KO ‘ISIKELI 37
37
Ko e Tele‘a ‘o e Hui Mōmoa
1PEA hoko kiate au ‘a e nima ‘o Sihova, pea na‘e ‘ave au ‘e Sihova ki tu‘a ‘i he laumālie, ‘o ne tuku au ‘i he loto tele‘a; tā na‘e fonu ia ‘i he ngaahi hui. 2Pea ne taki au ke u foli takatakai ki ai: Pea tā ‘oku nau fola ‘i he tele‘a ko e me‘a lahi fakamanavahē; pea tā ‘oku nau mōmoa ‘aupito. 3Pea ne folofola mai kiate au, Hako‘i-tangata, ‘e lava ke mo‘ui ‘a e ngaahi hui ni?
4Pea u tali, ‘Ēī Sihova, ko koe pē ‘oku mea‘i. Toki folofola mai ‘e ia, Ke ke hanga ‘o palofisai ki he ngaahi hui ni, pea ke pehē kiate kinautolu, ‘a e ngaahi hui mōmoa na, mou fanongo ki he folofola ‘a Sihova. 5Ko e folofola ‘eni ‘a ‘Ātonai Sihova ki he ngaahi hui ni: Ko au ‘eni ‘oku ou ‘omi mānava kiate kimoutolu, pea te mou mo‘ui. 6Pea te u ‘ai uoua kiate kimoutolu, pea te u ‘ai ke heheka ‘a e kakano ‘iate kimoutolu, pea te u kofu kimoutolu ‘aki ha kili, pea te u ‘ai ha mānava kiate kimoutolu, pea te mou mo‘ui; pea te mou ‘ilo ko Sihova au.
7Ko ia, na‘a ku palofisai ‘o hangē ko hoku fekau: pea lolotonga ‘eku palofisai, ‘iloange na‘e ‘u‘ulu; pea tā ko e fu‘u ngaue ‘ena, pea ‘oku fengātolo‘i mai ‘a e ngaahi hui takitaha ke fakataha mo hono kaungā hui. 8Pea u fakasio, pea tā kuo ‘i ai ha ngaahi uoua, pea kuo heheka ‘a e kakano, pea ‘oku ‘ufi‘ufi ‘aki kotoa ‘a e kili, ‘o fakakofu: ka ‘oku ‘ikai ha mānava ‘iate kinautolu.
9Toki folofola mai ia kiate au, Palofisai ki he matangi;#37.9 matangí; pe laumālié. ‘Oku tatau ‘a e faka-Hepelū ‘o e matangí mo e laumālié mo e mānavá. ‘io, Hako‘i tangata, ke ke palofisai, pea ke lea ki he matangi, ‘o pehē, Ko e folofola ‘eni ‘a ‘Ātonai Sihova: ‘a e Mānava, ke ke ha‘u mei he matangi ‘e fā na, pea ke hō ki he kau mate tāmate‘i ni ke nau mo‘ui.
10Pea na‘a ku palofisai hangē ko hoku fekau; toki hū ‘a e mānava kiate kinautolu, pea nau mo‘ui, ‘o nau tu‘u ‘aki honau va‘e, ko e hōsitē lahi ‘aupito ‘aupito.#Fkhā 11.11
11Pea ne folofola mai kiate au, Hako‘i tangata, ko e ngaahi hui ni ko e fale kotoa ia ‘o ‘Isileli: vakai, ‘oku lau ‘e kinautolu, Kuo mōmoa hotau ngaahi hui, pea kuo ka‘anga ‘etau ‘amanaki; kuo tu‘usi ‘aupito kitautolu. 12Ko ia, ke ke palofisai, pea ke pehē kiate kinautolu, Ko e folofola ‘eni ‘a ‘Ātonai Sihova: Ko au ‘eni ‘oku ou teu tangaki homou ngaahi fa‘itoka, si‘oku kakai, pea te u fakaha‘ele hake kimoutolu mei homou ngaahi fa‘itoka; pea te u ‘omi kimoutolu ki he kelekele ‘o ‘Isileli. 13Pea te mou ‘ilo ko Sihova au, ‘oka u ka tangaki homou ngaahi fa‘itoka, si‘oku kakai, mo fakaha‘ele hake kimoutolu mei ai. 14Pea te u ‘ai hoku laumālie kiate kimoutolu, pea te mou mo‘ui; pea te u ‘ai ke mou nofo ‘i homou kelekele: pea te mou ‘ilo ko au Sihova kuo u tala, pea kuo u fai–ko ‘Ātonai Sihova ia mei he Ta‘ehāmai.
Ko e Fakataha‘i ‘o Siuta mo ‘Isileli ke Pule‘anga Taha Pē
15Pea na‘e hoko ‘a e folofola ‘a Sihova kiate au, ‘o pehē, Siini, Hako‘i-tangata, kumi mai ha potu‘i ‘akau, pea ke tohi ai ‘o pehē, 16Ko e me‘a ‘a Siuta, mo ha‘a ‘Isileli ‘oku kau mo ia. Pea ke to‘o ha potu‘i ‘akau ‘e taha, pea ke tohi ai ‘o pehē, Ko e me‘a ‘a Siosifa, ko e ‘akau ‘a ‘Ifalemi, mo e fale kotoa ‘o ‘Isileli ‘oku kau mo ia. 17Pea ke ‘opo ua kinaua ‘i ho‘o puke, ke na ‘akau pē taha; pea te na hoko ‘a e ua kuo taha ‘i ho nima. 18Pea ka lea kiate koe ‘a e hako ‘a ho kakai, ‘o pehē, ‘Ikai koā te ke fakamatala mai pe ko e hā ‘au ‘ena? 19Te ke lea kiate kinautolu, ‘o pehē, Ko e folofola ‘eni ‘a ‘Ātonai Sihova: Vakai, ‘oku ou teu to‘o ‘a e ‘akau ‘a Siosifa, ‘a ia ‘oku ‘i he nima ‘o ‘Ifalemi, pea mo e ngaahi matakali ‘o ‘Isileli ‘oku kau mo ia; pea te u ‘ai kinautolu ki he taha ko ē, ‘a e ‘akau ‘o Siuta, pea te u ngaohi ko e ‘akau pē taha, pea te na taha pē ‘i hoku nima.
20Pea ko e ongo ‘akau kuo ke tohi ki ai, te na ‘i ho nima, ‘o nau mātu‘aki sio ki ai. 21Pea te ke tala kiate kinautolu, Ko e folofola ‘eni ‘a ‘Ātonai Sihova: Vakai, ‘oku ou teu to‘o ‘a ha‘a ‘Isileli mei he lotolotonga ‘o e ngaahi pule‘anga ‘oku nau fou ai, pea te u tānaki kinautolu mei he ngaahi potu takatakai, pea te u ‘omi kinautolu ki honau kelekele: 22pea te u ngaohi kinautolu ko e pule‘anga pē taha ‘i he fonua, ‘i he ngaahi mo‘unga ‘o ‘Isileli; pea ‘e tu‘i kiate kinautolu kotoa ha tu‘i pē taha: pea ‘e ‘ikai te na toe kakai ‘e ua, pea ‘e ‘ikai toe vahevahe ‘o toe pule‘anga ua: 23pea ‘e ‘ikai te nau toe ‘uli‘i kinautolu ‘aki ‘enau ngaahi ‘aitoli, mo ‘enau ngaahi me‘a mousa‘a, pe ‘aki ‘enau ngaahi talangata‘a kehekehe: pea te u fakahaofi kinautolu mei honau ngaahi nofo‘anga, ‘a ia na‘a nau fai angahala ai, pea te u fakama‘a kinautolu: pea te nau nofo mai ko hoku kakai, pea ko au te u nofo atu ko honau ‘Otua. 24Pea ko ‘eku sevāniti ko Tēvita te ne tu‘i kiate kinautolu, mo e taha‘i tauhi ki honau kotoa: pea te nau fou ‘i he‘eku ngaahi kupu‘i konisitūtone, pea te nau tauhi ‘eku ngaahi tu‘utu‘uni, ‘o fai ki ai.#‘Isi 34.24 25Pea te nau nofo‘i ‘a e fonua na‘a ku foaki ki he‘eku sevāniti ko Sēkope, ‘a ia na‘e nofo ai ho‘omou ngaahi kui; pea ‘e nofo‘i ia ‘e kinautolu mo ‘enau fānau, mo e fānau ‘a ‘enau fānau, ‘o ta‘engata: pea ko ‘eku sevāniti ko Tēvita te ne ‘eiki kiate kinautolu ‘o ta‘engata. 26Pea te u fai mo kinautolu ha kovinānite melino: ‘e hoko ia ko e kovinānite ta‘engata mo kinautolu: pea te u ‘ai kinautolu, pea te u fakatokolahi kinautolu, pea te u tuku hoku potu tapu ‘i honau lotolotonga ‘o ta‘engata. 27Pea ‘e fakamalumalu kinautolu ‘e hoku Tāpanekale, pea te u nofo ko honau ‘Otua, pea ko kinautolu te nau nofo mai ko hoku kakai.#2 Kol 6.16; Fkhā 21.3 28Pea ‘e ‘ilo ‘e he ngaahi pule‘anga ko Sihova au ‘oku fakatāpuhaa‘i ‘a ‘Isileli, ‘oka tu‘u hoku potu tapu ‘i honau lotolotonga ‘o ta‘engata.
Currently Selected:
KO ‘ISIKELI 37: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
