KO ‘ISIKELI 7
7
Ko e Tu‘unuku mai ‘a e ‘Auha ‘a ‘Isileli
1PEA hoko ‘a e folofola ‘a Sihova kiate au, ‘o pehē, 2Sī, mo eni foki, Hako‘i-tangata, ko e folofola eni ‘a ‘Ātonai Sihova:
‘Oku ai ha faka‘osi ‘o e kelekele ‘o ‘Isileli:
‘Oku hoko mai ‘a e faka‘osi ki he tapa ‘e fā ‘o e fonua.
3Ko e taimi ni ‘oku hoko ‘a e faka‘osi kiate koe, pea te u tukuna atu ‘eku ‘ita kiate koe, pea te u fakamāu‘i koe, ‘o taau mo ho ngaahi ‘alunga; ‘io, ko ho‘o ngaahi fu‘u fakalielia kotoa te u toe ‘atu kiate koe. 4Pea ‘e ‘ikai te u mamae‘i koe ‘e hoku mata, pea ‘e ‘ikai ha‘aku ‘ofa ‘e fai: ka te u ‘atu ho ngaahi ‘alunga kiate koe, pea ‘e hoko ki ho lotolotonga ho ngaahi fakalielia–pea te mou ‘ilo ko Sihova au.
5Ko e folofola ‘eni ‘a ‘Ātonai Sihova,
Ko ha kovi ē!
Ko ha taha‘i kovi!
Vakai, ‘oku ha‘u.
6‘Oku ha‘u ha faka‘osi,
‘Oku ha‘u ‘a e faka‘osi:
‘Oku ne ‘ā mai kiate koe;
Vakai, ‘oku ha‘u.
7‘Oku ha‘u ‘a e mala kiate koe, ‘a e nofo he fonua: ‘oku ha‘u ‘a e taimi, ‘oku panaki ‘a e ‘aho; ‘e ai ha longoa‘a ‘o e tau, ‘o ‘ikai ha tau‘a‘alo ‘i he ngaahi mo‘unga.#7.7 ‘e ai… mo‘unga; ‘Oku ‘ikai ke mahino ‘a hono faka-Hepeluú, ka ‘oku ngali tonu pē ‘a hono hiki ko iá.
8Ko e taimi ni–‘oku ofi–te u huhua ‘eku kakaha kiate koe; ‘io, te u faka‘osi ‘eku ‘ita ‘iate koe, pea te u fakamaau koe ‘o taau mo ho ngaahi ‘alunga; ‘io, ko ho‘o ngaahi fu‘u fakalielia kotoa te u ‘atu kiate koe. 9Pea ‘e ‘ikai mamae‘i koe ‘e hoku mata, pea ‘e ‘ikai ha‘aku ‘ofa ‘e fai: te u ‘atu kiate koe, ‘o taau mo ha ngaahi ‘alunga, pea ‘e hoko ki ho lotolotonga ho‘o ngaahi fakalielia: pea te mou ‘ilo ko au Sihova ‘oku tā.
10Vakai, ko e ‘aho ena!
Vakai, ‘oku ha‘u!
Kuo fisiki mai ‘a e mala; kuo talamuka ‘a e me‘a tā; kuo fisi ‘a Mofuta.#7.10 kuo… Mofuta; ‘Oku ‘ikai ke mahino ‘a hono faka-Hepeluú, ka ‘oku ngali tonu pē ‘a hono hiki ko iá. 11‘Oku tu‘u hake ‘a Laikiatu, ko e me‘a tā ‘a e angahala; ‘e ‘ikai kei ‘iate kinautolu ha ongoonga‘a, pea ‘ikai kei ha uōuōtu‘u, pea ‘ikai kei ha mo‘umo‘ua, pea ‘ikai kei ha felemofafo.#7.11 ‘Oku fihi. ‘Oku toe hiki: ‘ikai kei ha tangilāulau.
12‘Oku ha‘u ‘a e taimi,
‘Oku ‘unu‘unu mai ‘a e ‘aho.
Ke ‘oua ‘e fiefia ‘a e fakatau mai, ke ‘oua ‘e fakamamahi ‘a e fakatau atu: he ‘oku toka ha houhau ki he uōuōtu‘u ‘o e kolo. 13‘E ‘ikai foki mai ‘a ia kuo ne fakatau atu ki he me‘a kuo ne fakatau, neongo ‘oku ne kei lau mo e kakai mo‘ui: he ko e palofisai ‘oku kau ki he uōuōtu‘u kotoa; ‘e ‘ikai ha foki mai; pea tala‘ehai ‘oku ngali mālohi ai ‘a e mo‘ui ‘a ha taha ko ‘ene toloto ‘i he‘ene kovi.#7.13 ‘Oku ‘ikai ke mahino ‘a hono faka-Hepelū ‘o e vēsí ni. 14Kuo nau ifi ‘a e me‘a ifi, mo teu ‘a e me‘a kotoa; ka ‘oku ‘ikai ha ‘alu ki he tau: he ko ‘eku houhau ‘oku ‘i he uōuōtu‘u kotoa ‘o e kolo.
Ko Hono Tautea ‘o e Fai Angahala ‘a ‘Isilelí
15Ko e heletā ē ‘i tua‘ā, pea ko e mahaki mo e honge ē ‘i loto: ko ia ‘oku ‘i he vao te ne mate ‘i he heletā, pea ko ia ‘oku ‘i he kolo ‘e keina ia ‘e he honge mo e mahaki faka‘auha. 16Pea ka ai hanau ni‘ihi ‘e hao, ka te nau ‘i he ngaahi mo‘unga, ‘o hangē koni lupe ‘o e tele‘a, ‘oku nau tangi kotoa pē, takitaha koe‘uhi ko ‘ene kovi.#7.16 ‘Oku ‘ikai ke mahino ‘a hono faka-Hepelū ‘o e vēsí ni. 17Ko honau nima kotoa pē ‘oku tatau pē, pea ko honau tui kotoa ‘oku fetafei ‘i he vai. 18Pea te nau no‘o tauanga‘a, pea ‘e ta‘omi kinautolu ‘e he ngaahi fakalilifu; pea ‘e hā ‘i he mata kotoa ‘a e mā, pea ‘i honau ‘ulu kotoa ‘a e tekefua. 19Ko ‘enau siliva te nau lī he hala, pea ‘e hoko ‘enau koula ko e me‘a te nau fakalili‘a ki ai: tala‘ehai ‘e lava ‘enau siliva mo ‘enau koula ke fakahaofi kinautolu ‘i he ‘aho ‘o e houhau ‘o Sihova; tala‘ehai te nau lava ke fakatopono ‘aki ‘enau mo‘ui, pe fakafonu ‘aki honau kete: seuke, ko e tūkia‘anga ia na‘a nau kovi ai. 20Pea ko e me‘a masani na‘e ‘omi ke teunga ‘aki, na‘a nau liliu ia ko honau pupula‘anga, ‘o nau ngaohi ‘aki ‘enau ngaahi ‘īmisi fakalielia, ‘a ‘enau ngaahi me‘a mousa‘a; ko hono ō ia na‘a ku ngaohi ia ko e me‘a ke nau fakalili‘a ki ai.
21Pea te u tuku ia ki he nima ‘o e kau muli ma‘anau koloa, pea ki he kau angahala ‘o māmani ma‘anau vete; ke nau ngāuenoa‘aki. 22Pea te u hanga kehe meiate kinautolu, pea te nau fahu ‘a e tapu ‘o hoku potu fufū.#7.22 pe koloa fufū. ‘io, ‘e hū ki ai ‘a e kau hae fale, pea te nau fakalielia‘i ia.
23Ngaohi ‘a e seini;#7.23 Ngaohi ‘a e seini; ‘Oku ‘ikai ke mahino ‘a hono faka-Hepeluú, ka ‘oku pehē ‘i hono hiki fuoloa ‘e taha: ‘Oku moveuveu ‘a e me‘a kotoa pē. he ‘oku fonu ‘a e fonua ‘i he ngaahi me‘a ke fakamāumatea, pea ‘oku fonu ‘a e kolo ‘i he fakamālohi. 24Ko ia, te u ‘omi ‘a e kovi taha ‘o e ngaahi pule‘anga ke nau ma‘u honau ngaahi fale: pea te u fakangata ‘a e mālohi ‘oku nau pōlepole ai; he ko ‘enau ngaahi potu tapu ‘e ngaohi hangē ha potu noa. 25Kuo hoko mai ‘a e faka‘auha; pea te nau kumi ki he tu‘umālie, ka ‘oku ‘ikai. 26‘Oku ha‘u ‘a e tu‘utāmaki ko ē, pea tata‘o ki ai ‘a e tu‘utāmaki ko ē; pea ‘oku fetu‘utaki ‘a e ongoongo mo e ongoongo; pea te nau toki kumi vīsone ki he palōfita, ka kuo mole ‘a e lao mei he taula‘eiki, mo e poto ke fale‘i mei he mātu‘a. 27Ko e tu‘i te ne fakamamahi, pea ko e nōpele ‘e no‘o ‘aki ‘a e tāfu‘ua, pea ‘e tete ‘a e nima ‘o e kainanga ‘o e fonua, Te u fai kiate kinautolu ke hoa mo honau ‘alunga, pea te u tautea kinautolu ‘o fakatatau ki honau fakamaau–pea te nau ‘ilo ko Sihova au.
Currently Selected:
KO ‘ISIKELI 7: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
