KO ‘ĒSELA 3
3
Ko e Toe Kamata Fo‘ou ‘a e Lotu ki he ‘Otuá ‘i Selusalema
1PEA ‘i he hoko mai ‘a hono fitu ‘o e māhina, pea kuo nofo ‘a ha‘a ‘Isileli ‘i he kolo kehekehe, na‘e toki fakatefua mai ‘a e kakai ki Selusalema. 2Pea tu‘u hake ‘a Sisua foha ‘o Siosateki mo hono kāinga taula‘eiki, pea mo Seluipepeli foha ‘o Saletili, mo hono kāinga ‘o‘ona, pea nau ngaohi ‘a e ‘ōlita ‘a e ‘Otua ‘o ‘Isileli, ke feia ai ‘a e ngaahi feilaulau-mōifua, ‘o hangē ko ia kuo tohi ‘i he Lao ‘a Mōsese ko e tangata ‘o ‘Elohimi.#‘Eki 27.1 3Pea nau fokotu‘u ‘a e ‘ōlita ‘i he tu‘unga ko ē; he#3.3 he; pe neongo. kuo nau līfusia telia ‘a e kakai ‘o e ngaahi feitu‘u: pea nau feia ai kia Sihova ‘ani feilaulau-mōifua, ‘io, ‘ani feilaulau pongipongi mo e efiafi.#Nōm 28.1-8 4Pea nau fai ‘a e Kātoanga Fale-lou‘akau, ‘o hangē ko e tohi, mo e ngaahi feilaulau-mōifua ‘i he ‘aho hokohoko, ‘o fai ki he tokolahi ‘o e mano na‘e tu‘u ‘i he konisitūtone, ‘a e tu‘utu‘uni ki hono ‘aho takitaha.#Nōm 29.12-38 5Pea hili ia na‘a nau fai ‘a e feilaulau-mōifua tu‘u ma‘u, mo e feilaulau ‘o e fakamāhina fo‘ou, mo e ngaahi kātoanga tu‘utu‘uni ‘a Sihova na‘e toputapu, pea mo e feilaulau ‘a ia fuli pē na‘e fie ‘atu ‘ene me‘a ki he ‘Eiki ko ‘ene fa‘iteliha.#Nōm 28.11–29.39 6Ko e ‘uluaki ‘o hono fitu ‘o e māhina na‘a nau kamata ai ‘a e ‘atu ‘a e feilaulau-mōifua kia Sihova: ka kuo te‘eki tanupou ‘a e Temipale ‘o Sihova.
Ko e Kamata ‘a Hono Langa Fo‘ou ‘o e Temipalé
7Pea na‘a nau ‘ange pa‘anga ki he kau tā maka, mo e kau tufunga; mo e me‘akai mo e me‘a inu mo e lolo ki he kau Saitoni mo e kau Taia, ke nau ‘omi ha ‘akau sita mei Lepanoni ki he tahi ‘o Siopa. ‘o hangē ko e faka‘atā mai ‘e Kōlesi ko e Tu‘i Pēsia. 8Pea ‘i he ta‘u ua ‘o ‘enau omi ki he fale ‘o ‘Elohimi ‘i Selusalema, ‘i hono ua ‘o e māhina, na‘e hanga ‘a Seluipepeli foha ‘o Saletili, mo Sisua foha ‘o Siosateki, pea mo e toe ‘o honau kāinga, ‘a e kau taula‘eiki mo e kau Līvai, mo kinautolu kotoa kuo omi mei he nofo pōpula ki Selusalema, pea nau vahe ‘a e kau Līvai, ‘o kamata meiate ia na‘e uofulu ta‘u ‘o fai hake, ke pule ki he ngāue ‘i he fale ‘o Sihova. 9Toki tutu‘u ‘a Sisua mo ‘ene fānau mo hono kāinga, mo Katemieli mo ‘ene fānau ‘a‘ana, ko e ha‘a Hotavaia,#3.9 Hotavaia; pe ha‘a Siuta (vakai ki he 2.40). ‘o nau kautaha ke pule ki he kakai na‘e fai ‘a e ngāue ‘i he fale ‘o ‘Elohimi–ko ha‘a Henatati mo ‘enau fānau mo honau kāinga Līvai.
10Pea ‘i he fai ‘e he kau langa fale ‘enau fakatoka ‘a e tu‘unga ‘o e Temipale ‘o Sihova, na‘a nau fokotu‘u ‘a e kau taula‘eiki kuo ‘ai honau teunga, pea ‘oku nau fakatalupite; ko e kau Līvai foki ko e ha‘a ‘Ēsafe ‘oku nau fakasimipale ke fai ‘a e Halelu‘ia kia Sihova, ‘o hangē ko e tu‘utu‘uni ‘a Tēvita ko e Tu‘i ‘Isileli.#1 Kal 25.1 11Pea nau hiva fetāliaki ‘enau fai ‘a e fakamālō mo e fakafeta‘i kia Sihova, ‘o pehē,#1 Kal 16.34; 2 Kal 5.13; 7.3; Saame 100.5; 106.1; 107.1; 118.1; 136.1; Sel 33.11
He ‘oku ne lelei.
He ‘oku tolonga ‘o ta‘engata ‘ene ‘alo‘ofa ki ‘Isileli,
Pea ‘ai ‘e he kakai ‘enau fu‘u tuē ‘i he fai ‘o e Halelu‘ia kia Sihova, koe‘uhi kuo fokotu‘u ‘a e tu‘unga ‘o e fale ‘o Sihova. 12Ka ko e tokolahi ‘o ha‘a taula‘eiki mo ha‘a Līvai mo e kau ‘ulumotu‘a, ko si‘i kau mātutu‘a kuo nau mamata ki he ‘uluaki fale, ‘i he fai ‘a e fokotu‘u tu‘unga ‘o e fale ko eni, ‘o nau mamata ai, na‘a nau ‘ai ‘enau fu‘u fākafoa; pea ko e tokolahi ē na‘e kalakalanga ko ‘enau fiefia: 13ko ia, na‘e ‘ikai ‘ilonga ki he kakai ‘a e longoa‘a ‘o e kaila fiefia, mo e longoa‘a ‘o e tangi ‘a e kakai; he ko e kaila ‘a e kakai ko e me‘a fakamanavahē, pea na‘e ongo mama‘o hono longoa‘a.
Currently Selected:
KO ‘ĒSELA 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
