Hepelū 8
8
Ko Sīsū ‘a Hotau Taula‘eiki Lahí
1PEA ko eni, ‘i he ngaahi me‘a ‘oku tau lau ki ai, ko eni pē ‘a e me‘a ‘oku tu‘ukimu‘a: ko e ‘i ai hotau Taula‘eiki Lahi ‘oku pehē fau, he kuo ne nofo hifo mei he to‘omata‘u ‘o e taloni ‘o ‘Ene ‘Afio ‘i he ngaahi langi.#Saame 110.1 2Ko e Faifekau ‘o e Potu Toputapu, mo e Tāpanekale mo‘onia; ‘a ia ne fokotu‘u ‘e he ‘Eiki, ‘o ‘ikai ‘e ha tangata.
3He ‘ilonga ha Taula‘eiki Lahi, kuo fokotu‘u ia ke ‘atu ‘a e ngaahi me‘a‘ofa, mo e ngaahi feilaulau: ko ia ai, kuo pau ke ai ha‘ane me‘a ke ‘atu ‘e he Taula‘eiki Lahi ko eni foki. 4Pea ko eni, ka ne ‘i māmani ia ‘e ‘ikai te ne kākunga ke taula‘eiki, koe‘uhi ‘oku ‘i ai ha ni‘ihi ke ‘atu me‘a‘ofa ‘i he tu‘utu‘uni ‘a e Lao. 5Ka ko e fa‘ahinga ‘oku nau ngāue ki he fakatātā mo e ‘ata ‘o e ngaahi me‘a fakalangi: ‘o hangē ko e na‘ina‘i ‘o Mōsese ‘i he‘ene ene ke fokotu‘u ‘a e Tāpanekale. He na‘e folofola kiate ia ‘o pehē, Tokanga ke ke ngaohi ‘a e ngaahi me‘a ‘o fakatatau ki he fakatātā‘anga na‘e faka‘ali‘ali kiate koe ‘i he mo‘unga.#‘Eki 25.40 6Ka ‘i heni ‘oku ne ma‘u ha lakanga ‘oku hulu atu, ke hoa mo e lelei hake ‘o e fuakava ‘oku ne nofo ko hono Fakalaloa: ‘a ia ko e fuakava kuo tu‘unga ki he ngaahi palōmesi lelei hake.
7He ka ne ta‘emele ‘a e ‘uluaki fuakava ko ia, tala‘ehai ‘e kumi ha potu ke tu‘unga ki ai hano ua. 8He vakai ‘oku ne tala‘i honau mele he‘ene pehē, Ko e folofola ‘eni ‘a e ‘Eiki,#Sel 31.31-34 (LXX) Ko eni ‘oku ‘unu mai ha taimi te u fakakakato ai ki ha‘a ‘Isileli mo ha‘a Siuta ha fuakava fo‘ou; 9‘a ia ‘oku ‘ikai hangē ko e fuakava na‘a ku fokotu‘u mu‘a ma‘a ‘enau ngaahi kui, ‘i he ‘aho ko ia na‘a ku pukenima‘i kinautolu ke taki atu mei ‘Isipite; he na‘e ‘ikai te nau nofo ‘i he‘eku fuakava ko ia, pea na‘a ku tuku ‘eku tokanga‘i kinautolu–ko e folofola ia ‘a e ‘Eiki. 10‘Io, ‘oku folofola ‘a e ‘Eiki, he ko eni ia ‘a e fuakava ‘a ia te u fokotu‘u ma‘a ha‘a ‘Isileli hili ‘a e taimi ko ia; Te u ‘ai ‘eku ngaahi lao ki honau ‘atamai, pea te u tohi tongi ia ki honau loto: pea te u nofo au ko honau ‘Otua, pea te nau nofo kinautolu ko hoku kakai. 11Pea tala‘ehai te nau takitaha ako hono kaungā kolo, pe ko hono tokoua, ‘o pehē, Ke ke kumi ke ‘ilo ‘a e ‘Eiki; koe‘uhi te nau lāu‘ilo kotoa pē kiate au mei he iiki ki he lalahi. 12He te u fakamolemole ‘enau ngaahi fai ta‘etotonu; pea ko ‘enau ngaahi angahala ‘e ‘ikai te u toe manatua. 13‘Uē! ko ‘ene pehē leva, Ha Fuakava FO‘OU, tā kuo ne fakaluku ai ‘a e ‘uluaki. Pea ko eni, ko e me‘a kuo kamata luku, pea ‘oku faka‘au‘au hifo, kuo ofi ‘ene mole.
Currently Selected:
Hepelū 8: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
