KO ‘ISIKELI 8
8
Ko Hono Māta‘ia Hono Ua ‘e ‘Isikeli ‘a e ‘Otuá
Ko e Lotu ‘Aitoli ‘i Selusalema
(8.1–10.22)
1PEA ‘i hono ono ‘o e ta‘u, mo hono ono ‘o e māhina, mo hono ‘aho nima ‘o e māhina, ‘oku ou nofo ‘i hoku fale, pea ko e mātu‘a Siuta ‘oku fe‘ao mo au, fokifā na‘e hifo kiate au ‘i he potu ko ia ‘a e nima ‘o ‘Ātonai Sihova. 2Pea u vakai, pea tā ‘oku hā ha me‘a hangē ko e afi; mei he matamata ko hono kongaloto ‘o fai hifo, ko e afi: pea mei hono konga loto ‘o fai hake na‘e hā fetapatapaki, hangē ko e ukamea ‘afu vela.#‘Isi 1.27 3Pea ne mafao mai ‘a e me‘a na‘e matamata ko e nima, ‘o ne puke au ‘i he tope ‘o hoku ‘ulu; pea hiki au ‘e he laumālie ki he vaha‘a ‘o langi mo māmani, ‘o ‘ave au ki Selusalema ‘i he vīsone faka‘otua, ‘o a‘u ki he hū‘anga ‘o e matapā ‘o e loto‘ā loto ‘oku hanga ki he tokelau; ‘a ia ‘oku tu‘u ai ‘a e ‘īmisi ‘o Fua‘a, ‘oku fakatupu fua‘a.
4Pea tā ‘oku ‘i ai ‘a e Sikaina ‘o e ‘Otua ‘o ‘Isileli, ‘o hā tatau mo e me‘a na‘a ku sio ki ai ‘i he tele‘a.#‘Isi 1.28 5Pea ne folofola mai kiate au, Hako‘i-tangata, tāngaki hake mu‘a ho mata, ‘o hanga ki he tokelau. Pea u tāngaki hake hoku mata, ‘o hanga ki he tokelau, pea tā ko e ‘īmisi ni ‘o Fua‘a ‘ena ‘i he potu tokelau ‘o e matapā ‘o e ‘ōlita, ‘i he hū‘anga.
6Pea ne folofola mai, Hako‘i-tangata, ‘oku ke sio ki he me‘a ‘oku nau fai? Ko e ngaahi fu‘u fakalielia ‘a ia ‘oku fai ‘e he fale ‘o ‘Isileli heni ke fakamama‘o au mei hoku potu tapu? ka te ke toe sio ki he ngaahi fakalielia ‘oku lahi ange.
7Pea ne ‘ave au ki he hū‘anga ‘o e loto‘ā; pea u vakai, ka tā ko e ava ē ‘i he ‘ā maka. 8Pea ne folofola mai, Hako‘i-tangata, foa atu mu‘a ‘i he ‘ā maka: pea u foa atu ‘i he ‘ā maka, pea tā ko ha matapā ē. 9Pea ne folofola mai, Hū, ‘o vakai ‘a e ngaahi fakalielia kovi ‘oku fai ‘e he fa‘ahinga ko ē heni. 10Pea u hū, ‘o vakai; pea tā ko e fakatātā kehekehe ‘o e manu totolo, mo e manu lalahi, ko e koto me‘a mousa‘a;#8.10 ko e… mousa‘a; ko e koto me‘a mousa‘a; Na‘e tapu ‘i he Lao ‘a Mōsesé ‘a hono ma‘u ‘o e ngaahi me‘atokoni ‘e ni‘ihi, ko e pehē ko e ma‘u me‘atokoni peheé te te ta‘etaau ai mo e kau ‘i ha fai‘anga lotu (vakai kia Lev 11). ko e ngaahi ‘aitoli foki ‘o e fale ‘o ‘Isileli kuo tā ‘i he ‘aofi takatakai ‘i he potu kotoa pē. 11Pea ‘oku tu‘u ‘i he ‘ao ‘o e ngaahi fakatātā ha tu‘unga tangata ‘e toko fitungofulu mei he mātu‘a ‘o e fale ‘o ‘Isileli, pea lotolotoi ‘iate kinautolu ‘a Siasanaia foha ‘o Sāfani, pea nau takitaha to‘o ‘ene ‘ainga ‘inisēnisi; pea na‘e taufa mai ‘a e ngangatu ‘o ha ‘ao ‘inisēnisi. 12Pea ne folofola mai kiate au, Hako‘i-tangata, ‘oku ke sio koā ki he me‘a ‘oku fai ‘e he mātu‘a ‘o e fale ‘o ‘Isileli ‘i he po‘uli, takitaha ‘i hono loki tamapua? he ‘oku nau pehē, ‘Oku ‘ikai sio kiate kitautolu ‘a Sihova; kuo li‘aki ‘e Sihova ‘a e fonua.
13Pea ne folofola mai kiate au, Te ke toe sio ki ha ngaahi fakalielia ‘oku lahi ange, ‘a ia ‘oku fai ‘e he fa‘ahinga ko ē. 14Pea ne ‘ave au ki he hū‘anga ‘o e matapā ‘o e fale ‘o Sihova, ‘a ia ‘oku hanga ki he tokelau; pea tā ko e kau fefine ena ‘oku nofo, ‘o fai ‘enau tēngihia ‘a Tāmusi.#8.14 Tāmusi; Ko e ‘otua ia na‘e tui ‘a e kakai ‘i ono‘ahó ‘okú ne pekia tokua ‘i he mate fakafa‘ahita‘u ‘a e ‘akaú peá ne toe mo‘ui he ta‘u hoko maí. Na‘e angamaheni‘aki ‘e he kakai fefiné ‘a e tēngihia ‘ene ‘ene pekiá, ‘a ia na‘e fakatātaa‘i ‘i ha ngaahi ouau fakalotu ‘aitoli.
15Pea ne folofola kiate au, Hako‘i-tangata, kuo ke sio ki ai? te ke toe sio ki ha ngaahi fakalielia ‘oku lahi ange ‘i hena. 16Pea ne ‘ave au ki he loto‘ā loto ‘o e fale ‘o Sihova; pea tā ‘i he hū‘anga ki he temipale ‘o Sihova, ‘i he vaha‘a ‘o e fale hū‘anga mo e ‘ōlita, na‘e matamata ko e tu‘unga tangata ‘e toko uofulu mā nima, ‘oku nau fulitu‘a ki he temipale ‘o Sihova, ka nau hanga ki hahake; pea ko e fa‘ahinga ko ia ‘oku fai ‘enau lotu ki hahake ki he la‘ā.
17Pea ne folofola mai, Hako‘i tangata, kuo ke sio ki ai? Ko e me‘a si‘i ‘apē ki he fale ‘o Siuta ke feia ‘a e ngaahi fakalielia ‘oku nau fai heni, ka ‘oku nau fakafonu ‘a e fonua ‘i he fakamālohi, ‘o toutou langaki ‘eku ‘ita: kae vakai ko e fa‘ahinga ko ē ‘oku nau ‘ai ‘a e hele ‘auhani ki honau ihu ‘onautolu.#8.17 hele ‘auhani ki honau ihu ‘onautolu; Ko hono hiki totonú ko e; va‘a ‘akau ki honau ihú, ‘a ia ko e ouau lotu faka-Hīteni ia. 18Ko ia na‘a mo au te u fai kakaha: ‘e ‘ikai mamae hoku mata, ‘e ‘ikai ha‘aku ‘ofa ‘e fai: pea neongo ‘enau kalanga le‘o lahi ki hoku telinga ni, kae ‘ikai te u ongo‘i kinautolu.
Currently Selected:
KO ‘ISIKELI 8: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
