KO ‘ĒSELA 4
4
Ko Hono Fakafe‘ātungia ‘o e Langa Fo‘ou ‘o e Temipalé
1PEA fanongo ‘e he ngaahi fili ‘o Siuta mo Penisimani, tokua ‘oku fai ‘e he ha‘a pōpula ‘enau langa temipale mo‘o Sihova ko e ‘Otua ‘o ‘Isileli; 2ko ia na‘a nau fe‘unu‘i mai kia Seluipepeli, pea ki he hou‘eiki ‘ulumotu‘a, ‘o nau pehē kiate kinautolu, Tau fai fakataha mo kimoutolu ‘a e langa ‘o e fale: he ‘oku mau feinga‘i homou ‘Otua hangē ko kimoutolu; pea kuo mau feilaulau ki ai talu ‘a e kuonga ‘o ‘Esa-‘ātoni ko e Tu‘i ‘Āsilia, ‘a ia na‘a ne ‘omi kimautolu ki heni.#2 Tu‘i 17.24-41
3Pea tali ki ai ‘e Seluipepeli, mo Sisua, mo e hou‘eiki ‘ulumotu‘a kātoa ‘o ‘Isileli, ‘Oku ‘ikai hamou kaunga ‘i he langa fale mo‘omau ‘Otua; ka ko kimautolu pē te mau langa fale mo‘o Sihova, ko e ‘Otua ‘o ‘Isileli, ‘o hangē ko homau tu‘utu‘uni ‘e Kingi Kōlesi ko e Tu‘i Pēsia.
4Ko ia ko e kakai ‘o e fonua na‘a nau fakavaivai tu‘u ‘a e nima ‘o e kakai Siuta, mo fakahoha‘asi kinautolu ‘i he langa fale; 5pea nau nō ha ni‘ihi ‘i he kau fale‘i ke fakapinepine ki he‘enau me‘a, ‘i he kotoa ‘o e taimi ‘o Kōlesi Tu‘i Pēsia, ‘o a‘u atu ki he pule ‘a Talaiasi Tu‘i Pēsia.#4.5 Talaiasi; ‘oku hoko atu ‘a e fakamatala ki he ngahi me‘á ni ‘i he veesi 24. ‘Oku kau ‘a e fakamatala ‘i he veesi 6-23 ki ha ngaahi me‘a na‘e hoko ‘i he meimei senituli ‘e taha ‘amui ange.
Ko Hono Fakafe‘ātungia ‘o e Langa Fo‘ou ‘o Selusalema
6Pea ‘i he pule ‘a Sease, ‘io, ‘i he kamata ‘ene pule, na‘a nau fai ‘a e tohi talatalaaki ‘o e nofo Siuta mo Selusalema.#‘Ēseta 1.1
7Pea ‘i he kuonga ‘o ‘Atasease na‘e fai tohi ‘e Pisilami, Mitelatata, Tape‘eli, mo honau fa‘ahi kātoa kia ‘Atasease Tu‘i Pēsia; pea na‘e fai ‘a e tohi ‘i he mata‘itohi faka-‘Ālamea,#4.7 faka-‘Ālamea; Na‘e ‘ikai hiki ‘i he lea faka-Hepeluú ‘a e tohí ni mei he 4.8 ‘o a‘u ki he 6.18 ka ‘i he lea faka-‘Ālameá, ‘a ia ko e lea na‘e fai ‘aki ‘a e ngaahi ngāue fakapule‘anga ‘a e Pule‘anga Pēsiá. pea ‘i he lea faka-‘Ālamea.#4.7 na‘e fai ‘a e tohi… ‘i he lea faka-‘Ālamea; pe Na‘e fai ‘a e tohí ‘i he lea faka-‘Ālameá pea na‘e ‘uhinga ia ke lau ki he kakaí pea fakatonulea ai pē.
8Ko Lēhumi ko e fakafofonga ‘o e tu‘i mo Simisai ko e sēkelitali, na‘a na fai ‘a e tohi talatalaaki ‘o Selusalema kia Kingi ‘Atasease, ‘o pehē,
9“Na‘e toki tohi ‘e Lēhumi ko e fakafofonga ‘o e tu‘i, mo Simisai ko e sēkelitali, mo honau fa‘ahi kotoa–ko e kau Tina, mo e kau ‘Afasataka, ‘a e kau Tāpela, ‘a e kau ‘Apesia, ‘a e kau ‘Ēleki, ‘a e kau Pāpilone, ‘a e kau Susa, ‘a e kau Tehavi, ‘a e kau ‘Īlami,
10mo hono toe ‘o e ngaahi fa‘ahinga ‘a ia na‘e ‘omi ‘e he ‘eiki mā‘olunga mo mamalu ko ‘Asinapa, ‘o tuku ‘i he kolo ko Samēlia, mo e fonua ‘i Tu‘a-vaitafe,#4.10 fonua ‘i Tu‘a-vaitafe; ‘A ia ko e vahefonua ki he fakahihifo ‘o e vaitafe ko ‘Eufaletesí. ‘I he kuonga na‘e pule‘i ai ‘a Siuta ‘e Pēsiá na‘e kau ‘a Siuta ki he vahefonua Pēsia lahi ko eni ki he fakahihifo ‘o e vaitafe ko ‘Eufaletesí. ‘esetelā.”
11Ko eni ‘a e hiki ‘o e tohi na‘a nau fai kia Kingi ‘Atasease; “Tū ko kimautolu ko ho‘o kau tamaio‘eiki ko e tu‘unga me‘a ‘i Tu‘a-vaitafe, ‘esetelā.
12“Ke mea‘i ‘e he ‘Afiona ko e kau Siu na‘e ha‘u meiate koe kuo nau a‘u kiate kimautolu ki Selusalema; ‘oku nau lolotonga langa ‘a e kolo angatu‘u mo pau‘u ko ia, pea kuo nau faka‘osi hono ‘ā, pea kuo nau ngaohi ‘a e ngaahi tu‘unga. 13Pea ko ‘eni, ke mea‘i ‘e he ‘Afiona, kapau ‘e langa ‘a e kolo ni, mo faka‘osi hono ‘ā, ‘e ‘ikai te nau ‘atu tukuhau, pe ko e tute, pe ko e totongi ‘o e hala, pea ‘e iku pē ki he fakasi‘isi‘i ‘o e me‘a ‘a e tu‘i. 14Pea ko ‘eni, ko e me‘a ‘i he‘emau kai ‘a e māsima ‘o e Palasi, ‘oku ‘ikai taau mo kimautolu ke sio ki ha me‘a ‘e kovi ai ‘a e tu‘i; ‘a ē ā kuo mau fekau atu ai ke fakahā ki he ‘Afiona;
15koe‘uhi ke fai ha kumi ‘i he tohi kalonikali ‘a ho‘o ngaahi kui: pea te ke toki ma‘u ‘i he tohi kalonikali, ‘o mea‘i ko e kolo ko ē ko e kolo angatu‘u, pea kuo kai me‘a kovi ai ‘a e ngaahi tu‘i mo e ngaahi pule‘anga, pea kuo fai angatu‘u ‘i ai talu mei mu‘a ‘i mu‘a: ‘a ē ā na‘e fakaka‘anga ai ‘a e kolo. 16‘Oku mau fakapapau atu ki he ‘Afiona, kapau ‘e langa ‘a e kolo ko ē, mo faka‘osi hono ‘ā, ‘e iku ai ki he ‘ikai ha‘o kei kaunga ki Tu‘a-vaitafe ni.”
17Toki fai ‘e he tu‘i ha tali kia Lēhumi ko e fakafofonga ‘o e tu‘i, mo Simisai ko e sēkelitali, mo honau fa‘ahi kotoa ‘oku nofo ‘i Samēlia, pea ‘i hono toe ‘o e fonua ‘i Tu‘a-vaitafe:
“Si‘oto‘ofa atu, ‘esetelā.
18“Ko e tohi na‘a mou fai kiate kimautolu na‘e lau ‘i hoku ‘ao ke mahino.
19Pea u fai tu‘utu‘uni, pea kuo kumi, pea kuo ‘ilo kuo tu‘u ‘a e kolo ko ē ki he ngaahi tu‘i talu mei mu‘a ‘i mu‘a; pea kuo fai ai ‘a e pau‘u mo e angatu‘u. 20Pea kuo ai foki hani tu‘i kaukaua ‘i Selusalema, pea kuo nau pule ki Tu‘a-vaitafe na kotoa, pea kuo ‘ange kiate kinautolu ‘a e tukuhau, mo e tute, mo e totongi hala.
21Pea ko eni, mou fai ha tu‘utu‘uni ke ta‘ofi ‘a e kau tangata na, pea ke ‘oua na‘a langa ‘a e kolo ko ena; kae‘oua ke u fai ha tu‘utu‘uni pehē. 22Pea tokanga ke ‘oua te mou faifaimālie ‘i he me‘a ko ia: koe‘uma‘ā ke tupu ai ha me‘a ke kovi ai ‘a e tu‘i?”
23Pea ‘i he lau leva ‘a e hiki ‘o e tohi ‘a Kingi ‘Atasease ‘i he ‘ao ‘o Lēhumi, mo e sēkelitali ko Simisai, mo honau fa‘ahi, na‘a nau ‘alu fakavave ki Selusalema ki he kau Siu, ‘o nau ta‘ofi fakamālohi ‘aki ‘a e tau.
Ko e Toe Kamata ‘a e Langa ‘o e Temipalé
24Toki tuku ‘a e ngāue ki he fale ‘o e ‘Otua ‘oku ‘i Selusalema; pea talu ai pē, ‘o a‘u ki hono ua ‘o e ta‘u ‘o e pule ‘a Talaiasi ko e Tu‘i Pēsia.#Hāk 1.1; Sāk 1.1
Currently Selected:
KO ‘ĒSELA 4: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
