pea te u tuku ia ko e tofi‘a ‘o e lupe ‘o e lala, mo e kaho ‘o e vai; pea te u tafi ia ‘aki ‘a e me‘a tafi ‘a Faka‘auha–ko Sihova Sāpaoti ia mei he Ta‘ehāmai.

24Na‘e fuakava ‘a Sihova Sāpaoti, ‘o pehē, Ko au ē, hangē ko ‘eku fakakaukau, ‘e pehē ‘ene hoko; pea hangē ko ‘eku tu‘utu‘uni, ‘e pehē ‘ene tu‘u:#‘Ais 10.5-34; Nēhu 1.1–3.19; Sef 2.13-15 25ke laiki ‘a ‘Āsilia ‘i hoku fonua; ‘io, te u malaki ia ‘i hoku mo‘unga: toki hu‘i ‘ene ‘ioke meiate kinautolu, pea ‘ave ‘ene kavenga mei hono uma. 26Ko eni ‘a e tu‘utu‘uni kuo fakapapau ki māmani kātoa; pea ko e nima eni kuo tuku atu ki he pule‘anga fua pē. Seuke, 27kuo ‘a Sihova Sāpaoti ‘a e tu‘utu‘uni, pea fakaikunoa ‘e hai? pea ko ho‘ona nima kuo mafao, pea fakafoki ‘e hai?

28‘I he ta‘u na‘e pekia ai ‘a e tu‘i ko ‘Āhasi na‘e hoko mai ‘a e tala ko eni mei he Ta‘ehāmai.#2 Tu‘i 16.20; 2 Kal 28.27

29‘E Filisitia, ‘oua ‘e ha‘aki fiefia,

Koe‘uhi ko e motu ‘a e sēpita na‘e taa‘i ‘aki koe:

‘E huli hake mei he ngata ha kēlasa,

Pea ko hono fua ko e ngata vela ‘oku puna.#Sel 47.1-7; ‘Isi 25.15-17; Sioelí 3.4-8; ‘Ēmosi 1.6-8; Sef 2.4-7; Sāk 9.5-7

30Ka ‘e kaikai mālie ‘a e masiva ‘o e masiva,

Pea ko e kau fusimo‘omo te nau tokoto nonga:

Pea te u tāmate‘i ho aka ‘aki ‘a e honge,

Pea ko ho toenga te ne fakapoongi.

31Tangi ‘oiauē, si‘i matanikolo! kaila, si‘i kolo!

‘E Filisitia, te ke mamoli ‘o ‘osi;

He ‘oku ha‘u ha kohu mei he noate,

Pea ‘oku ‘ikai ha tō ‘i he ngaahi kongakau.

32Pea ko e hā ‘a e tali ‘a e ngaahi talafekau ‘a ha pule‘anga? ‘A ‘eni; Ko Sihova kuo tanupou ‘a Saione, pea ‘oku hūfanga ki ai ‘a e kau fāiekina ‘o hono kakai.

Currently Selected:

KO ‘AISEA 14: TMB

Highlight

Compare

Copy