Hepelū 13
13
Ko e Fai Fatongia ‘oku Hōifua ki ai ‘a e ‘Otuá
1KE tu‘u ma‘u ho‘omou fe‘ofa‘aki fakalotu. 2‘Oua te mou loto ngalongalo he fakaafe ‘āunofo: he ‘i he fai ‘a e me‘a ko ia, kuo tali ‘e ha ni‘ihi ha kau ‘āngelo.#Sēn 18.1-8; 19.1-3 3Mou manatua ‘a kinautolu ‘oku nofo pilīsone, ‘o hangē ‘oku mou kaungā nofo pilīsone mo kinautolu: manatua ‘a e ngaohikovia ‘i ho‘omou ongo‘i ‘oku mou ‘i he sino foki mo kinautolu.
4Ke lau‘i lelei ‘a e mali ‘e he kakai kotoa pē; pea ke ta‘e‘uli‘i ‘a e mohenga: he ko e kau fe‘auaki, mo e tono‘unoho ‘e fakamaau kinautolu ‘e he ‘Otua.
5Ke ta‘emānumanu ho‘omou tō‘onga; pea mou fiemālie ‘i he ngaahi me‘a ‘oku mou ma‘u ni: he kuo folofola mai ‘e He‘ene ‘Afio, ‘E ‘ikai si‘i te u mahu‘i meiate koe, kae‘uma‘ā ha‘aku momo‘i li‘aki koe.#Teu 31.6,8; Sios 1.5 6Ko ia ‘oku tau mālohi ai ke lea ‘o pehē,#Saame 118.6 (LXX) Ko e ‘Eiki ko hoku tokoni; ‘e ‘ikai te u manavahē: ko e hā tū ha me‘a ‘e fai kiate au ‘e ha tangata?
7Fakamanatu hake ki he kakai na‘e takimu‘a kiate kimoutolu, ‘a e fa‘ahinga na‘e tala kiate kimoutolu ‘a e folofola ‘a e ‘Otua: pea mou fakatokanga‘i ‘a e iku‘anga ‘o ‘enau mo‘ui, ‘o fa‘ifa‘itaki ki he‘enau tui. 8Ko Sīsū Kalaisi ‘oku tatau ai pē he ‘aneafi, mo e ‘aho ni, ‘io, ‘o ta‘engata. 9‘Oua na‘a tuku ke ‘auhia kimoutolu he ngaahi tokāteline kehekehe mo fo‘ou. He ko hono lelei ke poupou ‘a e loto ‘aki ‘a e kelesi, ‘o ‘ikai ‘aki ‘a e ngaahi tu‘utu‘uni kai, ‘a ia na‘e ‘ikai ‘aonga kiate kinautolu na‘e fou ai.
10‘Ā, ‘oku ‘i ai hatau ‘ōlita, ‘a ia ‘oku ‘ikai ngofua ke kai mei ai ‘e kinautolu ‘oku tauhi ki he Tāpanekale. 11He ko e ngaahi manu ko ia, ‘a ia na‘e ‘omi honau toto ki he Potu Toputapu ‘e he Taula‘eiki Lahi, na‘e tutu ‘o ‘osi honau ‘anga‘anga ‘i tu‘a ‘apitanga.#Lev 16.27 12Ko ia, ko Sīsū foki, koe‘uhiā ke ne fakatāpui ‘a e kakai ‘aki hono ta‘ata‘a ‘o‘ona, ko ia na‘a ne ‘alu atu ki he tu‘a matanikolo ke feia ai. 13Pea ko ia, tau ‘alu atu kiate ia ki tu‘a ‘apitanga, ‘o fua hono manukia‘anga. 14He tala‘ehai ‘oku tau ma‘u ‘i heni ha kolo tu‘u ma‘u, ka ‘oku tau ha‘ao ‘a e kolo ko ia ka hoko mai. 15‘Āua, ko ia ke tau ‘atu ‘iate ia pē, ma‘u ai pē, ha feilaulau fakafeta‘i ki he ‘Otua, ‘a ē ko e fua ‘o e loungutu ‘oku takua hono huafa. 16Kae‘uma‘ā, ‘oua na‘a ngalo ‘a e fai ‘ofa mo e fai tokoni: he ko e alā feilaulau pehē ‘oku hōhō‘ia ai ‘a e ‘Otua.
17Mou tuitala ki he kau tu‘ukimu‘a ‘omoutolu, pea fakavaivai kiate kinautolu; he ko kinautolu ia ‘oku nau ‘ā ke le‘ohi homou laumālie, he ko kinautolu te nau fakamatala kimoutolu ‘amui; koe‘uhiā ke nau fai fiefia ‘enau ngāue ko ia, ‘o ‘ikai fai mo e to‘e; he ‘e ta‘e‘aonga ia kiate kimoutolu.
18Mou hūfia kimautolu; he ‘oku mau pehē ‘oku ‘ata‘atā homau konisēnisi: he ko homau loto ke taau ‘emau mo‘ui ‘i he me‘a kotoa. 19Pea ‘oku ‘āsili ‘eku kole ke mou fai pehē, koe‘uhi ke vave hoku fakafoki atu kiate kimoutolu.
Ko e Lotu Tuku mo e Pōpoaki ‘Ofa
20Pea ko e ‘Otua ‘oku ‘a‘ana ‘a e fakamelino, ‘a ‘Ene ‘Afio na‘a ne toe ‘omi mei he pekia ‘a hotau ‘Eiki ko Sīsū Kalaisi ‘a e Tauhi fungani ko ia ‘o e fanga sipi ‘i he ta‘ata‘a#13.20-21 ta‘ata‘a; pe pekia fakafeilaulau. ‘o e Fuakava Ta‘engata. 21‘Ofa ke fakakakato kimoutolu ‘e He‘ene ‘Afio ‘i he me‘a lelei fuli pē ke mou ‘osiki hono finangalo, he‘ene feia ‘iate kitautolu ‘a e me‘a ‘oku hōhō‘ia ai hono finangalo ‘ia Sīsū Kalaisi; ke ‘o ‘Ene ‘Afio ‘a e kolōlia, ‘o lauikuonga pea ta‘engata. ‘Ēmeni.
22Kāinga, ‘oku ou kole atu ke mou kātaki ‘eku lea tokoni ni, he ‘oku nounou pē ‘a e ‘ipiseli kuo u fai atu. 23Ke mou ‘ilo pē, kuo veteange hota tokoua ko Tīmote; pea kapau ‘e vave ‘ene ‘alu atu, te u ‘a‘ahi kiate kimoutolu fakataha mo ia.
24Tala hoku ‘ofa ki he kau takimu‘a kotoa pē ‘omoutolu, pea ki he kakai lotu fuli pē. ‘Oku ‘ofa atu ‘a e kakai ‘o ‘Ītali.
25‘Ofa ke ‘iate kimoutolu fuli pē ‘a e kelesi.
‘Ēmeni.
Currently Selected:
Hepelū 13: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
