KO ‘ISIKELI Ko e Talateu
Ko e Talateu
Ko e palōfita ko ‘Isikelí na‘e nofo fakataha mo e kau nofo fakaheé ‘i Pāpilone kimu‘a pea hili ‘a hono hamu ‘o Selusalema ‘i he ta‘u 586 kimu‘a ‘ia Kalaisí. Ko e fakahā na‘á ne fakahoko maí na‘e kau ia ki he kau nofo fakahē ‘i Pāpiloné mo e kakai Selusalemá fakatou‘osi. Ko e tohi ‘a ‘Isikelí ‘oku fā hono ngaahi konga lalahí: 1) Ko hono ui ‘e he ‘Otuá ‘a ‘Isikeli ke ne hoko ko e palōfita; 2) Ko e ngaahi fakatokanga ki he kakaí ‘o fekau‘aki mo honau fakamāu‘i ‘e he ‘Otuá mo e tu‘unuku mai ‘a hono hamu mo faka‘auha ‘o Selusalema; 3) Ko e ngaahi fakahā mei he ‘Eikí ‘o fekau‘aki mo ‘ene fakamāu‘i ‘a e ngaahi pule‘anga ne nau fakamo‘ulaloa mo takihee‘i hono kakaí; 4) Ko e fakafiemālie‘i ‘o ‘Isileli ‘i he hili ‘a hono hamu ‘o Selusalemá, pea mo ha kikite ki ha kaha‘u ‘e lelei ange; 5) Ko ha kikite ki hano fakamāu‘i ‘o e pule‘anga Kokí; 6) Ko ha vīsone ‘a ‘Isikeli ki ha Temipale fo‘ou mo ha pule‘anga fo‘ou.
Ko ‘Isikelí ko e tangata tui mālohi mo‘oni pea anga‘i punake. Na‘e lahi ‘ene ngaahi a‘usia na‘e hoko fakavīsone mai kiate ia, pea lahi ‘ene ngaahi fakahā na‘á ne fakahoko mai ‘aki ‘ene fakatātaa‘i fakasino, ‘o hangē ha lēsoni fakatātaá, pe faiva ‘uhinga lolotó. Na‘e fakamamafa‘i ‘e ‘Isikeli ‘a e fakafo‘ou ‘o e laumālié mo e lotó, mo e pau ke takitaha fuesia ‘e he tangata mo e fefine ‘a e kanongatāmaki ‘o ‘ene angahala. Na‘á ne fakahā ai pē mo ‘ene ‘amanaki ki hano fakafo‘ou ‘o e nofo fakafonuá fakakātoa. Ko e taula‘eiki ‘a ‘Isikeli, mo e toe palōfita, ‘o ‘i ai leva ‘ene mahu‘inga‘ia makehe ‘i he Temipalé mo e mo‘ui mā‘oni‘oní.
Ko e Kakano ‘o e Tohí
Ko hono ui ‘o ‘Isikelí (1.1–3.27)
Ko e ngaahi fakahā ‘o kau ki hono fakamāu‘i ‘o Selusalema (4.1-24.27)
Ko hono fakamaau ‘e he ‘Otuá ‘a e ngaahi pule‘angá (25.1–32.32)
Ko e tala‘ofa ‘a e ‘Otuá ki hono kakaí (33.1–37.28)
Ko hono kikite‘i e fakamāu‘i ‘o Koki (38.1–39.29)
Ko e vīsone ‘o e Temipale mo e fonua ‘o e kaha‘ú (40.1–48.35)
Currently Selected:
KO ‘ISIKELI Ko e Talateu: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.