Hepelū 7
7
Ko e Taula‘eiki ko Melekisetekí
1HE ko e Melekiseteki ko ia, ‘a e Tu‘i Salema, ‘a e taula‘eiki ‘a e ‘Otua Taupotu, ‘a e toko taha na‘e fakafetaulaki kia ‘Epalahame ‘i he‘ene foki mai mei he taa‘i ‘o e ngaahi tu‘i, mo ne tāpuaki‘i ia;#Sēn 14.17-20 2‘a e toko taha foki na‘e tuku ma‘ana ‘e ‘Epalahame hono vahehongofulu ‘o e me‘a kotoa; ‘a ia ko e ‘uhinga ‘o hono ‘uluaki hingoa ko e Tu‘i ‘o e Mā‘oni‘oni, pea hoko mo hono hingoa ‘e taha ko e Tu‘i Salema, ‘a ia ko e Tu‘i ‘o e Melino; 3ta‘eha‘ane tamai, ta‘eha‘ane fa‘ē, ta‘ehano hohoko, ‘a ia ‘oku ‘ikai ha kamata‘anga ‘o hono ngaahi ‘aho, pe ha ngata‘anga ‘o ‘ene mo‘ui; kae‘uma‘ā ‘oku fakatatau ki he ‘Alo ‘o e ‘Otua–ko e Melekiseteki ko ia ‘oku ne nofo taula‘eiki ai pē.
4‘Ē, vakai ā; hono ‘ikai lahi ‘a e tangata ko ia! he na‘e ‘atu ki ai ‘e ‘Epalahame ‘a e vahehongofulu, ‘a e fungani ‘o e vete, ‘io, na‘e ‘atu ‘e ‘Epalahame ko e Pēteliake! 5Pea ko eni, ko kinautolu ‘o e hako ‘o Līvai ‘oku ma‘u ‘a e lakanga fakataula‘eiki, ‘oku ‘i ai ‘enau tu‘utu‘uni fakalao ke to‘o ‘a e vahehongofulu mei he kakai; ‘a ia ko e ma‘u mei honau kāinga, neongo ko e mātu‘aki tupu kinautolu mei he mānava ‘o ‘Epalahame.#Nōm 18.21 6Ka ko e toko taha ‘eni, ‘a ia ‘oku ‘ikai kākunga ke hoko ki he fa‘ahinga ko ia, ka kuo ne to‘o ‘a e ‘inasi hongofulu meia ‘Epalahame; ‘io, pea kuo ne tāpuaki‘i ‘a e toko taha na‘e ‘a‘ana ‘a e ngaahi tala‘ofa. 7Pea tala‘ehai ‘e fa‘a faka‘ikai ki ai, ‘oku tāpuaki‘i ‘a e si‘i ‘e he lahi. 8Kae‘uma‘ā foki, ‘i he me‘a ko eni, ‘oku ma‘u ‘a e ngaahi vahe hongofulu ‘e ha kakai ‘oku mate; ka ‘i he me‘a ko ena, ‘oku ma‘u ‘e ha toko taha ‘a ia ‘oku fakahā‘ia mai ‘oku ne mo‘ui. 9‘Io, tapu mo kimoutolu, ko Līvai foki, ‘a ia ‘oku ‘a‘ana ‘a e ngaahi vahe hongofulu, na‘e fakatukuhau‘i ia ‘ia ‘Epalahame; 10he na‘a ne kei ‘i he mānava ‘o ‘ene kui ‘i he fakafetaulaki kiate ia ‘e Melekiseteki.
11Pea ko eni, ka ne lava ‘a e fakahaohaoa ‘i he fai‘aki ‘a e taula‘eiki faka-Līvai, (he ko ia ia ‘a e me‘a na‘e tu‘unga ki ai ‘a e ma‘u Lao ‘e he kakai ‘Isileli pea koe‘uma‘ā ke fokotu‘u ha taula‘eiki ‘oku fa‘ahinga kehe ‘i he ‘alunga tokua ‘o Melekiseteki,#7.11: ‘i… Melekiseteki; (vakai ki he 5.6). ‘o ‘ikai ‘i he ‘alunga ‘o ‘Ēlone? 12He ko e pehē leva kuo liliu ‘a e taula‘eiki, tā kuo pau ‘oku ‘i ai ‘a e liliu ‘o e lao. 13Ka na‘e fai: he ko e toko taha ‘oku kau ki ai ‘a e lea ko ia, ‘oku ne kau ki ha matakali kehe, ko e matakali kuo te‘eki si‘i ke nofo hanau taha ki he ngāue ‘o e ‘ōlita. 14He ‘oku mātu‘aki mahino kuo tupu hotau ‘Eiki mei ha‘a Siuta, ‘a ia ko e matakali na‘e ‘ikai ha momo‘i lau taula‘eiki mei ai ‘e Mōsese.
Ko e Taula‘eiki ‘e Taha Hangē ko Melekisetekí
15Kae‘uma‘ā ē, ‘oku ‘āsili hā ‘a e me‘a ko ia, ‘o kapau leva ‘oku ‘i he tatau ‘o Melekiseteki ‘a e fokotu‘u ‘o ha taula‘eiki kehe, 16ha toko taha ‘oku ‘ikai te ne hoko pehē mei ha lao ‘oku fakaekakano hono tu‘utu‘uni, ka ‘oku ne hoko ki ai ‘i he ivi ‘o ha mo‘ui ‘oku ta‘emavete: 17he ‘oku fakahā mai ia ‘o pehē, Ko e taula‘eiki koe ‘o ta‘engata ‘i he ‘alunga ‘o Melekiseteki.#7.17: ‘i… Mele kiseteki; (vakai ki he 5.6). #Saame 110.4 18‘Āua, he ‘oku hoko ai ‘a e tāmate‘i ‘o e tu‘utu‘uni ‘oku mu‘omu‘a, koe‘uhi ko hono me‘a na‘e vaivai mo ta‘e‘aonga. 19(He tala‘ehai na‘e ai ha momo‘i me‘a ‘e fakahaohaoa ‘e he Lao) pea ‘oku hoko ai ‘a e fakahū mai, ‘o kanoni ‘aki, ha falala‘anga lelei hake, ‘a ia ‘oku tau fakaofiofi ai ki he ‘Otua.
20Pea ko e me‘a ‘i he ‘ikai hoko ia ta‘eha lea tuki; (he ko kinautolu na‘a nau hoko ‘o taula‘eiki ta‘eha lea tuki; 21ka ka ō mo e hoko ‘a‘ana ha lea tuki, fai ‘e ia na‘e folofola kiate ia ‘o pehē,#Saame 110.4 Kuo lea tuki ‘e he ‘Eiki, pea ‘e ‘ikai te ne liliu, Ko e taula‘eiki koe ‘o ta‘engata). 22Ko ia, ‘oku hoa mo ia ‘a e lelei lahi hake ‘o e fuakava, ‘a ia kuo hoko ‘a Sīsū ko hono Talifaki.
23Kae‘uma‘ā, ko kinautolu na‘e fokotu‘u tokolahi ke taula‘eiki, koe‘uhi ko e ta‘ofi ‘e he mate ‘enau fai ma‘u pē. 24Ka ko e toko taha ni, ko e me‘a ‘i he‘ene tolonga ‘o ta‘engata, ko ia ‘oku ‘ikai liua ‘ene lakanga taula‘eiki. 25Ko ia ai foki ‘oku ne mafai ke fakamo‘ui opeope ‘a kinautolu ‘oku ha‘u ki he ‘Otua ‘iate ia, ko ‘ene mo‘ui ma‘u ai pē ke hufekina kinautolu.
26He na‘e tuha foki mo kitautolu ha Taula‘eiki Lahi ‘oku pehē, ha taha ‘oku mā‘oni‘oni, mo ‘ata‘atā mei he kovi, mo ta‘emele; ha taha kuo mavahe mei he kakai angahala, pea kuo hoko ‘o motu atu ‘i he ngaahi langi. 27Ko e toko taha ‘oku ‘ikai pau ke ne fua ‘atu ma‘ana ‘i he ngaahi ‘aho kotoa pē ha ngaahi feilaulau koe‘uhi ko ha‘ane ngaahi angahala ‘a‘ana, ‘o hangē ko e kau Taula‘eiki Lahi ko ia, pea hili ia ke ne fai ma‘a e kakai; he na‘a ne fai ia ke tātu‘otaha pē, he‘ene ‘oatu ‘e ia ia.#Lev 9.7 28He ko e Lao, ‘oku ne fokotu‘u ke taula‘eiki ha kau tangata, ha ni‘ihi ma‘u vaivai‘anga; ka ko e folofola ‘o e lea tuki, ‘a ia na‘e hoko ki mui ‘i he Lao, ‘oku fokotu‘u ai ha ‘Alo, ‘a ia kuo ‘osi fakahaohaoa ‘o ta‘engata.
Currently Selected:
Hepelū 7: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
