KO ‘AISEA 13
13
‘E Tautea ‘e he ‘Otuá ‘a Pāpilone
1KO E kavenga ‘a Pāpilone mei he Ta‘ehāmai, ‘a ia na‘e mamata ki ai ‘a ‘Aisea foha ‘o ‘Āmosi.#‘Ais 47.1-15; Sel 50.1–51.64
2Fokotu‘u ha fuka ‘i ha mo‘unga tekelei, tukuna atu homou le‘o, ta‘alo kiate kinautolu ke nau hū ki he ngaahi matapā ‘o ‘eiki. 3Ko au kuo u fai tu‘utu‘uni ki hoku kau polo‘i, kuo u ui foki ‘eku kau helo ki he fai ‘eku houhau, si‘eku kau fakataka tau na.
4Sī! ko e ha‘ulu ‘i he ‘otu mo‘unga,
Ko e tuha ‘o ha fu‘u kakai!
Sī! ‘oku ongoonga‘a mai ‘a e ngaahi pule‘anga ‘o e ngaahi kakai
Kuo fakatefua mai!
Ko Sihova Sāpaoti
‘Oku ne fakatē ‘a e hōsitē ki he tau.
5‘Oku nau omi mei he fonua mama‘o,
Mei he tafatafa‘aki langi;
‘A Sihova mo e ouau ‘o ‘ene tuputāmaki,
Ke faka‘auha ‘a e fonua kātoa.
6Tangi ‘oiauē, he ‘oku ofi ‘a e ‘aho ‘o Sihova:
‘E hoko mai ‘o taau mo ha faka‘auha meia Faka‘auha,#Sioelí 1.15
7Ko ia ai, ‘oku tatau pē ‘a e nima kotoa, pea vai ‘a e loto fua pē ‘o e kakai: 8pea ‘oku nau mo‘utāfu‘ua, pea ‘oku nau puke he mamate mo e ‘i‘ī; ‘oku nau makau holo hangē ha fefine fā‘ele; ‘oku nau feofo‘aki: ko honau mata ko e mata ‘oku huhulu. 9Vakai, ‘oku ha‘u ‘a e ‘aho ‘o Sihova,
Ko e ‘aho fakamamahi mo e houhau mo e ‘ita kakaha;
Ke liliu ‘a e fonua ko e potu lusa,
Pea ke fakaeve mei ai hono kau angahala.
10Seuke, ko e ngaahi fetu‘u ‘o e langi, mo hono ngaahi ‘Olioni,#13.10 ‘Olioni; pe pupunga. ‘e ‘ikai te nau tuku ke hā mai ‘enau maama: ‘oku fakapo‘uli ‘a e la‘ā ‘i he‘ene ‘alu hake, pea ko e māhina ‘e ‘ikai te ne tuku atu ‘ene huhulu.#‘Isi 32.7; Māt 24.29; Ma‘ake 13.24-25; Luk 21.25; Fkhā 6.12-13
11Pea te u ‘eke ki he maama nofo‘anga hono kovi, pea ki he kau angahala ‘enau fai kovi; pea te u ‘ai ke tuku ‘a e mofuta ‘a e kau fielahi, pea te u fakamo‘ulaloa ‘a e mahiki ‘a e kau tulano. 12Pea te u ‘ai ke ma‘ungata‘a ange ha ngaluvai ‘i ha siueli, mo ha tangata ‘i he tu‘utanga koula mei ‘Ōfela. 13Ko ia, te u lulu‘i ‘a e ngaahi langi, pea ‘e ngatetetete ‘a māmani, ‘o mole mei hono potu; ‘i he mahua mai ‘a Sihova Sāpaoti, pea ‘i he hoko ‘a e kakaha ‘o ‘ene houhau.
14Pea ko e me‘a ‘e hoko, ‘e hangē ko ha fanga kaseli ‘oku faka‘ohovale‘i, pea hangē ha fanga sipi ‘oku ‘ikai hano kau tānaki, ‘e hanga takitaha ki hono fa‘ahinga, pea hola takitaha ki he fonua ‘o‘ona. 15‘Ilonga ‘a kinautolu ‘e ‘ilo ‘i ha potu, ‘e veloi; pea ‘ilonga kinautolu ‘e ma‘u ‘i he tuli, te nau tō ‘i he heletā. 16Pea ‘e have‘i ‘enau fanga valevale lolotonga ‘oku nau sio ki ai; ‘e vete honau ngaahi fale, pea ‘e tohotoho‘i honau ngaahi uaifi.
17Ko au eni ‘oku ou ue‘i ‘a e kau Mītia#13.17 Mītia; Ko e kakai eni ‘o ha pule‘anga na‘e tu‘u mei he fakatokelau-hahake ‘o Pāpiloniá, pea na‘e hoko ko e konga ‘o e pule‘anga Pēsiá. ke tautea kinautolu, ko e fa‘ahinga ‘e ‘ikai te nau toka‘i ‘a e siliva, pea ko e me‘a ki he koula ‘e ‘ikai te nau manako ki ai. 18Pea ko e ngaahi kaufana te nau laiki ‘a e kau talavou; pea ‘e ‘ikai ha‘anau ‘ofa ki he fua ‘o e manava; ‘e ‘ikai te nau mata mamae ki he fānau.
19Pea ko Papilone
Ko e teunga ‘o e ngaahi pule‘anga,
Ko e mata ‘o e pole‘anga ‘a e kau Kalitia,
Te ne hoko ‘o tatau mo e mafuli ‘o Sōtoma mo Komola na‘e fai ‘e he ‘Otua.#Sēn 19.24
20‘E ‘ikai hano kakai ‘o lauikuonga,
Pea ‘e ‘ikai nofo‘anga ‘i ha to‘utangata mo ha to‘utangata:
Pea ‘e ‘ikai fokotu‘u tēniti ai ‘e he ‘Ālepea;
Pea ko e kau tauhi sipi ‘oku ‘ikai te nau fakatokoto ai ‘enau fanga manu.
21Ka ‘e tākoto ai ‘a e manu ‘o e lala;
Pea ‘e fonu honau ngaahi fale ‘i he manu tatangi;
Pea ‘e nofo ai ‘a e fanga ‘ositalesi,
Pea ‘e fehopokaki ai ‘a e fanga sātulō.#‘Ais 34.14; Sef 2.14; Fkhā 18.2
22Pea ‘e fetāliaki ‘a e fanga siakali ‘i honau ngaahi taua,
Mo e fanga ulofi ‘i honau ngaahi palasi;
Pea ko hono taimi ‘oku ofi ke ha‘u,
Pea ko hono ngaahi ‘aho ‘e ‘ikai toloi.
Currently Selected:
KO ‘AISEA 13: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
